Суыклар аркасында Татарстанда электр куллануның тарихи максимумы теркәлгән
Татарстан Республикасының энергия системасында электр егәрлеген куллануның яңа тарихи максимумы билгеләнде. Ике тәүлек эчендә аның күрсәткече биш тапкыр арткан һәм 4947 МВтка җиткән.
Бер тәүлек эчендә генә, 2023 елның 9 гыйнварында, тышкы һава температурасы уртача тәүлеклек -30,1 градус булганда тарихи максимумның өч яңа күрсәткече теркәлгән. «Бердәм энергетика системасының система операторы» җәмгыятенең (Россия Бердәм энергия системасы (ЕЭС) диспетчеры) оператив мәгълүматлары шуны күрсәтә.
9 гыйнвар көнне 10:00 сәгатьтә максимум 4874 МВт, 16:00 – 4883 МВт, 17: 00 – 4896 МВт тәшкил итте, бу узган елның 6 декабрендәге күрсәткечтән артып китә. Ул вакытта һава торышы сизелерлек җылы булган, тышкы һаваның тәүлеклек температурасы -15,6 градуста максимум 4821 МВт тәшкил иткән (бу 2021 елның 24 декабрендә ирешелгән элеккеге рекордның 54 МВтына күбрәк иде). Шулай итеп, яңа максимумнар декабрь күрсәткеченнән 1,1 процентка (яки 53 МВтка), 1,3 (62 МВт) һәм 1,5 процентка (75 МВт) артты.
10 гыйнварда көн дәвамында тышкы һава температурасы уртача -26,1 градус булганда тагын ике яңа рекорд куелды: 16.00 сәгатьтә – 4916 МВт, 17.00 – 4947 МВт тәшкил итте, бу 9 гыйнварда билгеләнгән күрсәткечтән 0,4 (яки 20 МВтка) һәм 1 процентка (яки 51 МВтка) артып китә.
Мондый рекордларның төп сәбәбе – һава торышы факторы: уртача тышкы һава температурасы нормадан түбән булды. «Электр энергиясе югары дәрәҗәдә кулланылуы шартларында Татарстан Республикасы энергосистемасы тотрыклы эшләде», – диде Татарстан Республикасы энергосистемасының төбәк диспетчер идарәсе директоры Андрей Большаков.
Аның сүзләренчә, 2023 елгы кышкы йөкләнешне узуга әзерлек вакытында «Системалы оператор» белгечләре иң уңайлы температура шартлары өчен исәп-хисап ясаган. Шуңа күрә Россиянең Бердәм энергетика системасы диспетчеры кышкы максималь йөкләнешне тотрыклы узу өчен кирәк булган күләмдә генерацияләү җиһазлары резервын алдан ук формалаштырган.
Исегезгә төшерәбез, декабрьнең тарихи рекорды Татарстан төбәк диспетчер идарәсендә «нефть чыгару һәм нефть эшкәртү предприятиеләре тарафыннан куллануның артуы» белән аңлатылды. Татарстанның энергия системасында генерация объектларының электр егәрлеге 8588,63 МВт тәшкил итә. Шулай итеп, республикада резервлар бар һәм шактый нык.