Новости за 09.09.2022

«ЧИРМЕШӘНАГРО» районда 1100 гектарда уҗым бодае чәчүне узган атнада ук төгәлләде. «Тепсуркаев В.Ә.» хуҗалыгында 940 гектар мәйданда, «Әккәрәй»дә - 600, «Сөлчә»дә – 500 гектар мәйданда чәчү башкарылган. Бу хакта «Безнең Чирмешән» газетасы яза. 

10 сентябрьдә Самара өлкәсе Камышлы районының Яңа Ярмәк авылы зиратында өмә үткәреләчәк. Әлеге өмәдә катнашырга теләүчеләрнең барысын да иртәнге сәгать 9:00га чакыралар. Бу хакта «Самара татарлары» сайтында хәбәр ителә. 

Иртәгә, 10 сентябрь көнне Татарстанда болытлы һава көтелә, яңгыр явачак һәм җил булачак. Бу хакта республиканың Гидрометеорология үзәге хәбәр итә.

Россия Транспорт министрлыгы юл хәрәкәте кагыйдәләренә төзәтмәләр кертү проекты тәкъдим итте. Алар шәхси мобильлек чараларын куллануны билгели. Проектта паркларда электросамокатларда, сегвейларда, монотәгәрмәчләрдә йөрүне тыю, шулай ук бу мобиль транспортларның машиналар йөри торган юлда хәрәкәтен чикләү тәкъдим ителә. Бу хакта «Российская газета» хәбәр итә.

12 сентябрьдә Татарстанда медицина хезмәте күрсәтү һәм көзге чорда халыкны дарулар белән тәэмин итү буенча кайнар элемтә эшләячәк. Халык сорауларына Татарстан Сәламәтлек саклау министрлыгы белгечләре җавап бирә.

2022 елның беренче яртыеллыгында Татарстанда ботулизм белән 65 кеше авырган, шуның алты очрагы үлемгә китергән (9,2 процент). Бу хакта Россия Кулланучылар хокукларын яклау һәм кеше иминлеге өлкәсендә күзәтчелек хезмәтенең Татарстан буенча идарәсе хәбәр итә.

11 сентябрьдә «Апуш» балалар театр студиясе кастинг оештыра. Сайлап алу турында татарча белүче 9-15 яшьлек мәктәп укучылары катнаша ала. Сайлап алу турыннан узган укучылар «Чулпан» мәдәният үзәгендә ачылачак студиядә бушлай шөгыльләнә ала. Бу хакта Казан шәһәре мэриясе хәбәр итә.

3 октябрьдә 19:00 сәгатьтә Санкт-Петербургның А.А. Брянцев исемендәге Яшь тамашачы театрында Татарстанның Буа театры «Бәхеткә юл кайдан?» мелодрамасын күрсәтәчәк. Бу хакта Татарстан Республикасының Санкт-Петербург шәһәрендәге һәм Ленинград өлкәсендәге Даими вәкиллеге хәбәр итә.

Октябрь аенда Казан мэриясе хезмәт күрсәтү өлкәсе – кунакханә бизнесы, җәмәгать туклануы, сәүдә оешмалары һ.б. хезмәткәрләре өчен бушлай татар теле курслары уздырачак.

9 сентябрьдә Уфада СССРның халык артисткасы, Салават Юлаев исемендәге Дәүләт премиясе лауреаты, Уфа шәһәренең мактаулы гражданины, З. Исмәгыйлев исемендәге Уфа дәүләт сәнгать институты профессоры Гөлли Мөбәрәковага истәлек тактасы ачылды. Бу хакта «Башинформ» агентлыгы хәбәр итә.

«Башкортстан» киностудиясе Татарстанның «Татаркино» оешмасы белән хезмәттәшлекне ныгытырга ниятли. Хәзер республикалар уртак эш турында сөйләшүләр алып бара. Бу хакта Казан кинофестивале йомгаклары буенча матбугат конференциясендә А. Абдразаков исемендәге «Башкортстан» киностудиясе директоры Юнир Әминев әйтте.

Россия Мәгариф министрлыгы 2023-2024 уку елларында югары уку йортларына керү өчен төп фәннәрдән Бердәм дәүләт имтиханының минималь балларын раслады. Бу хакта РИА Новости яза.

Черкесск шәһәрендә Җәмигъ мәчетенең тантаналы ачылышы быел – Карачай-Черкес республикасының 100 еллыгында булачак. Бу хакта республика җитәкчесе Рашид Темрезов хәбәр итте.

Татарстанда бөер синдромы белән гемморагияле бизгәк, икенче төрле, тычкан бизгәге белән авыру күтәрелеше көзен һәм язын күзәтелә. Россия Кулланучылар хокукларын яклау һәм кеше иминлеге өлкәсендә күзәтчелек хезмәтенең Татарстан буенча идарәсе тычкан бизгәге аеруча күп булган районнарны билгеләгән.

Әфганстанда авыл провинцияләре командалары арасында волейбол буенча чемпионат узды. Ярышларда иң көчле 10 команда катнашты. Беренче урынны Саманган провинциясе командасы яулаган. Әлеге команда «Нур аль-Мударис (Тапайе Татарха) мәдрәсәсе шәкертләреннән һәм мөгаллимнәреннән төзелгән. Бу хакта «Татар-информ»га Әфганстан Татарлары советы башлыгы Забихулло Надери Татар хәбәр итте.