Январда Өзбекстан 1,18 миллиард долларга алтын сатты
Быйыл январда Өзбекстандын тышкы соода жүгүртүүсү былтыркы ушул мезгилге салыштырганда 42 % же бир жарым млрд. долларга өсүп, 5,04 млрд. долларды түздү.
Бул тууралуу өлкөнүн Cтатистика агенттигинин докладында айтылат. Маалыматка ылайык, экспорт 45,1%, импорт 39,1 % өстү. Тышкы сооданын таңсыктыгы былтыркы январга салыштырмалуу дээрлик 50% жогору болду.
Январда кошуна өлкө 1,18 млрд. долларга алтын сатты. Бул 2021-жылдын январына караганда эки эсе көп.
Экспорттун жарымынан көбү (дээрлик 57%) алтынга туура келет. Ал эми өнөр жай товарларынын үлүшү кыскарган.
Орусия Өзбекстандын негизги соода өнөктөшү бойдон кала берүүдө. Ал өлкөгө экспорт былтыркыга караганда 20% жогорулады. Кытайга болсо экспорт азайып жатат.
Жыл башында Ташкент Германиядан алты учак алып, ал өлкө да негизги соода өнөктөштөрдүн катарына кирип калды.
Казакстанга экспорт 8%, Түркияга 11%, Кыргызстанга 17,1% азайган.