Баткенде күчү 4 баллга жеткен жер титирөө болду
Сейсмология институтунун маалыматына ылайык, бүгүн, 18-июлда саат 09:45те Баткен облусунун аймагында очогунда күчү 4 баллга жеткен жер титирөө катталды. Жер силкинүү Кадамжай районунун Кара-Дөбө, Кожо айылдарында 4 балл, Үч-Коргон, Котур-Булак, Ак-Булак айылдарында жана Кызыл-Кыя шаарында 3,5 балл, ал эми Чаувай, Караван айылдарында 3 баллга чейин сезилген. Алдын ала маалыматка ылайык, анда жабыркагандар жана кыйроолор катталган жок.
Аталган облуста 17-июлда дагы жер титиреген. Сейсмология институту дүйшөмбүдө саат 21:52де Баткен облусунун аймагында очогунда күчү 3,5 баллга жеткен жер титирөө болгонун маалымдаган. Жер титирөө Кадамжай районунун Сары-Талаа, Шуран айылдарында жана Айдаркен шаарында 3 баллга чейин сезилген жана жабыркагандар жана кыйроолор катталган эмес.
Расмий маалыматка ылайык, Кыргызстанда 12 район сейсмикалык кооптуу зонада жайгашкан. Чүй облусунда сейсмикалык кооптуулугу жогору болгон зонага - Бишкек шаары, Аламүдүн жана Сокулук райондору кирет. Жалал-Абад облусунда - Базар-Коргон, Ноокен жана Сузак райондору, Ош облусунда — Ош шаары, Араван, Кара-Суу жана Өзгөн райондору, ал эми Баткен облусунда - Кадамжай району жана Нарын облусунда - Кочкор району кооптуу зоналар болуп саналат.
Өлкөдө жылына орто эсеп менен 3000 жер титирөө катталат, анын ичинен он-жыйырмага жакыны беш баллдан ашкан сезилерлик магнитудагы жер титирөөлөр. Жер титирөөнүн очогу жер кыртышынын чегинде жайгашкан. Көпчүлүк гипо-борборлор 5 километрден 25 километрге чейинки тереңдикте жайгашкан.