Новости за 14.11.2023

Түбән Камада яңа тематик трамвай рейска чыкты. Ул Социалистик Хезмәт Герое, Кызыл Йолдыз ордены кавалеры, ТАССРның атказанган төзүчесе, шәһәрнең Мактаулы гражданы Евгений Королевка багышланган. Символик рәвештә, трамвай Евгений Никифоровичның туган көнендә тантаналы рәвештә йөри башлый. 14 ноябрьдә аның тууына 110 ел тулды. Бу хакта Түбән Кама муниципаль районы рәсми сайтында хәбәр ителә.

Россиядә кызамык буенча эпидемиологик вазгыять контрольдә тотыла, иммунизацияләнергә тиешле гражданнарның 77,5 процентына прививка ясатылган. Бу хакта РИА Новости Россия Кулланучы хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) матбугат хезмәтенә сылтама белән хәбәр итә.

Бүген Казанның «Ак Барс» хоккейчылары Санкт-Петербургның СКА командасына 2:4 исәбенә җиңелде. Матч Казанда «Татнефть Арена» боз сараенда узды.

Хәзер яшь гаиләләр торакны еш кына бюджет ярдәменнән башка сатып ала алмый. Бу хакта «Российская газета» депутатлар - закон проекты авторларына сылтама белән хәбәр итә. Бу категория гражданнарының җыелган акчасы юк, әмма тотрыклы, арта торган кереме бар, шулай ук алар шактый озак вакыт хезмәткә сәләтле яшьтә була.

Бүген, 14 ноябрьдә, Казан шәһәре Хәрби госпиталендә намаз уку бүлмәсе ачылды. Әлеге чарада Татарстан мөфтие Камил хәзрәт Сәмигуллин, Хәрби госпиталь җитәкчесе подполковник Дамир Ижбирдеев, намаз бүлмәсенең имамы Ирек хәзрәт Җиһаншин, госпитальдә дәваланучы мөселман кардәшләр катнашты. Ул госпитальнең беренче катында урнашкан.

Ел башыннан Россиядә 7 миллион кеше торак шартларын яхшырта алды. Бу якынча 3,2 млн гаилә була. Бу хакта Россия Президенты Владимир Путин Төзелеш һәм торак-коммуналь хуҗалык министрлыгы җитәкчесе Ирек Фәйзуллин белән очрашуда әйтте.

Казанның 169нчы мәктәбе «Иң яхшы мәктәп ашханәсе» конкурсында җиңде. Бүләкләү тантанасы ВДНХда «Россия» халыкара күргәзмә-форумында узды. Бу хакта Татарстан башкаласы мэриясе хәбәр итә.

Катар башкаласы Дохада Россия мөселманнары Диния нәзарәте һәм Россия Мөфтиләр шурасы рәисе, мөфти шәех Равил Гайнетдин һәм РФ мөселманнары Диния нәзарәте рәисе урынбасары Рушан Аббясов һәм РФ мөселманнары Диния нәзарәтенең мәдәният департаменты җитәкчесе Ренат Абянов Коръән укучылар арасында халыкара конкурска нәтиҗә ясауда катнашты. Бу хакта Россия мөселманнары Диния нәзарәтенең матбугат хезмәте хәбәр итә.

«Татмедиа» Республика матбугат һәм массакүләм коммуникацияләр агентлыгы хәрби комиссариатка Татарстан солдатлары өчен газеталар һәм журналлар тапшырды. Алар Ерак Көнчыгышта хезмәт итәчәк.

Татарстанда киләсе елның 1 июленнән күпфатирлы йортларда су җылыту нормативы үзгәрәчәк. Бу хакта Татарстан Төзелеш, архитектура һәм торак-коммуналь хуҗалык министрлыгының исәп-хисапларны координацияләү бүлеге җитәкчесе Лилия Гыйльфанова ТР Дәүләт Советының Торак сәясәте һәм инфраструктура үсеше комитеты утырышында хәбәр итте.

Мәскәүдә «Киләчәк уеннарына 100 көн» тантанасында беренче тапкыр чемпионат талисманын күрсәттеләр. Ул ясалма интеллект ярдәмендә булдырылган Мира кушаматлы бәхет кошы (жар-птица) була. Аны Татарстаннан өч студент кыз Мария Ромашка, Алинә Хәсәнова һәм Дарья Сидакова уйлап тапкан һәм эшләгән.

Әстерханның Габдулла Тукай исемендәге 74нче урта гомуми белем бирү мәктәбе директоры, Татарстанның атказанган укытучысы Надежда Гоголева татар теле, мәдәнияте белән кызыксынучылар артуын әйтте. Ул Бөтенроссия «Туган тел» форумының пленар утырышында чыгыш ясады.

Санкт-Петербург Татар милли-мәдәни автономиясенең мәдәни үзәге базасында мәдәни-белем бирү проектлары сериясен уздыру планлаштырыла. Бу хакта Татарстанның Санкт-Петербург һәм Ленинград өлкәсендә Даими вәкиллеге матбугат хезмәте яза.

15-16 ноябрьдә Казанда «неЦирк» түләүсез проектының 10 катнашучысын сайлау өчен кастинг була. Кастингны һәм әңгәмәне узучылар ярты ел дәвамында цирк сәнгате нигезләрен өйрәнә. Бу турыда Казан циркы хәбәр итте.

Нурлат районының атказанган спорт мастеры Галимҗан Салих улы Хөсәенов исемендәге спорт мәктәбе— «Тулпар» спорт сарае «Россиянең спорт объекты: иң яхшы спорт объекты» номинациясендә кандидатлар исемлегенә кергән. Бу турыда «Татар-информ» хәбәр итте.

Новосибирск өлкәсенең Каргат һәм Уба районнарында иҗат коллективларының «Көзге очрашу» концерты була. Бу хакта «Новосибирск өлкәсе Татар мәдәни үзәге» мәдәният учреждениесе «ВКонтакте» социаль челтәрендәге сәхифәсендә яза.

2024 елның 1 гыйнварыннан Россиядә картлык буенча иминият пенсияләре 7,5 процентка индексацияләнә. Бу закон бүген Дәүләт Думасы тарафыннан кабул ителде. Парламентның түбән палатасы Телеграм-каналында шул хакта хәбәр ителә.

Уфа фән һәм технология университеты Стәрлетамак филиалының татар һәм чуваш филологиясе кафедрасы мөдире, филология фәннәре кандидаты Илсур Мансуров фикеренчә, татар теле һәм әдәбияты бүлекләрен саклау, студентлар җыю югары уку йорты укытучыларының шәхси эшенә әверелеп килә. Үз фикерләрен ул Бөтенроссия «Туган тел» форумының пленар утырышы барышында җиткерде.

Чувашия Республикасы Комсомол муниципаль округы Тукай авылы мәхәлләсе имам-хатыйбы Наил Ямалетдинов үзләрендә төзелгән «Мәхәллә йорты» эше турында сөйләде.

Татарстан Фәннәр академиясенең Шиһабетдин Мәрҗани исемендәге Тарих институты, Татарстан Фәннәр академиясенең Перспективалы икътисади тикшеренүләр үзәге һәм Тормыш иминлеге фәнни үзәге Татарстан Республикасы Фәннәр Академиясенең аерым структура бүлекчәләре булачак. Бу турыда «Татар-информ» хәбәр итте.

Чувашия Республикасы Комсомол муниципаль округы Тукай авылы мәхәлләсе имам-хатыйбы, «Мәхәллә йорты» мөдире Наил Ямалетдинов Чувашиядә милли һәм дини тормыш бергә үрелеп баруын әйтте.

Чувашия Республикасы Комсомол муниципаль округы Тукай авылы мәхәлләсе имам-хатыйбы, «Мәхәллә йорты» мөдире Наил Ямалетдинов татар мәктәпләре өчен ислам мәдәнияте буенча татарча дәреслек булдыруны сорады.

Россия Президенты Владимир Путин «Казанда узачак Киләчәк уеннарына кадәр 100 көн» тантанасында катнашучыларны һәм оештыручыларны видеоэлемтә аша котлады. Ул тантаналы рәвештә Татарстан башкаласында ярышлар башлануга кадәрге көннәргә кире хисапны игълан итте.

Бөтенроссия «Туган тел» форумының пленар утырышында Япония татарлары яздырып җибәргән видеоны күрсәттеләр. Алар киләчәктә дә Япониядә татар телен үстерү эшен дәвам итәчәкләрен ышандырды.

Туган (татар) тел һәм әдәбияты укытучылары ассоциациясе рәисе, Татарстан Республикасы Мәгарифне үстерү институты доценты, филология фәннәре кандидаты Рузилә Фәттахова фикеренчә, туган телне саклауны татар теле укытучысына гына йөкләп калдыру зур хата. Бу хакта ул Бөтенроссия «Туган тел» форумының «Тәрбия. Белем. Тел» пленар утырышында сөйләде.