Татарстанда күчемсез милек сатып алу буенча лидер төбәкләр билгеле булды

2023 елда Татарстан Росреестры Россиянең башка төбәкләрендә яшәүчеләрдән кадастр исәбенә күчемсез милек хокукларын экстерриториаль теркәү һәм куюга 5,7 меңгә якын гариза алган, бу узган ел белән чагыштырганда 17 процентка диярлек күбрәк. Бу турыда «Татар-информ» хәбәр итте.

Гадәттәгечә, экстерриториаль принцип буенча иң күп гаризалар Башкортстан Республикасыннан (1 меңгә якын), Мәскәүдән (629), Мәскәү өлкәсеннән (518), Удмуртиядән (501), Марий Элдан (370) бирелгән.

Россия Федерациясенең башка субъектларында яшәүчеләр арасында Татарстанда күчемсез милек сатып алу буенча иң популяр шәһәр – Казан (1 734 мөрәҗәгать). 2023 ел нәтиҗәләре буенча икенче урында — Яшел Үзән районы (518), өченче урында — Чаллы каласы (399).

«Ай саен безнең ведомствога башка төбәкләрдә яшәүчеләрдән 500гә якын гариза килә. Шул ук вакытта экстерриториаль принцип буенча исәп-хисап чаралары документлар тапшыруның гадәти ысулы белән бер үк вакытта үткәрелә», — дип сөйләде Татарстан Росреестры җитәкчесе урынбасары Лилия Борһанова.