ÝHHG synçylary Türkmenistanda geçiriljek saýlawlary synlamaga geldi

15-nji martda Türkmenistanyň merkezi saýlaw toparynyň binasynda Ýewropada Howpsuzlyk we Hyzmatdaşlyk Guramasynyň Demokratik institutlar hem-de adam hukuklary boýunça edarasynyň toparynyň Aşgabada sapara gelen agzalary bilen duşuşyk geçirildi.

Türkmen mediasy ÝHHG-niň synçylar toparynyň Mejlisiň deputatlarynyň, welaýat, etrap we şäher halk maslahatlarynyň, şeýle-de Geňeşleriň agzalarynyň saýlawlaryna görülýän taýýarlyga we olaryň geçirilişine baha bermek üçin gelendigini habar berýär.

Myhmanlar Merkezi saýlaw topary tarapyndan bellenilen meýilnama, saýlaw okruglarynyň we uçastoklarynyň sanawy, resminamalaryň nusgalary hem-de umuman ýerlerde geçirilen işler bilen tanyşdyryldy.

“Öz ygtyýarlyklarynyň çäklerinde olara saýlawlaryň öň ýanyndaky çäreleriň barşyny bökdençsiz synlamaga hem-de gönüden-göni ses berilýän güni Aşgabatda we welaýatlarda saýlaw uçastoklaryna baryp görmäge mümkinçilik dörediler" diýip, habarda aýdylýar.

Duşuşygyň barşynda ÝHHG-niň toparynyň agzalaryna degişli şahadatnamalar gowşuryldy.

Türkmenistanda şu wagta çenli abraýly halkara guramalary tarapyndan azat we adalatly diýlip ykrar edilen saýlaw geçirilmedi.