Եթե ցանկանում եք փոխել ձեր կյանքը, դրա համար կա 4 ճանապարհ. Բրայան Թրեյսիի հաջողության բանաձևը (տեսանյութ)
Եթե դուք ցանկանում եք փոխել ձեր կյանքը, դրա համար կա չորս ճանապարհ. հաջողության և բիզնեսի զարգացման աշխարհահռչակ փորձագետ Բրայան Թրեյսին այսօր՝ հոկտեմբերի 28-ին, Երևանում հանդես եկավ սեմինարով` ներկայացնելով հաջողության հասնելու իր բանաձևը։
Բրայան Թրեյսիի խոսքով՝ առաջին ճանապարհը, որի միջոցով մարդը կարող է փոխել իր կյանքը, որոշակի բաներն ավելի շատ անելն է, որոնք ավելի լավ արդյունք են տալիս։ Իսկ երկրորդը՝ հակառակը, պետք է այն բաներն ավելի քիչ անել, որոնք վատ արդյունք են տալիս։
«Երրորդ ճանապարհը, որով դուք կարող եք փոխել ձեր կյանքը, բոլորովին նոր մի բան անել սկսելն է, և այստեղ է, որ հիմնականում տեղի են ունենում առաջընթացները, երբ դուք սկսում եք անել մի բան, որը նախկինում չեք արել: Ամեն դեպքում, սա շատ դժվար պահ է, քանի որ հաջողությունը երկու թշնամի ունի, դրանցից մեկը այսպես կոչված «կոմֆորտ զոնան» է, մարդիկ գտնվում են այդ կոմֆորտ զոնայում և որևէ բան փոխելը նրանց նյարդայնացնում է, հետևաբար նրանք շարունակում են մնալ այդ գոտում»,- նշում է փորձագետը։
Չորրորդ ճանապարհն էլ, ըստ նրա՝ որոշակի բաներ ընդհանրապես դադարել անելն է:
Բրայան Թրեյսիի երկար տարիների ուսումնասիրությունները ապացուցում են, որ հաջողության հիմնական բանալիները հստակությունն է և կենտրոնանալու կարողությունը։ Առաջին քայլն է՝ ինչպես որոշել և հասնել նպատակին: Նա համոզված է՝ եթե մարդն ունի հստակ նպատակ, ապա հաջողություն կունենա:
«Ամեն մարդ ունի ենթագիտակցություն, որը մեխանիկական վերամշակող համակարգիչ է: Ձեր ուղեղը և դուք ունեք գերգիտակցություն, որը ձեր կյանք է գրավում այն ամենը, ինչ ձեզ պետք է ձեր նպատակին հասնելու համար, եթե ձեր նպատակները հստակ են: Եվ եթե ձեր նպատակներն իսկապես հստակ են, դուք էներգիա եք ուղարկում տիեզերք, ինչի շնորհիվ ձեր կյանք եք գրավում մարդկանց, գաղափարներ, գրքեր և սեմինարներ, որոնք ձեզ գաղափարներ են տալիս, որոնք էլ ձեր կյանքն ընդմիշտ փոխելու են: Բայց ամեն ինչ սկսվում է նպատակից»,- նշեց Բրայան Թրեյսին:
Ըստ նրա՝ աշխարհում մարդկանց 20 տոկոսը աշխարհի եկամուտների 80 տոկոսն է վաստակում ՝ ցանկացած հասարակությունում, ցանկացած ոլորտում: Եթե մարդը ցանկանում է լինել այդ «թոփ 20 տոկոսում», դրա համար պետք է որոշում կայացնի:
«Կյանքում հաջողության հասնելու ճանապարհներից մեկն էլ մտքերն ու նպատակները գրառելն է. դրանք ենթագիտակցության մաս են դառնում և սկսում է աշխատել օրը 24 ժամ։ Երբ գրանցում ես նպատակներդ, դրանք իրականանում են, գուցե ոչ անմիջապես, գուցե մի քանի ամսից, մեկ տարուց կամ տարիներ անց: Համոզվելու համար` այս միջոցը կօգնի, թե ոչ, պետք է փորձել»,- ընդգծեց նա:
Լեգենդար փորձագետը Հայաստան է ժամանել skill.am հարթակի հատուկ հրավերով՝ Աշխարհի լավագույն բանախոսները Հայաստանում բացառիկ նախագծի շրջանակում որպես առաջին խոսնակ: Նա Երևանում ներկայացրեց իր լավագույն ծրագրերից մեկը՝ «Առաջխաղացման ռազմավարությունը», որը նպատակների ճիշտ սահմանման, ներքին խոչընդոտների հաղթահարման, ներքին կարողությունների բացահայտման և բիզնեսում ու կյանքում առաջխաղացում ունենալու մասին է:
Կանադական ծագումով ամերիկացի Բրայան Թրեյսին հաջողության և բիզնեսի զարգացման աշխարհահռչակ փորձագետ է: Նա ընդգրկված է Ամերիկայի, Եվրոպայի և Ասիայի լավագույն 10 ամենապահանջված բիզնես թրեյներների ցանկում: Բ. Թրեյսին խորհրդատվություն է տրամադրել ԱՄՆ-ում, Կանադայում ու աշխարհի ավելի քան 70 երկրներում գործող 1000 ընկերությունների։ Նա աշխատում է բազմամիլիարդանոց շրջանառություն ունեցող ընկերությունների հետ: Նրա սեմինարներին յուրաքանչյուր տարի մասնակցում են ավելի քան 250,000 մարդ աշխարհի տարբեր երկրներից:
Բրայան Թրեյսին 30 տարուց ավելի ուսումնասիրություններ է իրականացրել, աշխատություններ է գրել և ելույթներ է ունեցել տնտեսագիտության, բիզնեսի, պատմության, փիլիսոփայության և հոգեբանության ոլորտներում: Նրա 70-ից ավելի գրքերը դարձել են բեսթսելլերներ և թարգմանվել են տասնյակ լեզուներով։
Մանրամասները՝ տեսանյութում: