Новости за 13.11.2023

Түбән Камада агач утырту дәвам итә. Администрация командасы идарәче компанияләр белән Актүбә урамы буйлап 600дән артык сортлы пирамида сыман тирәк (мамыксыз) утыртты. Барлыгы 2000 үсенте утырту планлаштырыла. Бу хакта Түбән Кама муниципаль районы рәсми сайтында хәбәр ителә.

16 ноябрьдә 11.00 сәгатьтә Казанда Левченко бистәсендә «Сөләймән» мәчетенең яңа комплексы ачыла. Бу хакта Татарстан Республикасы мөселманнары Диния нәзарәте матбугат хезмәте хәбәр итә.

15-18 ноябрьдә Камал театры Төркия һәм Төркмәнстандагы фестивальләрдә катнашачак. Бу хакта Камал театрының матбугат хезмәте хәбәр итә.

29 октябрьдә Испаниянең Матаро шәһәре мэриясе (Каталония автономияле берләшмәсе, Испания) «Милләтләр фестивале» мәдәни чарасын үткәргән. Бу хакта Бөтендөнья татар конгрессы матбугат хезмәте хәбәр итә.

Махсус операция зонасындагы хәрбиләргә Татарстанның Әлмәт районы Добромыш авылы умартачысы Александр Коновалов биргән балны илтеп җиткергәннәр. Бу хакта «Татар-информ» га волонтер Динар Әхмәтҗанов сөйләде. Якташларга шефлык ярдәмен илтү белән Чистай волонтеры Айрат Хәмәтов шөгыльләнгән.

Түбән Новгородта 10 ноябрь көнне Халыклар бердәмлеге йортында «Безнең Тату Түбән Новгород» («Наш Дружный Нижний») фестивале узган.

Минзәлә районы прокуратурасы керемнәр, милек һәм милек характерындагы бурычлар турындагы мәгълүматларның дөреслеген һәм тулылыгын тикшергәндә авыл җирлекләре башлыкларының закон бозуын ачыклаган. Бу хакта Татарстан прокурорының өлкән ярдәмчесе Руслан Галиев хәбәр итте, дип яза «Татар-информ».

Татарстанда атна дәвамында әкренләп суыта башлый. Бу хакта Татарстан Гидрометеорология үзәге хәбәр итә.

Ташкентта 11 ноябрь көнне Мирза Олугбәк исемендәге Милли университет бинасында Каюм Насыйри белем бирү-мәдәният үзәге институтында татар телен өйрәнүче төркем «Көзге моңнар» татар шигърияте кичәсе булды. Чара Татарстанның атказанган мәдәният хезмәткәре Рәйхан Маннапова җитәкчелегендә узган. Бу хакта Ташкент Татар иҗтимагый мәдәни-агарту үзәге телеграм-каналында хәбәр ителә.

Татарстан Рәисе Рөстәм Миңнеханов Лаеш районы Столбище авылында урнашкан республика Дәүләт архивы бинасында булды. Бу турыда Татарстан Рәисенең матбугат хезмәте хәбәр итте.

82 яшендә «Лениногорск хәбәрләре» газетасының элеккеге мөхәррире, Татарстанның атказанган мәдәният хезмәткәре Николай Игнатьев вафат булган. Бу хакта «Лениногорск хәбәрләре» газетасы яза.

Гадәттән тыш хәлләр министрлыгының Ил-76 очкычы Газа секторыннан эвакуацияләнгән Россия гражданнары белән Каһирәдән Мәскәүгә очкан. Бу хакта Россия Гадәттән тыш хәлләр министрлыгының Татарстан буенча баш идарәсе матбугат хезмәте хәбәр итте.

Федерация Советы бер айдан Президент сайлау датасын билгеләргә мөмкин — якынча 2024 елның 17 мартына. Бу хакта РИА Новости агентлыгы парламенттагы чыганагына сылтама белән хәбәр итте.

«Лукойл-Марий Эл» ябык акционерлык җәмгыяте генераль директоры Наил Галәветдинов вафат. Бу хакта «Марийская правда» яза.

Красноярск Җәмигъ мәчете каршындагы якшәмбе мәктәбе теләгән һәркемне «Тылсымлы рифма» бәйгесендә катнашырга чакыра. Бу хакта Россия Мөфтиләр шурасының матбугат хезмәте хәбәр итә.

Түбән Кама башкарма комитеты җитәкчесе Камил Нәҗмиев үз теләге белән вазифасыннан китте. Сәбәбе — «Челтәр компаниясе» акционерлык җәмгыятенә яңа эшкә күчү. Бу хакта берләштерелгән сессиядә билгеле булды, анда депутатлар җитәкченең вәкаләтләрен вакытыннан алда туктату мәсьәләсен карады. Бу турыда «Татар-информ» яза.

Киләсе елда федераль Сабантуйны Марий Эл республикасы кабул итәчәк. Бәйрәм алдыннан республикада Татар мәдәнияте көннәре үткәреләчәк. Бу хакта «Татар-информ»га Россиянең атказанган артисты, Марий Элның халык артисты, мәдәният, матбугат һәм милләтләр эшләре министры Константин Иванов хәбәр итте.

Татарстан Рәисе Рөстәм Миңнеханов Лаеш районында «Буревестник» транспорт компаниясе паркында булды һәм аның эшчәнлеге белән танышты. Бу хакта республика җитәкчесе матбугат хезмәте хәбәр итә.

Туймазы шәһәрендә урнашкан татар дәүләт драма театры Россия халыкларының мәдәни мирас объектлары бердәм реестрына кертелде. Шул хактагы боерык Башкортстан Республикасы хокукый мәгълүмат порталында урнаштырылган. Бу хакта «Башинформ» агентлыгы хәбәр итә.

Казанда «Без Тартариядән» дип аталган беренче халыкара әдәби бәйгенең җиңүчеләре билгеләнде. Җиде җиңүченең берсен – Татарстанның танылган язучысы Ольга Иванованы журналистлар белән очрашу вакытында бүләкләделәр, дип хәбәр итә «Миллиард.Татар».

«Куркынычсыз интернет лигасы» башлыгы Екатерина Мизулина Россия Эчке эшләр министрлыгының Мәскәү шәһәре буенча идарәсенә танылган блогерларны тикшерү үтенече белән мөрәҗәгать итте. Аның фикеренчә, алар да күптән түгел тоткарланган Аяз Шабутдиновның мошенниклык схемасы буенча эш итәргә мөмкин. Мизулинаның Telegram-каналында шул хакта мәгълүмат чыкты.

Россия югары уку йортлары студентлары «Дәүләт хезмәтләре» порталы аша өлгерешне һәм ташламаларны онлайн рәвештә күзәтә алачак. Моннан тыш, сервис электрон студент билетлары, зачет кенәгәләре һәм белем алуны раслый торган башка документлар белән тулыланачак. Бу хакта Россия Цифрлы үсеш, элемтә һәм массакүләм коммуникацияләр министрлыгы телеграм-каналында хәбәр ителә.

Ташламалардан файдаланучыларга социаль газлаштыруга дәүләт ярдәме алуны гадиләштерделәр. Хәзер алар йортны челтәрләргә тоташтырган өчен субсидиянең тулы суммасын беренче түләүгә кертә алачак. Бу хакта Хөкүмәт сайты хәбәр итә.

Мәҗит Гафури исемендәге Башкорт академия театры һәр ике ел саен Казан тамашачысына иң популяр һәм яңа спектакльләрен тәкъдим итә. Театр бу юлы да үз традицияләренә тугры калды – 14-19 ноябрьдә Г.Камал исемендәге Татар дәүләт академия театры сәхнәсендә театрның гастрольләре узачак. Бу хакта «Башинформ» агентлыгы хәбәр итә.

Бөтенроссия «Туган тел» форумы делегатлары бүген Арчага килде.