Ошто көчөдө жарамазан айткан балдардын ата-энелерине айыпка жыгылды
Ош шаардык милициясы "Кароосуз калгандар" деген аталыштагы ыкчам профилактикалык иш-чараларды жүргүзүп, түнкүсүн өз алдынча жүргөн 116 өспүрүм аныкталганын кабарлады.
Алардын арасында коомдук жайларда, көчөдө жарамазан айтып жүргөн балдардын ата-энелерине Укук бузуулар кодексинин эки беренеси боюнча (74-102) айып салынды. Бул тууралуу Ош шаардык Ички иштер башкармалыгынын басма сөз кызматы кабарлады.
Маалыматка караганда, балдардын реабилитациялык борборуна 53 өспүрүм жеткирилсе, 14 бала ата-энесине өткөрүлүп берилди.
"Ош шаарынын аймагында Орозо айынын келиши менен кайыр сураган жана жарамазанды шылтоо кылып, тилемчилик жасаган жарандар, балдар кескин көбөйүп кетет. Айрым замандаштарыбыз бул айдагы адамдардын кайрымдуулукка жасаган аракеттеринен пайдаланып, акча алуунун жолуна айландырып келет. Өзгөчө ата-энелери тараптан тиешелүү көзөмөлү жок балдар кечкисин жана түнкүсүн коомдук тамактануучу жайларга баш багып, жаразаманды шылтоолоп кайыр сураганга өтүп алышты", - деп жазылган милициянын маалыматында.
Шаардык милиция ушундай багыттагы профилактикалык иш- чаралар уланып жатканын билдирүүдө. Ата-энелерди балдарды көзөмөлгө алууга, жарамазан айтып коомдук жайларда акча суроосуна, жол кыймылына тоскоол болушуна жол бербөөгө чакырды.
Кыргызстанда Орозо айы быйыл 23-мартта башталды. (КЕ)