Новости за 26.03.2024

Дәүләт Думасының Хезмәт комитеты беренче укылышта закон проектын кабул итәргә тәкъдим итте, аның нигезендә махсус хәрби операциядә катнашучысы ата-анасын югалткан инвалид һәм балачактан инвалид балалар икеләтә пенсия ала алачак. Бу хакта РИА Новости корреспонденты хәбәр итә.

100 меңнән азрак кеше яшәгән торак пунктларда урнашкан мәктәпләрдә сыйныф җитәкчеләре һәм колледжларда төркемнәр кураторлары ай саен ике тапкыр арттырылган өстәмә түләү ала алачак – ул 10 мең сумга кадәр артачак. Бу хакта ТАСС хәбәр итә.

Коми Республикасының Усинск шәһәре мәчетендә «Мәрхәмәт» хәйрия акциясе башланды. Бу хакта Россия мөселманнары Диния нәзарәте матбугат хезмәте хәбәр итә.

Быел алдан тавыш бирүдә катнашуның кайбер шартлары үзгәрәчәк. Бу хакта «Бердәм Россия» партиясе Генераль советы секретаре урынбасары Сергей Перминов белдерде.

Гадәттән тыш хәлләр министрлыгы сайтында «Крокус Сити Холл»да теракт вакытында һәлак булучыларның яңа исемлеге чыкты. Бу хакта РИА Новости хәбәр итә.

Татарстанның Алексеевск районында Самат Гатин крестьян-фермерлык хуҗалыгы территориясендә көнбагыш мае җитештерү заводы төзелде.

«Крокуста» теракттан соң бик авыр зыян күрүчеләр көннән-көн уңай динамика күрсәтә. Бу хакта РИА Новости Россия вице-премьеры Татьяна Голиковага сылтама белән хәбәр итә.

Мамадыш районының Ямаш авылында яңа мәчет төзелеп килә. Бер ел элек янгын аркасында авыл мәчете янып бетә. Авыл халкы яңасын төзү өчен акча җыю оештырды.

Татарстанның Санкт-Петербург шәһәрендәге һәм Ленинград өлкәсендәге даими вәкиле вазифасын вакытлыча башкаручы Шамил Шәяхмәтов «Файда» татар мәдәни җәмгыяте» рәисе Илнур Гарифуллин һәм Сосновоборск шәһәр округы муниципаль берәмлеге «Кунак» татар мәдәни җәмгыяте рәисе Рөстәм Малахов белән эшлекле очрашу үткәрде. Бу хакта вәкиллек матбугат хезмәте хәбәр итә.

«Интертат» сайтының «Вконтакте» төркемендә туры эфирда уза торган «Әйтер сүз» рубрикасында «Ватаным Татарстан» газетасының баш мөхәррир урынбасары, Татарстанның атказанган матбугат һәм массакүләм коммуникацияләр хезмәткәре Илнар Хөснуллин кәгазь газета бетәчәк дигән фикерен җиткерде.

Мурманск шәһәрендә ифтар булды. Аны шәһәрнең «Якташ» татар мәдәни үзәге оештырган. Бу хакта Бөтендөнья татар конгрессы матбугат хезмәте хәбәр итә.

Татарстанда «Бердәм Россия» праймеризында махсус хәрби операциядә катнашучылар өчен аерым ярдәм чаралары каралган. Бу хакта партиянең төбәк бүлеге башкарма комитеты җитәкчесе урынбасары Лилия Әхмәтҗанова алдан тавыш бирүне уздыру буенча оештыру комитеты утырышында хәбәр итте.

23 март көнне Калининград өлкәсендә Варшава конференц залында Фатих Кәримгә багышланган «Фатих! Син исән, исән! Сине укыйлар һәм хәтерлиләр!» дип аталган I Төбәкара әдәби бәйгенең нәтиҗәләре игълан ителде. Бу турыда Бөтендөнья татар конгрессы хәбәр итте. Нәтиҗәләрне конгресс сайтында карап була.

Татарстанда еллык инфляция 2024 елның февраль нәтиҗәләре буенча 7,42 процент тәшкил итте. Бу Идел буе федераль округындагы (7,54 процент) һәм Россиядәге (7,69 процент) белән чагыштырганда түбәнрәк. Үзәк банк мәгълүматларында шул хакта белдерелә.

Мамадышта яшәүче волонтер Елена Пономарева 37 елдан артык Мамадыш үзәк район хастаханәсенең педиатрия бүлегендә шәфкать туташы булып эшли. Ул, үз Ватанының чын патриоты буларак, алгы сызыкта үз бурычын үтәүче солдатларга ярдәм итү хәрәкәтеннән читтә кала алмый. Хатын-кыз өендә солдатлар өчен витаминлы чәй ясый башлаган. Бу турыда «Татар-информ» хәбәр итте.

«Бердәм Россия» партиясе әгъзалары Татарстан Рәисе Рөстәм Миңнехановка VII чакырылыш ТР Дәүләт Советы депутатларын сайлауда партия исемлеген җитәкләргә тәкъдим итәргә тели. Бу хакта журналистларга Парламент җитәкчесе, төбәк бүлеге секретаре Фәрит Мөхәммәтшин партиянең Татарстан бүлеге сәяси советы президиумы утырышында сөйләде.

Казанда VII Бөтенроссия «Ак калфак» укучы кызлар һәм егетләр бәйгесенең III туры башланды. Финалга барлыгы 11 төбәктән булган 162 катнашучыдан 7 егет һәм 8 кыз сайланып алынган. Алар төрле этапларда үз көчен сыный. Бәйгенең беренче һәм икенче турлары онлайн үткән.

Бүген «Казан-1» тимер юл вокзалы территориясендә контракт буенча хәрби хезмәткә сайлап алу мобиль пункты ачылды. Бу турыда «Татар-информ» хәбәр итте.

Мошенниклар Казан Мәгариф идарәсе башлыгы Ирек Ризвановн исеменнән ялган Telegram-аккаунт ясаган. Бу хакта түрә үзенең «ВКонтакте» битендә хәбәр итте.

Татарстанда чәршәмбе, 27 мартта һава торышы бозылу фаразлана.

ТР Гидрометеорология үзәге фаразлавынча, республикада көчле яңгыр һәм юеш кар көтелә. Шулай ук 18-23 м/с тизлектә кинәт исүчән җилләр дә булырга мөмкин.

Татарстанның көнбатыш районнарында буран булырга мөмкин. Ул 500 метрга кадәр күрү сәләтен начарлатуга китерәчәк. Кайбер районнарда шулай ук бозлавык һәм кар боткасы фаразлана.

Казан мэры Илсур Метшин 2023 елның дүртенче кварталы йомгаклары буенча Татарстанда медиа-эффектив җитәкчеләр рейтингында беренче урынны алды. Шәһәр башлыгының нәтиҗәдәге күрсәткече бераз кимүгә карамастан (6797дән 5532гә), Метшин, узган елның өченче кварталындагы кебек үк, рейтингта беренчелекне яулый. Бу турыда «Промрейтинг» агентлыгы мәгълүматларыннан билгеле булды.

Татарстанда «Бердәм Россия»нең алдан тавыш бирүе 26 марттан 26 майга кадәр узачак. Ул партиядән ТР Дәүләт Советына депутатлыкка кандидатларны тәкъдим итү өчен кирәк. Бу хакта парламент башлыгы, төбәк бүлеге сәркатибе Фәрит Мөхәммәтшин хәбәр итте.

Махсус хәрби операция катнашучыларына хәрби хәрәкәтләр ветераны электрон таныклыгы бирәчәкләр. Алар гадәти пластик карталар төсле була. Мондый карар РФ саклану министры Сергей Шойгу указы белән кабул ителгән. Ул аны РФ Саклану министрлыгы коллегиясе утырышында белдергән.

Татарстанның Яшел Үзән районында «Тура 2.0» индустриаль (сәнәгать) паркы булдырылачак. Тиешле карарны республика Премьер-министры Алексей Песошин имзалады.

24 мартта Бөтендөнья татар конгрессының татар яшьләре белән эшләү комитеты җитәкчесе Алмаз Хәлиуллинның Санкт-Петербург шәһәренә эш сәфәре кысаларында «Яшьләрне милли-мәдәни берләшмәләр эшчәнлегенә ничек җәлеп итәргә?» темасына түгәрәк өстәл оештырылган. Чараны Санкт-Петербургның «Мирас» мәдәни үзәгенең яшьләр канаты оештырган. Бу хакта Бөтендөнья татар конгрессы сайтында хәбәр ителә.