Москвада "Немцов маршына" миңдеген адам катышты
Орусияда оппозициячыл саясатчы, маркум Борис Немцовду эскеришти.
Кремлдин сынчысы Москванын чок ортосунда атып өлтүрүлгөн күндүн үч жылдыгын утурлаган акциялар Орусиянын бир катар шаарларында өтүп, борбордо ага миңдеген адам катышты.
Москвадагы демонстранттардын эң чоң тобу көч башында “Жаза сөзсүз болот!", "Биз унутпайбыз, биз кечирбейбиз!” деген ураанды көтөрүп жүрүштү. Маркум Немцовду эскерген көчө жүрүштөрү, жыйындары башка бир катар шаарларда да өткөрүлдү.
- Адамдардын былтыркыдан көп чыкканы мен үчүн да күтүүсүз болду. Бул, албетте, шыктандырат. Үч жыл өткөнүнө карабай адамдар жыйналууда, Немцовду өлтүрүүнү уюштургандарды жазалоо талабы экинчи планга кетип калган жок, - деди оппозициячыл саясатчы Илья Яшин “Азаттык” радиосуна.
Президент Владимир Путиндин сынчысы Борис Немцов 2015-жылдын 27-февралында Москванын Кремлге жакын жайгашкан көпүрөсүндө атып өлтүрүлгөн эле.
Орусия соту Немцовдун өлтүрүлүшү үчүн теги боюнча чеченстандык беш жигитти айыптап, аларды былтыр июлда узак мөөнөткө түрмөгө кескен. Бирок маркум саясатчынын жакындары менен кызматташтары аны өлтүрүү буйругу жогору жактан берилген деген ишенимде. Алар ошол буйрук берген адам же адамдар аныкталып, жазаланмайынча адилеттик орнобойт деп эсептешет. (UE)