Блогер Эртай Искаков эки айга камалды

Сокулук райондук соту 17-июлда таза суу берилишин талап кылган акцияда кармалган үч адамдын бири, блогер Эртай Искаковдун бөгөт чарасын карап, аны эки айга абакта калтырды.

Дүйшөмбүнүн кечинде жарыяланган сот чечимине ылайык, Искаков 15-сентябрга чейин тергөө абагында болот.

Бир канча күндөн бери суудан мукураган Селекция айылынын жана Сары-Өзөн жаңы конушунун тургундары 14-июлда Бишкектеги Жайыл Баатыр (Түштүк магистраль) көчөсүн тосушкан.

Милиция 15-июлда нааразылык акцияга катышкан бир нече кишини суракка чакырып, алардын ичинен митингди видеого тартып, Инстаграм аркылуу түз эфирге чыгарган блогер Эртай Искаковду, жергиликтүү тургундар Бакыт Балбаев менен Бактыбек Бекболотовду камакка алган. Аларга "жол тосууну уюштурган, бейбаштык кылган" деген берене менен иш козголгон.

Адвокат Алмамбет Бексултанов блогер Эртай Искаковго коюлган айып негизсиз экенин билдирген. Жекшембиде Сары-Өзөн конушунун 20дан ашык тургуну кармалган үч кишинин бошотулушун талап кылып, президент Садыр Жапаровго кайрылуу жолдошкон.

Сары-Өзөн конушу Сокулук районуна карайт. Ушул райондун Селекция айылы менен Бишкектин Арча-Бешик конушунун ортосунда жайгашкан.

Бул үч аймакта жана Бишкектин четиндеги Орок айылы, Ынтымак, Ак-Ордо жана башка конуштарда бир нече жылдан бери жайында таза суу тартыштыгы курч маселеге айланды.

Суу ушул аптада баш калаанын борбордук бөлүгүндө да эки күнгө токтогон.