Санкт-Петербургта Татар милли-мәдәни мохтарияте өчен шәһәр үзәгендә бина биргәннәр
(Казан, 22 декабрь, «Татар-информ»). Быел Санкт-Петербург Хөкүмәте Татар милли-мәдәни автономиясе өчен шәһәр үзәгендә бина бүлеп бирелгән. Татарстан Республикасы Хөкүмәте әлеге бинаны реставрацияләү һәм ремонт эшләрен башкаруда ярдәм итәчәк. Бу турыда Бөтендөнья татар конгрессы хәбәр итте.
Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразиев Санкт-Петербургка эшлекле сәфәр кылды. Ул Татарстан Республикасының Санкт-Петербург һәм Ленинград өлкәсендәге даими вәкиле Ренат Вәлиуллин һәм татар милли-мәдәни мохтарияте рәисе Рәис Яркаев белән бергә бинаны карады. Алар бинаны ремонтлау хакында фикер алыштылар.
Васил Шәйхразиев төзүчеләр белән киңәшмә үткәрде. Ремонт эшләре тиздән башланачак дип көтелә. Әлеге үзәктә эшчәнлек төрле юнәлешләрдә оештырылачак: белем бирү, җыр сәнгате, хореография дәресләре, этнография музее, китапханә һ.б. була Татар мәдәни үзәге әлеге төбәк татарларын үзенә җәлеп итәр дип көтелә.
Татарстан Республикасының Даими вәкиллеге һәм регионның иҗтимагый оешмалары тарафыннан күп кенә мөһим чаралар үткәрелә. «Тукай укулары» һәм «туган тел көннәре», «Җәлил укулары», Гатаула Баязитовны искә алу көне һәм татар мәдәнияте көннәре традициягә әверелде. «Татар кунакханәсе» проекты 2013 елда оештырылды һәм ай саен лекцияләр, әдәби конкурслар, мәдәният эшлеклеләре белән очрашулар, иҗади мастер-класслар үткәрелә.
Татарстан Республикасы көненә багышланган чаралар аеруча зурлап үткәрелә. Шуны да билгеләп үтәргә кирәк, Татарстан Республикасының Даими вәкиллеге быел гына да Татар Автономияле Совет Социалистик Республикасы төзелүнең 100 еллыгын бәйрәм итүгә багышланган җитмештән артык чара үткәргән, диелә бу хәбәрдә.