НАСА жана SpaceX корпорациясынын кемеси учурулбай калды
27-февралда АКШнын Космос агенттиги – НАСА жана SpaceX корпорациясы төрт астронавтты учурууну акыркы мүнөттө токтотуп, кийинкиге калтырды. Мындай чечим «Фалкон-9» ракета ташуучуга отун жүктөөдө маселе пайда болгондон соң кабыл алынды. Стартка даярдык Youtube каналында түз көргөзүлүп жаткан.
Маалыматка караганда «Крю Дрэгон» кемеси Эл аралык космос станциясына 2-мартта жөнөшү ыктымал.
Канавералдагы космодромдон ушуну менен алтынчы коммерциялык кеме учурулмак. Экипажга америкалык Стивен Боуэн жана Вуди Хобург, Бириккен Араб Эмиратынан Султан Ал-Нейади жана орусиялык Андрей Федяев кирген. Алар станцияда жарым жыл өткөрмөкчү.