Eýran Hijab düzgünini bozýanlaryň mekdebe goýberilmejekdigini aýdýar
Eýran häkimiýetleriniň baş örtüsini düzüw geýmezlikde aýyplanyp saklanan gyzyň tussaglykda ölmeginden soň guralan köpçülikleýin protestler sebäpli düzgünleri berkitmegi dowam etdirmeginiň arasynda, Bilim ministrligi beýanat çap edip, ýurduň hökmany geýim-eşik düzgünlerini berjaý etmeýän, şol sanda başlaryny örtmeýän okuwçylara mundan beýläk mekdeplerde we uniwersitetlerde bilim hyzmatlarynyň berilmejekdigini aýtdy.
3-nji aprelde, pars Täze ýylyndan soň okuwlaryň gaýtadan başlanmagy bilen, ministrlik hökmany hijab düzgünini berjaý etmedik aýal-gyzlaryň klasa goýberilmejekdigini aýtdy.
Eýranyň Hijab we Päklik kanuny aýal-gyzlaryň 9 ýaşdan başlap köpçülikde başlaryny örtmegini talap edýär. Ýurtdaky raýat boýun egmezlik hereketleriniň güýçlenmegi netijesinde, başlaryny örtmän köpçülige çykýan aýal-gyzlaryň köpelmegi häkimiýetleri barha kän ynjalykdan gaçyrýana meňzeýär.
Resmiler soňky hepdelerde aýal-gyzlara hijap kanunyna hormat goýmalydygyny duýduryp, düzgün bozýanlaryň jezalandyryljakdygyny aýtdylar.
Şeýle-de, eýeleriniň ýa-da ýolbaşçylarynyň yslam kanunlaryny we hijap düzgünlerini berjaý etmezligi sebäpli, häkimiýetler kärhanalary, restoranlary, kafeleri we käbir ýagdaýlarda dermanhanalary hem ýapdylar.