Новости за 14.03.2024

Питрәч районында беренче тапкыр махсус операциядә катнашучыларга багышланган чаңгы ярышлары узды. Ленино-Кокушкино мәктәбенең яшь спортчылары уку йорты бинасыннан старт алды һәм Питрәчтә финишка килеп җиттеләр, анда Җиңү паркында һәлак булганнар һәйкәленә чәчәкләр салдылар. Бу хакта «Алга» сайтында хәбәр ителә.

«ТНВ» һәм «Татарстан 24» телеканалларында Динә Газалиеваның «Тatarstan Today. Дөньяга ачык» авторлык программасының яңа чыгарылышы тәкъдим ителә. Проект Татарстан белән Төркия мөнәсәбәтләренә багышланган.

Җәмәгать күзәтүе - ул сайлау кампаниясенең ачыклыгын һәм легитимлыгын бәяләүнең төп факторы. Бу хакта Россия Президентын сайлауларга килгән халыкара күзәтүчеләр белән очрашу алдыннан журналистларга Татарстан Үзәк сайлау комиссиясе рәисе Андрей Кондратьев белдерде. Бу турыда «Татар-информ» хәбәрчесе Надежда Гордеева яза.

Нижневартовск шәһәренең «Мирас» татар милли-мәдәни автономиясе шәһәрнең туган көненә бүләк ясаган. 11 мартта җирле иҗтимагый оешма шәһәрнең 52 еллыгына багышлап «Туган як» бәйрәм концерты уздырган. Бу турыда Сургут татарлары милли-мәдәни автономиясе социаль челтәрләрдә хәбәр итте.

Президент Владимир Путин РФ дәүләт бүләкләрен тапшыру турында указга имза куйды. Документ хокукый мәгълүмат порталында чыкты.

Бүген «Ватанны саклаучылар» фондының Татарстан филиалында «Алга» батальонының һәлак булган сугышчыларын искә алдылар. Туганнарына «Армия генералы В.Ф.Маргелов» ордены тапшырылды. Бу орден «Россия десантчылары берлеге»нең хөкүмәтнеке булмаган иҗтимагый бүләге һәм десант гаскәрләре бүләгенең югары формасы булып тора. Бу турыда «Татар-информ» хәбәрчесе Дмитрий Шатров хәбәр итте.

Бүген Казанда «Иҗат аша тынычлык һәм бердәмлеккә» дигән IV этномәдәни студентлар бәйге-фестиваленә йомгак ясалды.

ТР Вице-премьеры Евгений Варакин Рубежноеда гуманитар үзәк эшен тикшерде. Шеф-регион вәкиле миссия җитәкчесе Оксана Удовина белән очрашты һәм халык арасында ярдәмне бүлү һәм шәһәр халкының хәзерге вакыттагы ихтыяҗлары белән танышты. Бу турыда «Татар-информ» хәбәр итте.

Казан мәктәбендә кызамык авыруы табылган 1 сыйныф укучысы, шулай ук кызамык йогу шиге булган биш кеше Агафонов исемендәге Республика клиник йогышлы авырулар хастаханәсенә озатылган. Пациентлар прививка ясатмаган, алар вакцинациядән баш тарткан булган. Бу хакта «Татар-информ»га Казанның Сәламәтлек саклау идарәсе матбугат хезмәтендә хәбәр иттеләр.

Сайлау системасы президент сайлауларын үткәрүгә әзер. Бу хакта Федерация Советының Регламент һәм парламент эшчәнлеген оештыру комитеты рәисе урынбасары, РФ Үзәк сайлау комиссиясендә Федерация советының вәкаләтле вәкиле Александр Терентьев әйтте. Ул Россия Үзәк сайлау комитетының мәгълүмат үзәген ачуда катнашты, дип яза «Татар-информ».

Казанның 18 номерлы мәктәбендә 1 сыйныф укучысына кызамык диагнозы куелган. Тагын дүрт укучы һәм бер укытучы авыру йоктыру шиге бар. Мәктәптә дезинфекция үткәрелгән. «Татар-информ»га мәгълүматны Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе раслады.

Казанга кадәр югары тизлекле тимер юл магистрале 2036 елга кадәр төзелә — эшләр ике этапта башкарылачак. Бу хакта үзенең телеграм-каналында Дәүләт Думасының Энергетика комитеты рәисе урынбасары Юрий Станкевич язды.

Якын көннәрдә Татарстандагы климатик вәзгыятьтә җитди үзгәрешләр көтелми. Көндезләрен һава температурасы плюслы булачак, ә төнлә -14 градуска кадәр салкыннар фаразлана, дип хәбәр итә ТР Гидрометцентр үзәге.

Татарстан Үзәк сайлау комиссиясендә ТР Үзәк сайлау комиссиясе рәисе Андрей Кондратьев халыкара күзәтүчеләр һәм экспертлар белән очрашты. Алар республикага Россия Президентын сайлауларны күзәтү өчен килде. Бу турыда «Татар-информ» хәбәрчесе Надежда Гордеева яза.

Россиянең атом энергетикасында кулланыла торган технологияләрнең 99 проценты – безнең илнеке. Бу хакта Президент Владимир Путин Мәскәү - Санкт-Петербург югары тизлекле магистрале һәм Ленинград атом электростанциясенең җиденче энергоблогы төзелешен башлап җибәрү тантанасында әйтте, дип хәбәр итә Кремль матбугат хезмәте.

Россия Президенты Владимир Путин Хөкүмәт әгъзалары белән киңәшмә вакытында Казанда узган «Киләчәк уеннары» Халыкара мультиспорт турнирын искә алды. Ул маштаблы вакыйганы оештыру һәм уздыру белән шөгыльләнгән һәркемне билгеләп үтәргә кушты. Киңәшмә тррансляциясе Кремль телеграм-каналында узды.

Россия атом технологияләре өлкәсендә дөньяда лидер булып тора, аның ярдәме белән башка илләрдә атом энергетикасы нульдән барлыкка килә. Бу хакта Президент Владимир Путин Мәскәү - Санкт-Петербург югары тизлекле магистраль һәм Ленинград АЭСының җиденче энергоблогы төзелешен башлап җибәрү тантанасында әйтте, дип хәбәр итә Кремльнең матбугат хезмәте.

11 мартта Сызрань шәһәренең «Азан» мәчетендә беренче ифтар ашы узган. Ифтарга 150 кеше килгән. Бу хакта «Самара татарлары» сайты хәбәр итә.

«Татмедиа»ның «Кәеф» медиалабораториясендә журналист, язучы, «Татар-информ» мәгълүмат агентлыгының татар редакциясе һәм «Интертат» сайты баш мөхәррире Рәмис Латыйповның «Атмый калган таң» китабын тәкъдим итү кичәсе булды. Әлеге китап «Казан утлары» журналы китапханәсе сериясендә өч мең тираж белән басылып чыккан.

Татарстан Рәисе Рөстәм Миңнеханов Яшел Үзән районында мәчет ачуда катнашты һәм республикада православиене үстерү хакында фикер алышты. ТР мөфтие Камил хәзрәт Сәмигуллин, Казан һәм Татарстан митрополиты Кирилл катнашындагы чаралар турында ул телеграм-каналында сөйләде.

Россия Президентын сайлау көннәрендә, 15-17 мартта, Менделеевск районында тавыш биргән һәркем кыйммәтле бүләкләр уйнатуда катнаша алачак. Моның өчен фотобәйгедә катнашырга кирәк.

Казаннан 15 яшьлек мәктәп укучысы Ибраһим Әхмәдуллин «Технологияләр, техник иҗат» юнәлешендә «Россиянең илкүләм байлыгы» XVIII Бөтенроссия талантлы яшьләрнең казанышлары бәйгесендә җиңү яулады.

Казанда кешеләрне аз керемле дип тану өчен керемнең чик күрсәткечен һәм салым салынырга тиешле милек бәясен арттырдылар. Әйтик, ялгыз яшәүче кешегә аның күләме 2 396 322 сум тәшкил итәчәк. Шул хактагы мәгълүмат Башкарма комитетның документлар һәм хокукый актлар җыентыгында урнаштырылган.

Италиянең Тони цирк династиясе вәкилләренең берсе Бруно Тониның остазы татар цирк артисты Дамир Гыйбадуллин булган.

15 мартта Россиядә гражданнар тавыш бирә һәм илнең булачак Президентын сайлый алсын өчен сайлау участоклары ачыла. Гамәлдәге дәүләт башлыгы Владимир Путин әлеге вакыйга уңаеннан россиялеләргә мөрәҗәгать итте.