Новости за 19.11.2023

Россия Дәүләт Думасы депутаты Олег Морозов Зәйдә яшәүче мөмкинлекләре чикләнгән кешеләргә «Зәй офыклары» һәм «Новый Зай» район газеталарын яздырды. Бу хакта «Зәй яңалыклары» сайтында хәбәр ителә.

«Свияжск-Зернопродукт» ҖЧҖ Яшел Үзән районында элеватор төзи. Анда берьюлы 122 мең тонна ашлык саклана ала. Зөя төбәкара мультимодаль логистика үзәге территориясендәге элеватор Россиянең иң зур бөртеклеләр хабы булачак, дип планлаштырыла.

Актаныш районында традициягә әверелгән Сабантуй батыры, РСФСРның спорт остасы, ТАССР чемпионы, Муса Җәлил турниры җиңүчесе Илфат Әнвәров исемендәге төбәкара көрәш ярышы спорт дөньясында популярлаша бара. Быелгы ярышка 132 яшь спортчы көчләрен сынарга килгән. Республикабыз районнарыннан тыш Башкортстанның Илеш районыннан да катнашучылар бар. Бу хакта «Актаныш» сайтында хәбәр ителә.

25 ноябрьдә 11 сәгатьтә Казанның «Мир» кинотеатрында «Милли мультfest» республика балалар кинофестиваленең бүләкләү тантанасы узачак.⁣⁣ Бу хакта Татарстан Мәдәният министрлыгының «ВКонтакте» социаль челтәрендәге сәхифәсендә хәбәр ителә.

Сабир Өметбаев исемендәге Минзәлә татар дәүләт драма театры тамашачыларга яңа премьера тәкъдим итте. 1973 елда режиссер Мулланур Мостафин монда Юныс Әминов әсәре буенча «Гөлҗәннәтнең җәннәте» мелодрамасын куйган иде. Театрга нигез салучы Сабир Өметбаев икесенә дә театр сәнгатенә фатиханы үзе бирде.

Алабугада әнисен үтергәнче кыйнаган 48 яшьлек ир-ат суд каршына басачак. Бу хакта Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итә, дип яза «Татар-информ»

Казанда яшәүчеләрнең яртысыннан артыгы беркайчан да бурычка акча алмый. Эш эзләү буенча SuperJob сервисы үткәргән сораштыру нәтиҗәләре шуны күрсәтә.

Кемерово шәһәрендә «Мөнирә» Җәмигъ мәчетенең 15 еллыгын бәйрәм итү кысаларында, балалар арасында Мөхәммәд пәйгамбәрнең (сәләллаһу галәйһи вәсәллам) тормышы юлы – Сира буенча белемнәрне тикшерү өчен конкурс узды. Бу хакта Россия мөселманнары Диния нәзарәте матбугат хезмәте хәбәр итә.

Курган өлкәсенең Йолдыз авылында янгын вакытында зыян күргән күп балалы Мөхәтнәбиевлар гаиләсе яңа йортка күчте. Яңа торак Россия мөселманнарының дини лидеры мөфти шәех Равил Гайнетдиннең кушуы буенча РФ мөселманнары Диния нәзарәте акчасына төзелгән. Бу хакта Россия Мөфтиләр шурасы матбугат хезмәте хәбәр итә.

Кичә Казанның Совет районында Фучик урамындагы буада әни кеше ике кечкенә баласы белән юка боз астына төшеп китә.

«Беренче канал»да туйларда милли гореф-гадәтләргә багышланган программаның яңа чыгарылышы чыкты. Бу юлы авторлар татар туен «үткәрде». «Татар-информ» шул хакта яза.

Бүген иртәнге сәгать сигездә Балык Бистәсе районы Тегермән Пүчинкәсе авылында өлкән яшьтәге хатын-кызның югалуы турында хәбәр килде.

Кредит акчасы һәм ана (гаилә) капиталыннан файдаланып алынган торакта өлешләрне билгеләү турындагы килешү нигезендә гомуми милек хокукын дәүләт теркәве хәзер банк ризалыгыннан башка гына эшләргә мөмкин. Бу хакта Россия Дәүләт теркәве, кадастр һәм картография федераль хезмәтенең (Росреестр) Татарстан буенча идарәсе матбугат хезмәте хәбәр итә.

Себердә көчле давыл булды. Красноярскида иртәдән бирле көчле җил котыра. Шәһәрнең берничә микрорайоны утсыз калды. Биредә яшәүчеләр шәһәрнең Төньяк, Кояшлы өлешендә һәм шәһәр үзәгендә электр уты булмавы турында хәбәр итә.

Бөгелмәнең Баталов исемендәге дәүләт рус драма театры бинасына мемориаль такта урнаштырылачак. Тантаналы чара 20 ноябрьдә СССРның халык артисты Алексей Баталовның туган көнендә була. 1942-1943 елларда ул бу бинада беренче рольләрен уйный. Бу турыда «Татар-информ» яза.

Самараның «Бердәмлек» газетасында «Яңа ферма яңа эш урыннары тәкъдим итә» дигән язма чыкты.

18 ноябрьдә Уфада «Идел» халыкара башкорт һәм татар җыры фестивале узды. Фестивальдә татар һәм башкорт телләрендә җырлаучы сәнгать югары уку йортлары студентлары һәм аны тәмамлаучылар халык, эстрада, академик һәм автор җыры номинацияләрендә катнаштылар. Бу турыда Бөтендөнья татар конгрессы хәбәр итте.

Нигезсез югары хезмәт хакларын саклап калу ахыр чиктә базарның җимерелүенә китерәчәк. Бу хакта Татарстан Рәисе каршындагы Кадрлар сәясәте мәсьәләләре буенча иҗтимагый совет әгъзасы Галина Маштакова «Татарстан 24» телеканалында «Интервью без галстука» программасында әйтте.

10 декабрьдә Краснодарда «Оста бикә» («Татар кызы») милли татар бәйгесе узачак. Бу хакта «Вконтакте» социаль челтәрендәге «Краснодар татарлары» сәхифәсендә хәбәр ителә.

Россия Гадәттән тыш хәлләр министрлыгының махсус борты Мәскәүгә Россиянең 120 кешесен һәм аларның гаилә әгъзаларын алып кайтты, алар Газа секторыннан эвакуацияләнде. Бу хакта ведомствоның Teлеграм-каналында хәбәр ителә.

Татарстанга «Киләчәк уеннары» трофее килде, беренче тукталыш Иннополис булды. Ярышларның төп призын Түбән Новгородтан алып килгән кортежны сәламләргә Иннополис университеты студентлары белән мэр Руслан Шагалеев та килде. Бу турыда «Татар-информ» яза.

Чаллының Кама балалар медицина үзәгендә җитлекми туган балага әти-әнисе Россия дип исем кушкан. Бу хакта клиниканың матбугат хезмәтендә сөйләделәр.

Бүген, 19 ноябрьдә, Татарстанда антициклон йогынтысында коры һәм салкын һава торышы көтелә. Бу турыда Татарстан Гидрометеорология һәм әйләнә-тирә мохитне күзәтү үзәге хәбәр итә.

Актаныш талантлары «Без-бергә» республика балалар халык иҗаты фестивалендә беренче урын алды. Бу хакта «Актаныш» сайтында хәбәр ителә.

Палестинаның тыныч халкына Түбән Камадан гуманитар ярдәм җибәрелгән. Зур һәм кечкенә тартмаларга яшәү өчен иң кирәкле әйберләр — дару, азык-төлек, гигиена чаралары һәм башкалар тутырылган. Бу хакта «Туган як» сайтында хәбәр ителә.