Суданда Европа Биримдигинин элчисине кол салуу болду
Судандын Хартум шаарында Европа Биримдигинин элчиси Эйдан О'Харага кол салуу болду. Бул тууралуу аталган уюмдун тышкы саясатынын жетекчиси Жозеп Боррель Твиттердеги баракчасына жазды. Анда "Вена конвенциясы (дипломатиялык өкүлчүлүктөрдүн макамы тууралуу жобо) одоно бузулду. Эл аралык нормаларга ылайык, дипломатиялык миссиялардын жана алардын кызматкерлеринин коопсуздугун камсыздлоо Судан бийлигинин биринчи милдети" деп белгиледи. Ал кол салуунун чоо-жайын тактаган жок, бирок элчиде баары жайында экенин билдирди.
Суданда армия менен “Ыкчам колдоо күчтөрү" тобунун ортосундагы куралдуу кармаш төрт күндөн бери токтой элек. Бириккен Улуттар Уюмунун (БУУ) Судандагы өкүлү Волкер Пертестин ырасташынча, жаңжалда бер дегенде 185тей адам мерт болуп, дагы 1800дөн көп киши жараат алды.
Мунун алдында БУУга караштуу Дүйнөлүк азык-түлүк программасынын үч кызматкери каза таап, экөө жараат алганы белгилүү болгон. Мындан улам бул уюм бул өлкөдө гуманитардык ишин убактылуу токтотуп жатканын билдирген.
Судандын Хартум баштаган бир катар шаарларында армиянын кол башчысы, генерал Абдел Фаттах Аль-Бурхандын аскерлери менен Мохаммед Хамдан Дагало жетектеген “Ыкчам колдоо күчтөрү" тобунун ортосунда куралдуу кагылышуу болууда. Соңку кармаштарга кезинде бири-бирин өнөктөш санаган эки генералдын бийлик үчүн күрөшү себеп болду.
Аль-Бурхан менен Дагало 2021-жылдын октябрь айында Судандагы аскердик төңкөрүштү чогуу уюштуруп, өлкөдө демократиялык башкарууга өтүү аракети үзгүлтүккө учураган.
Жекшемби күнү алар жарадарларды жана жайкын тургундарды эвакуациялоо үчүн кыска мөөнөттө ок атышпоону макулдашкан.