Türkmenistan diplomlaryny ykrar etjek daşary ýurt ÝOJ-larynyň sanawyny tassyklady
Türkmenistanda diplomlary ykrar ediljek daşary ýurt uniwersitetleriniň täze sanawy tassyklandy, oňa dünýäniň 1500-den gowrak ýokary okuw jaýy girýär diýip, “Türkmenportal” ýurduň Bilim ministrligine salgylanyp habar berýär.
Türkmenistanda diplomlary ykrar ediljek okuw jaýlarynyň doly sanawy Bilim ministrliginiň web sahypasynda çap edilipdir, onuň başyny Angliýada, ABŞ-da ýerleşýän abraýly ÝOJ-lar çekýär.
2023-nji ýyl üçin saýlanan uniwersitetleriň sanawy dünýädäki iň abraýly üç uniwersitetiň («Times Higher Education World University Rankings», «Academic Ranking of World Universities» we «QS World University Rankings») hasabatlaryna esaslanýar diýip, habarda bellenýär.
Türkmen studentleriniň barha kän daşary ýurtlaryň okuw jaýlarynda bilim almaga ýykgyn etmegi Türkmenistanda yglan edilen bilim özgertmeleriniň garaşylýan netijeleri bermezligi, bilimiň hiliniň pes bolmagy bilen bir hatarda korrupsiýanyň derejesiniň ýokary bolmagy, studentleriň ýyl boýy dürli çärelere çekilmegi bilen baglanyşykly hasaplanýar.
Türkmenistandaky ykdysady kynçylyklar, maliýe, manat we daşary ýurt walýutalary bilen bagly çylşyrymly ýagdaýlar ene-atalaryň daşary ýurtlarda okaýan çagalaryna wagtynda pul ibermeklerinde päsgelçilik döredýär. Bu ýagdaýlar türkmen studentleriniň käte gurluşyklarda, kyn işlerde işläp, heläkçilige uçramagyna, başga çylşyrymly ýagdaýlara düşmegine hem alyp gelýär.
Türkmenistanda daşary ýurtlarda alnan diplomlaryň resmi taýdan ykrar edilmegi bilen bagly döredilýändigi aýdylýan emeli kynçylyklar, şeýle-de dünýäniň abraýly okuw jaýlarynda gowy bilim alan zehinli, dogruçyl ýaşlaryň öz ýurtlarynda işe ýerleşmekde, işlemekde çekýän kynçylyklary soňky onýyllyklarda ýüzlerçe beýniniň göc etmegine sebäp boldy diýip, synçylar aýdýar.
Türkmenistanda işe ýerleşmegiň öňünde durýan esasy kynçylygyň korrupsiýa, giň ýaýrandygy aýdylýan parahorlyk bilen baglydygy aýdylýar.