مارنینګ سټار: په افغانستان کې د ښځو مصیبت د امریکا له بندیزونو سره زیات شوی
مارنينګ سټار:
مارنینګ سټار ورځپاڼې د افغان ښځو پر بدې ورځې لیکنه خپره کړې.
په دې لیکنه کې، چې سرلیک یې دی: "په افغانستان کې د ښځو مصیبت د امریکا له بندیزونو سره زیات شوى" راغلي په افغانستان کې اقتصادي بحران د ژورېدو لور ته روان دی، د لوږې او بېوزلۍ ډېرېدو د دغه هېواد ښځې له سخت وضعیت سره مخامخ کړي دي.
ورځپاڼه وايي، د امریکا له لوري لګول شویو بندیزونو او د طالبانو له خوا منظمو محدودیتونو یوازې د افغان ښځو او نجونو کړاوونه زیات کړي دي.
مارنینګ سټار ورځپاڼه لیکي، هماغسي چې ملګروملتو ویلي، په افغانستان کې لږترلږه ۲۰ میلیونه وګړي له لوږې سره مخامخ دي.
د یونېسیف د پروګرام ګروپ د ماشومانو د خوندیتوب رييس کورنیلیس ویلیمز ویلي، د افغان نجونو نهیلوونکې او تیاره راتلونکې له هغوی څخه د سودا وسایل جوړ کړي او کورنۍ یې اړ ایستلي چې په کم عمر یې واده کړي.
ورځپاڼه ریاتوي، د تېر کال په اګست کې د طالبانو له واک ته رسېدو وروسته ډېر شمېر افغان ښځو، چې سوداګري یې کوله، کاروبار درولی دی.
د ملګرو ملتونو د بشري حقونو لویې کمېشنرې میشل باچلې د جولای په لومړۍ نېټه وویل، په افغانستان کې د ښځو اقتصادي کاروبار درېدلی او ۱۲ لکه نجونې له شپږم ټولکي پورته زده کړو څخه بې برخې شوې دي.
ورځپاڼې د طالبانو د علماوو وروستۍ غونډې ته هم اشاره کړې چې هېڅ ښځې په کې ګډون نه درلود او د بشري حقونو فعالانو په دې خاطر وغندله.
د اوچا انلاین خپرونه:
د ملګرو ملتونو د بشري مرستو د همغږۍ ادارې اوچا په خپله انلاین خپرونه کې د وچکالۍ، زلزلې او نورو طبیعي پېښو له کبله زیانمن شویو افغانانو ته د ملګرو ملتونو د خوړو او کرنې د پروګرام د مرستو د پلان په اړه لیکنه خپره کړې ده.
له دې لیکنې سره سم، فاو یا د خوړو او کرنې پروګرام غواړي د افغانستان په هغو سیمو کې، چې وچکالۍ، ژور اقتصادي بحران او د وروستۍ مرګونې زلزلې ویجاړوونکو اغېزو له کړاوونو سره مخامخ کړي دي، د کرنې په برخه کې د کلیوالو ملاتړ وکړي چې د خوراکي موادو له مصونیته برخمن شي.
د اوچا د خپرونې پر اساس، د جاپان په ۱۴ میلیون ډالره تازه مرسته به د افغانستان په یوولس ولایتونو کې څه باندې ۵۵ زره تنو ته، چې له لوږې سره مخامخ دي، په مستقیم ډول بشري مرستې برابرې شي.