Новости за 06.03.2024

Мөслимдә «Мизгел» яшьләр үзәгендә махсус хәрби операциядә катнашучы егетләрнең әниләре, дәү әниләре, хатыннары белән очрашу узды. Бу хакта «Мөслим-информ» хәбәр итә.

5 мартта Нижневартовск шәһәренең «Патриот» яшьләр үзәгендә «Җәлил укулары» VI ачык шәһәр укучылар әдәби конкурсында җиңүчеләрне һәм призерларны бүләкләү тантанасы узды. Бу хакта Сургут татарлары милли-мәдәни автономиясе «ВКонтакте» челтәрендәге сәхифәсендә хәбәр итә.

24 яшькә кадәр - бала тудыру өчен нәкъ менә «иң дөрес һәм репродуктив» вакыт. Бу хакта Россия вице-премьеры Татьяна Голикова хәбәр итте һәм россиялеләрнең уртача 26 яшьтә бала табуын искәртте.

Россия Президенты Владимир Путин Мәскәүдән Кара диңгез ярына кадәр поездда бару вакытын кыскарту бурычы турында искәртте. Аның сүзләренчә, юл вакыты 16 сәгатьтән артмаска тиеш. Бу турыда «Татар-информ» яза.

Алтын бәясе яңа тарихи максимумга күтәрелеп, троя унциясе өчен 2153 доллардан артып китте. Бу хакта сәүдә мәгълүматлары дәлилли, дип хәбәр итә РИА Новости.

Сочида Бөтендөнья яшьләр фестивалендә 225 татарстанлы — студентлар, эшләүче яшьләр, спортчылар, галимнәр катнаша. Чараны оештыруда Татарстан Республикасыннан 82 волонтер катнашты, дип искәртте республика Рәисе Рөстәм Миңнеханов.

Бүген Казанның «Сәйдәш» мәдәният үзәгендә «Ел хатын-кызы. Ел ир-аты: хатын-кыз карашы» шәһәр конкурсының 14 җиңүчесен бүләкләү тантанасы узды. Аның нәтиҗәләре белән ТР башкаласы мэриясе уртаклашты.

Татарстан Республикасы Милли музеенда «Алар беренче иделәр» күргәзмәсе эшли башлады. Проект беренче космонавт, СССР Герое Юрий Гагаринның 90 еллыгына багышлана. Күргәзмә ватандашларыбыз, якташларыбызның алдынгы казанышлары турында сөйли.

Бүген Казанның «Ак Барс» хоккейчылары Екатеринбургның «Автомобилист» командасын 5:0 исәбенә җиңде. Матч Екатеринбургта узды.

Самара шәһәренең «Таң» ( «Заря») мәдәният йортында «Идел» татар эстрада җыры халык ансамбленең «Гаилә җылысы» концерты була.

Атом энергиясе куркынычсызлыгы стандартларын тәэмин итү — планета масштабындагы проблема. Шуңа күрә Россия бу мәсьәләдә Халыкара атом энергиясе агентлыгы ярдәменә һәм таянычына өметләнә, дип белдерде РФ Президенты Владимир Путин Сочида Агентлыкның генераль директоры Рафаэль Гросси белән очрашуда, дип яза «Татар-информ».

Татарстан Рәисе Рөстәм Миңнеханов Сочига килде. Аның эш сәфәренең төп максаты - Бөтендөнья яшьләр фестивален ябу тантанасында катнашу, дип хәбәр итә ТР җитәкчесе матбугат хезмәте.

Татарстанда «Ата-ана батырлыгы» һәм «Ана даны» медальләре белән бүләкләнүчеләргә бер тапкыр бирелә торган түләү күләме артты. Әлеге үзгәрешләр булган указны бүген Татарстан Республикасы Рәисе Рөстәм Миңнеханов имзалады.

Габдулла Тукай исемендәге әдәби музей Бөтенроссия фәнни конференциясен үткәрә. Конференция кысаларында «Тукай укулары-2024» халыкара чарасы узачак, дип хәбәр итә Бөтендөнья татар конгрессы матбугат хезмәте.

2024 елның июненнән чыгарылыш сыйныф укучыларының бер фәннән бердәм дәүләт имтиханын яңадан тапшыру мөмкинлеге барлыкка киләчәк. Шулай итеп, алар, Россия Президенты Владимир Путин тәкъдим иткәнчә, кабул итү кампаниясе ахырына кадәр яңа нәтиҗәләр ала алачак, дип белдерде Мәгариф һәм фән өлкәсендә күзәтчелек буенча федераль хезмәт (Рособрнадзор) башлыгы Анзор Музаев.

Бөтенроссия татар авыллары эшмәкәрләре җыены делегатлары бүген Кукмара районы үсеше белән танышты. Район кунаклары, берничә төркемгә бүленеп, төрле авылларда булды.

Думаның берничә фракциясе вәкилләре икенче һәм өченче балалары туган гаиләләргә ана капиталы күләмен 1 млн сумга кадәр күтәрергә тәкъдим итә торган закон проектын әзерләгәннәр. Документ текстын Дәүләт Думасының Хезмәт комитеты рәисе һәм либерал-демократлар фракциясе әгъзасы Ярослав Нилов бастырып чыгарган.

Дәүләт Думасына махсус хәрби операция вакытында РФ Кораллы көчләрендә хезмәт итү турында контракт төзегән затларны җинаять җаваплылыгыннан азат итү механизмын билгели торган закон проекты кертелгән.

Моннан берничә ел элек археологлар Казахстанның Караганда өлкәсе Улытау районында алтын касә тапкан. Алтын Урда чорына караган шундый ук касә Татарстан Милли музеенда да саклана. Казахстан Республикасы парламенты Мәҗлесе рәисе Ерлан Кошанов Казанда ТР Дәүләт Советы Рәисе Фәрит Мөхәммәтшинга шул хакта сөйләде.

Ватанны яклаучылар көне алдыннан Түбән Новгород өлкәсенең Актук һәм Чүмбәли авыллары арасында ур­нашкан «Сары саз» күле ярында Кызыл Октябрь районы Яшьләр палатасының беренче рәисе Рөстәм Айдерхановның якты истәлегенә багышланган ХI биатлон турниры узды. Аны Рөстәмнең якын дусты Рәүф Ваһапов башлангычы белән мәгариф һәм яшьләр эше комитеты, спорт бүлеге, Уразавылның өстәмә белем бирү үзәге, Семочкидан мәрхүмнең туганнары оештырды. Бу хакта Бөтендөнья татар конгрессы матбугат хезмәте хәбәр итә.

Татарстанда татар телен читтән торып өйрәнү буенча «Ана теле» мәгълүмати белем бирү системасын булдыруга һәм техник яктан җиһазландыруга 123,3 миллион сум акча бүлеп биреләчәк. Бу хакта ТР Финанс министрлыгының матбугат хезмәте хәбәр итә.

Татарстанда РФ Саклану министрлыгы белән контракт төзегән гражданнар өстәмә акчалата түләү алачак. Казанның контракт буенча хәрби хезмәткә җыю пункты башлыгы урынбасары Рөстәм Сафиуллин «Татар-информ» агентлыгына шулай дип белдерде.

«Театраль Идел буе» балалар һәм яшьләр коллективлары фестивале V сезоны кысаларында иң яхшы афиша яки плакат ясау бәйгесенең иң яхшы 20 эше билгеләнде, алар Идел буе федераль округлары төбәкләре арасында конкурсның округ этабында Татарстанны тәкъдим итәчәк.

Бүген Татарстан Эчке эшләр министрлыгының шәхси составына ведомствоның яңа башлыгын – Дамир Сатретдиновны тәкъдим иттеләр. Министрны видеоконференция элемтәсе режимында Татарстан Рәисе Рөстәм Миңнеханов һәм Россия эчке эшләр министры Владимир Колокольцев тәкъдим итте.

Сочида уза торган Бөтендөнья яшьләр фестивалендә Татарстан башкаласы павильоны эшли. Кичә мәйданчыкта «Казан хәзинәләре» концерт программасы күрсәтелде. Форум кунаклары уникаль музыкаль композицияләр, «Казан» бию ансамбле чыгышы белән хозурланды. Бу хакта Казан мэриясе матбугат хезмәте хәбәр итә.