Новости за 22.11.2023

Бүген Теләченең Олы Мишә урта мәктәбе биләмәсендә Рәзил Газизов истәлегенә мемориаль такта ачу тантанасы узды. Ул хәрби операция барышында һәлак булды. Бу хакта «Теләче-информ» хәбрә итә.

Махсус операциядә катнашучылар газлаштырылган төбәкләрдә яшәсә, аларга йортларга газ кертү өчен субсидия бирергә мөмкиннәр. Бу хакта Россия Президенты Владимир Путинның Россия энергетика атналыгы йомгаклары буенча йөкләмәләре исемлегендә әйтелә.

Татарстан Рәисе Рөстәм Миңнеханов Татарстан Республикасының Мәгълүмати иминлек буенча Иминлек советының ведомствоара комиссиясе составын үзгәртте. Указ Татарстан җитәкчесенең рәсми сайтында чыкты.

Татарстан Министрлар Кабинеты «Безнең йорт – Татарстан» этнофестивален үткәрү тәртибен раслады. Әлеге чара нәтиҗәләре буенча һәр номинациядә бер җиңүче билгеләнәчәк, алар һәрберсе 400 мең сум алачак. Әлеге документ хокукый мәгълүматның рәсми порталында чыкты.

Азәрбайҗанның Баку шәһәрендәге Рус йортында «Татар җыры» концерты булган. Ул Азәрбайҗан Татар яшьләре үзәгенә нигез салынуның 26 еллыгына һәм әлеге оешма белән 20 ел дәвамында Диаз Әхмәтҗанов идарә итүгә багышланган. Бу хакта «АЗЕРТАДЖ» Азәрбайҗан дәүләт мәгълүмат агентлыгы хәбәр итә.

Россиядә еллык инфляция 7,4 процентка кадәр тизләшкән. Бу хакта Дәүләт статистикасы федераль хезмәте мәгълүматлары раслый.

2023 елның ислам дине, татарлар һәм Татарстан белән бәйле төп вакыйгасы өчен тавыш бирү башланды. Иң әһәмиятле чаралар һәм инициативаларны сайлау «Ел татарлары» проекты кысаларында үткәрелә. Бу хакта «Миллиард.Татар» хәбәр итә.

19 ноябрьдә Австралиянең Сидней шәһәрендә Сабан туе бәйрәме узды. Ул Халыклар дуслыгы һәм бердәмлеге тантанасына әверелде, дип яза Бөтендөнья татар конгрессы матбугат хезмәте.

Татарстанда милләтара һәм конфессияара мөнәсәбәтләр мәсьәләләре буенча ведомствоара эш төркеме утырышында мигрантлар темасына фикер алыштылар.

Татарстан китап нәшриятында Татарстанның атказанган сәнгать эшлеклесе, Муса Җәлил һәм Һади Такташ исемендәге әдәби премияләр лауреаты, шагыйрь Рәмис Аймәтнең «Мәңгелек сагыш» дип исемләнгән яңа шигырьләр җыентыгы басылып чыкты.

Иң яхшы балалар әдәби әсәрләренә Роберт Миңнуллин исемендәге әдәби конкурс лауреатлары шагыйрьнең 75 еллыгы уңаеннан оештырылган әдәби-музыкаль кичәдә бүләкләнде. Театральләштерелгән кичә Тукай исемендәге Татар дәүләт филармониясе залында үтә.

Мәскәү Татар мәдәни үзәгенең «Хәзинә» ансамбле Казанда Татарстан Халыклары дуслыгы йортында чыгыш ясаган. Бу хакта Мәскәү «Татар милли-мәдәни автономиясе» төбәк иҗтимагый оешмасы матбугат хезмәте яза.

Россиядә яшәүче халыкларның телләрен саклауга юнәлдерелгән федераль программалар булмау сәбәпле, татарлар күп яши торган җирләрдә татар телен куллану катлауланган. Бу хакта Татарстанда милләтара һәм конфессияара мөнәсәбәтләр мәсьәләләре буенча ведомствоара эш төркеме утырышында ТР мәгариф һәм фән министры урынбасары Алсу Әсәдуллина хәбәр итте.

23 ноябрьдә Екатеринбургта «Нульдән шәҗәрә — ничек шәҗәрә төзергә» чарасы узачак. Теләге булган һәркем шәҗәрә агачы төзү буенча беренче адымнар турында лекциягә һәм шөгыльгә чакырыла. Бу хакта Бөтендөнья татар конгрессы матбугат хезмәте хәбәр итә.

Ульяновск өлкәсендә пассажир поезды һәм маневр локомотивы бәрелешкән. Бу хакта Россия Тикшерү комитетының Транспортта төбәкара тикшерү идарәсе хәбәр итә.

Федерация Советы бер пенсия коэффициентын 133,05 сумга кадәр (элек 129,46 сум иде) арттырырга тәкъдим иткән закон проектын хуплады. Шулай ук картлык буенча иминият пенсиясенә фиксацияләнгән түләү күләме турында закон проекты да хупланды. Аны 8134,88 сум күләмендә билгеләргә тәкъдим иттеләр. Бу хакта РИА Новости яза.

Казан федераль университетының Татар Халык хоры Төньяк Осетиянең (Алания) башкаласы Владикавказда Мария театры филиалында һәм Халыклар Дуслыгы йортында чыгыш ясады.

Бүген «Яшь танкист йорты» балалар-яшүсмерләр мәгариф үзәге базасында узган «Мәрхәмәт – Милосердие» хатын-кызлар-депутатлар берләшмәсенең күчмә утырышында яшьләрне патриотик тәрбияләү мәсьәләләре турында фикер алыштылар. Бу хакта ТР Дәүләт Советы матбугат хезмәте хәбәр итә.

Татарстанның 20 районында яшәүчеләргә чүп җыю, чыгару һәм утильләштерү хезмәтләре өчен 78 млн сумнан артык акча түләнәчәк. Бу хакта «Татэнергосбыт» акционерлык җәмгыятенең торак-коммуналь хезмәтләр өчен исәпләүләр бүлеге башлыгы Владимир Герасимов хәбәр итте. Ул аны Тарифлар буенча дәүләт комитетының каты көнкүреш калдыклар белән эш итү буенча штаб утырышында белдерде.

Федерация Советы бүген узган утырышта 2024 елның 1 октябреннән хәрби пенсияләрне 4,5 процентка арттыру турындагы законны хуплады. Бу хакта РИА Новости хәбәр итә.

2024 ел Россиядә Гаилә елы булачак. Карар гаиләне яклау һәм традицион кыйммәтләрне саклау өлкәсендә дәүләт сәясәтен популярлаштыру өчен кабул ителде, диелә Россия Президенты Владимир Путин указында.

Татар блогеры, журналист Фәгыйлә Шакированың «Кайнана самовары» дип исемләнгән беренче китабы чыкты. Китапта тәкъдим ителгән язмалар тормыш юлында очраган кешеләрнең язмышларына нигезләнеп язылган.

Федерация Советы чәршәмбе көнне узган утырышта 2024 елда хезмәткә түләүнең минималь күләмен 18,5 процентка – 19 242 сумга кадәр күтәрү турындагы законны хуплады. Бу хакта РИА Новости агентлыгы хәбәр итә.

«Батыр» үзәге җитәкчесе Владислав Кузнецов «Татар-информ» агентлыгына биргән интервьюсында Казанда контракт буенча хезмәт итәргә теләүчеләрне бер тәүлек эчендә ничек рәсмиләштерүләре хакында сөйләде. Аның сүзләренчә, элегрәк документлар, анализлар һәм белешмәләр җыю процессы бер ай вакытны алган, чөнки ведомстволар, диспансерлар, хастаханәләр бер-берсеннән ерак урнашкан һәм кандидатларга чиратта озак утырырга туры килгән.

Татарстанда Аракчино – Югары Ослан паром кичүе ноябрь ахырында эшен төгәлли, диелә «ВКонтакте» төркемендә урнаштырылган хәбәрдә.