Жаңы-Өзөн: мунайчылардын талабы аткарыла элек
14-апрелде Казакстандын борбору Астанадан Мангыстау облусуна кайтып барган мунайчылар Жаңы-Өзөндөгү "Өзенмунайгаз" ишканасынын алдында акциясын улантышты.
Жүздөгөн митингчилер талаптары аткарылмайынча тарабай турганын айтышты.
"Астанадан аман-эсен үйгө кайттык. Конкреттүү чечим кабыл алына элек. Калган жигиттер Астанадан келгенче, чечим кабыл алынганга чейин "Өзенмунайгаздын" имаратынын алдында турабыз", - деди мунайчылардын бири.
Бир күн мурун алар Астанадан Маңгыстауга кайтып баратканда темир жол станцияларынын биринен ушул эле талап менен видеокайрылуу жасашкан эле.
10-апрелде "Берали Маңгыстау" компаниясынын мурдагы 82 кызматкери башкалаага келип, Энергетика министрлигинин алдына чогулган. Алар аткаминерлерге жана "КазМунайГаз" компаниясынын өкүлдөрүнө суроолору бар экенин айткан. Бирок ал күнү эч ким жолуккан жок. Мунайчылар сыртта түнөп калган.
11-апрелдин кечинде Астананын полициясы мангыстаулук жумушчулардын баарын күч менен кармап кеткен. Эртеси алар бошотулуп, поезд менен Маңгыстауга жөнөтүлгөн.
"КазМунайГаз" менен сүйлөшүүлөрдү жүргүзүү үчүн 10 мунайчы Астанада калганы маалымдалган.
Талаптарын күткөн мунайчылар
Бейшембиде сүйлөшүүлөр башталганы менен жыйындын жыйынтыгы тууралуу маалымат айтыла элек.
Cүйлөшүүлөрдү күткөн мунайчылар аларга протоколдун берилбегенине нааразы болушту. "КазМунайГаздын" өкүлү Бакдаулет Төлөгөнов "протокол аларга берилет" деп, бирок качан берилерин тактаган жок.
14-апрелде "КазМунайГаз" компаниясы мунайчылар менен сүйлөшүүлөрдүн жүрүшү тууралуу маалымат таратты.
Анда ""БерАли Мангыстау" компаниясынын мурдагы кызматкерлери "Өзөнмунайгазга" жумушка орноштурууну талап кылышкан. Бул талапты аткаруу мүмкүн эмес, анткени жумушка 9 миң адам кезекте турат" деп айтылат.
Ошол эле учурда митингчилер подрядчы компаниялар менен узак мөөнөттүү келишим түзүүнү талап кылышкан. "КазМунайГаз" келишимди "3+2" схемасы боюнча иштеп чыгууга даяр экенин билдирди (үч жылдык келишим, ага кошумча 2 жылга узартылышы мүмкүн). Муну менен казак компаниясы эмгекти коргоо жана уюштуруу, бирдиктүү тарифтик-квалификациялык аныктаманы колдонуу жана тендердик жол-жоболор боюнча көз карандысыз комиссия түзө баштаарын билдирди.
"Эки жылдан бери бир эле кассета ойноп жатат"
Деген менен жумушчулар бирдиктүү чечимге келе албай, алданып калганын айтышууда. "КазМунайГаздын" өкүлдөрү менен жолугушууда мунайчылардын бири 11-апрелде камакка алуу учурунда аларды "спецназдын ур-тепкисине калганын" айткан.
"Поездде кетип бара жаткан жигиттердин бири кан сийип жатат, бирөөнүн бөйрөгү ооруп, дагы бирөөнүн көзү көгала. Эки жылдан бери бир кассета эле ойноп атат. Биздин талаптар боюнча эч кандай өзгөрүү жок. Жетекчилер менен жолугабыз дешти, бирок алардын орун басарлары гана келди", - дейт видеодо сүйлөгөндөр.
Астанада калган жаңыөзөндүк 10 мунайчынын бири Кайрат Космаганбет да үч күн мурун аларды атайын күчтөр сабап салышканын "Азаттыктын" казак кызматына айтты.
"Атайын ыкчам аракет отряды (СОБР) келгенде уруп-сабоо болду. Ал эми милиция бөлүмүнө баргандан кийин андай кысым болгон жок. Ошол учурда атайын күчтөрдүн аракетинен жабыркагандар болгон. Январдагыдай эл мындан да толкуп, башаламандыкка барбасын деген ой менен бир пикирге келип, биз менен кошо келген элди айылга жөнөтүп, өз салымыбызды коштук. Жетекчилер талаптарыңарды аткарабыз дегенден кийин элден суранып айылга жөнөттүк", - дейт сүйлөшүүлөрдү жүргүзүп жаткан мунайчылардын бири.
Ички иштер министрлигинин басма сөз кызматынын өкүлү Мендолла Шамуратов "мунайчыларды кармоо учурунда ур-токмокко алынган" деген маалыматты четке какты.