Жртви во немирите во Узбекистан, вонредна состојба во погодената провинција

Претседателот на Узбекистан, Шавкат Мирзијоев денеска објави дека во немирите во автономната провинција Каракалпакстан, кои траат веќе две ноќи по ред, има загинати меѓу цивили и припадници на полицијата, пренесува АФП.


„За жал, има жртви меѓу цивилите и припадниците на полицијата за време на немирите во автономната провинција Каракалпакстан“, рече Мирзијоев.


Тој не даде детали за бројот на жртвите, ниту за причините за смртта. Во оваа покраина беше воведена вонредна состојба поради антивладините протести.


Кабинетот на узбекистанскиот претседател вчера објави дека Мирзијоев се откажал од плановите да го укине правото на автономната Република Каракалпакстан да се отцепи по масовните протести.



Узбекистан го ограничи пристапот до повеќето социјални медиуми и сервиси за брзи пораки


Демонстрантите се противат на уставните реформи кои, меѓу другото, се однесуваат на статусот на Каракалпакстан. Предложените измени значеа зачувување на автономијата на покраината, но и елиминирање на правото на Каракалпакстан да бара независност од Узбекистан.


Другите предложени уставни реформи ќе и овозможат на Мирзијоев да се кандидира уште два мандати. Објавувањето на уставните измени предизвика улични протести во главниот град на Каракалпакстан, Нукус и други градови.


Неколку часа по соопштението на Мирзијоев, прес-секретарот на претседателот Шерзод Асадов на Телеграм напиша дека Узбекистан воведува едномесечна вонредна состојба во регионот до 2 август.