Новости за 21.02.2024

Чаллы шәһәр мэры Наил Мәһдиев хәрби бурычын үтәгәндә күрсәткән батырлыклары өчен Россия Федерациясе Президенты карары нигезендә подполковник Рөстәм Имаметдинов белән рядовой Дмитрий Талапинга «Батырлык» ордены, Россия Саклану министрлыгы боерыгы буенча ефрейторлар Илнар Хәйруллин белән Данат Хамбаловны икенче дәрәҗәдәге «Хәрби батырлык өчен» медале белән бүләкләде. Бу хакта «Шәһри Чаллы» хәбәр итә.

Татарстан Рәисе Рөстәм Миңнеханов Беларусь Президенты Александр Лукашенкога «Дуслык» орденын тапшырды. Бу хакта БЕЛТА хәбәр итә.

«Казан Экспо» да «Киләчәк уеннары» халыкара мультиспорт турнирын ачу тантанасы Россия гимнын башкару белән ачылды. Беренче секундтан ук бөтен зал торып басты. Алар арасында Россия Президенты Владимир Путин һәм башка илләр лидерлары да бар.

Габдулла Тукай әдәби музеенда «Балалар дөньясы 100 ел элек» күргәзмәсе ачылышында КФУның әдәбият кафедрасы профессоры, галим Фоат Галимуллин дөнья күләмендә танылган язучы Чыңгыз Айтматовның татар теле турында әйткән сүзләрен искә алды.

Бүген Казанның «Ак Барс» хоккей командасы Ярославль шәһәренең «Локомотив»ын 2:4 исәбе белән оттырды. Уен Казанда «Спорт сарае»нда узды.

Филология һәм мәдәниятара багланышлар институтының Габдулла Тукай исемендәге Милли мәдәният һәм мәгариф Югары мәктәбендә «Төрки лингвокультурология: проблемалар һәм перспективалар» дип исемләнгән XV Халыкара фәнни-гамәли конференция узды. Ачылыш тантанасында Татмедианың телевидение һәм радиотапшырулар департаменты җитәкчесе Алмаз Миргаязов милли җанлы һәм туган телен белүче, хөрмәт итүче кешеләрне үстерергә кирәклеген әйтте.

26 февральдә 19:00 сәгатьтә Татар китабы йортында «Яшьлек моңнары» дип исемләнгән концерт узачак. Татарстан мәдәният министрлыгы белән берлектә, Татарстанның мәдәни ресурс үзәге базасында, «ЯшьЛайн» дип исемләнгән проект үз эшчәнлеген алып бара. Автор һәм алып баручы – Гөлназ Рәшитова. Әлеге концертта проектта катнашкан талантлы яшьләр бер сәхнәдә җыелачак.

Россия Президенты Владимир Путин «Казан Экспо» аренасында «Киләчәк уеннары»н ачу тантанасында әлеге чараны Россиянең дөньякүләм спорт гаиләсенә бүләге, дип атады.

Россия Президенты Владимир Путин Үзбәкстан коллегасы Шәүкәт Мирзиеевка «Киләчәк уеннары» халыкара мультиспорт турнирын ачуда катнашканы өчен рәхмәт белдерде. Тантана бүген Казанда уза. Трансляция ТАСС телеграм-каналында узды.

Татарстан Рәисе Рөстәм Миңнеханов Кыргызстан Президенты Садыйр Җаппаров белән очрашты. Очрашу Казан Кремлендә узды, дип хәбәр итә республика җитәкчесе матбугат хезмәте.

Россия Президенты Владимир Путин Казанда рәсми рәвештә старт алган тарихта беренче «Киләчәк уеннары» ачылышында чыгыш ясады.

Үзбәкстан Президенты Шәүкәт Мирзиеев 2026 елда «Киләчәк уеннары»н кабул итәргә әзер булуын белдерде. Бу хакта ул уеннарны ачу тантанасында хәбәр итте.

Казахстан Президенты Касыйм-Җомарт Токаев Россиядән коллегасы Владимир Путин белән Казанда очрашуда алдагы «Киләчәк уеннары»н үз илендә уздырырга тәкъдим итте. Исегезгә төшерәбез, бүген Татарстан башкаласында беренче халыкара мультиспорт турнирын ачу тантанасы уза. Трансляция ТАСС телеграм-каналында узды.

Олимпия чемпионнары Алинә Заһитова һәм Артур Далалоян «Киләчәк уеннары» кысаларында «Игелек адымнары» хәйрия акциясендә катнашты. Исегезгә төшерәбез, чара «Казан Экспо»да узды, анда 19.00 сәгатьтән турнирның тантаналы ачылышы бара.

Россия Президенты Владимир Путин «Казан Экспо»да берничә минут элек башланган «Киләчәк уеннары»н ачу тантанасына килде.

«Казан Экспо» да спорт, киберспорт, фән һәм технологияләрне берләштергән «Киләчәк уеннары» масштаблы спорт чарасын ачу тантанасы башланды.

Россия Президенты Владимир Путин Казанда «Киләчәк уеннары» халыкара мультиспорт турниры ачылышына килгән коллегасы — Кыргызстан Президенты Садыйр Җаппаров белән очрашты. Бу хакта Кремль сайтында хәбәр ителә.

Бүген Казан кооператив институтының Дәрдемәнд исемендәге Татар мәдәнияте үзәгендә «Туган телем» V Халыкара шигырь сөйләүчеләр конкурсына йомгак ясалды. Ул ХХ гасыр башының татар шагыйре, сәүдәгәр, меценат, алтын приисклары хуҗасы булган Закир Рәмиев (Дәрдемәнд) истәлегенә оештырылды. Быел Дәрдемәнд тууына 165 ел.

Татарстан Рәисе Рөстәм Миңнеханов Сербия Республикасы (Босния һәм Герцеговина) Президенты Милорад Додик белән очрашты. Ул республикага «Киләчәк уеннары» халыкара мультиспорт турниры чараларында катнашу һәм берничә фәнни һәм мәгариф учреждениеләрендә, тарихи һәм архитектура һәйкәлләрендә булу өчен килде. Бу хакта республика җитәкчесе матбугат хезмәте хәбәр итә.

Габдулла Тукай әдәби музеенда «Балалар дөньясы 100 ел элек» күргәзмәсе ачылышында КФУның әдәбият кафедрасы профессоры, галим Фоат Галимуллин җәмәгатьчелекне Халыкара туган тел көне уңаеннан котлады.

Россия лидеры Владимир Путин Серб Республикасы Президенты Милорад Додикка Россия белән мөнәсәбәтләрне саклаганы, шулай ук Мәскәү инициативаларында, шул исәптән «Үлемсез полк» йөрешләрендә катнашканы өчен рәхмәт белдерде.

Татарстан гаиләләре дәүләттән төрле ярдәм чаралары ала. Алар арасында ана (гаилә) капиталы, бердәм пособие, йөклелек һәм бала табу буенча пособие, бала туганда яки уллыкка алганда бер тапкыр бирелә торган түләүләр бар. Бу хакта бүген Төбәк белән идарә итү үзәге оештырган туры эфир вакытында Россия Социаль фондының Татарстандагы бүлеге җитәкчесе Эдуард Вафин хәбәр итте.

Татар теленең электрон сүзлекләр Фондына 53 сүзлек урнаштырылган.

Бүген Бәшир Рәмиев исемендәге IT-паркта «Киләчәк уеннары» кысаларында «Танклар дөньясы» уены буенча ярышлар башланды. Виртуаль уенны карарга төрле яшьтәге тамашачы килгән. Татарстан Республикасының Архив эше буенча дәүләт комитеты хезмәткәрләре фикеренчә, ярышлар яшьләрне аңларга ярдәм итә.

Габдулла Тукай исемендәге әдәби музейда «Балалар дөньясы 100 ел элек» күргәзмәсе эшли башлады. Анда Татарстан Милли музее фондларыннан XIX гасыр ахыры – ХХ гасыр башы әйберләре тәкъдим ителә.