Новости за 27.03.2024

Спас районының Болгар шәһәрендә яшәүче 90 яшьлек әбигә тизлекне арттырган өчен штрафларны вакытында түләмәгәнгә административ эш ачканнар. Бу хакта «Яңа тормыш» сайтында хәбәр ителә.

Татарстан Мәгариф һәм фән министрлыгы башлыгы Илсур Һадиуллин мәктәп укучыларына буллинг белән очрашкач нәрсә эшләргә кирәклеген аңлатты. Бу хакта министр ТР Төбәк белән идарә итү үзәгендә туры эфир вакытында сөйләде.

Музыка училищелары һәм югары уку йортлары педагогларының хезмәт хакы шәхси дәресләр бирмичә дә җитәрлек булырга тиеш. Бу хакта Торжок шәһәрендә мәдәният хезмәткәрләре белән очрашуда Россия Президенты Владимир Путин белдерде.

Татарстанның атказанган рәссамы Илдус Мортазин Түбән Каманың иң яхшы волонтерлары турында картиналар сериясен дәвам итте. «Сакла!» дип аталган яңа эше Римма Корбановага багышланган, дип сөйләде рәссам «Татар-информ»га.

РФ Гадәттән тыш хәлләр министрлыгы «Крокус Сити Холл»да терактта һәлак булучыларның яңартылган исемлеген чыгарды. Анда 143 кеше.

Татарстанда яшәүчеләр йортларына газ кертү һәм газ җиһазлары урнаштыру өчен 100 мең сумга кадәр субсидия алырга мөмкин. Бу хакта Татарстан Республикасы хезмәт, халыкны эш белән тәэмин итү һәм социаль яклау министры урынбасары Наталья Бутаева хәбәр итте.

Татарстан мәктәпләрендә 1 сентябрьдән «Хезмәт» һәм «Ватанны саклау һәм иминлек нигезләре» дигән яңа фәннәр барлыкка киләчәк. Бу хакта ТР Төбәк белән идарә итү үзәгендә туры эфир вакытында Татарстан Республикасы мәгариф һәм фән министры Илсур Һәдиуллин хәбәр итте.

Казанның ике коллективы, «Апуш» иҗат берләшмәсенең «Без» студиясе һәм «Э-моция» өлкәннәр өчен иҗат инклюзив студиясе «Театраль Идел буе» округ фестивале финалында катнашты. Ул Идел буе федераль округының 14 төбәге арасында телекүпер форматында узды. Татарстаннан килгән номинантлар Татарстан Милли китапханәсе күргәзмәләр залында күрше төбәкләрнең иң яхшы спектакль өчен тавыш бирүен күзәтте.

Федераль иминлек хезмәте (ФСБ) россиялеләрне үзләрен махсус хезмәт хезмәткәрләре дип атаучы аферистлар турында кисәтте. Хәбәр ведомствоның рәсми сайтында чыккан.

«Тантана» премиясенең иң яхшы зур формалы спектакле дип Әтнә театрының «Ай тотылган төндә» спектакле игълан ителде.

«Әкият» курчак театрының «Авиатор» спектакле «Тантана» премиясендә «Кече формалы иң яхшы спектакль» дип танылды.

Казан федераль университеты галимнәре 1-4 сыйныфлар өчен төзегән «Адымнар.Татар теле» укыту-методик комплексы Мәгариф министрлыгының федераль исемлегенә кертелде. Бу хакта югары уку йортының медиапорталы хәбәр итә.

Габдулла Тукай исемендәге Татар дәүләт филармония концерт залында Татарстанның халык шагыйре, мәшһүр әдәбият эшлеклесе Равил Фәйзуллинның 80 яшьлек юбилеена багышланган «Тагын килде язлар!..» дигән кичә бара. Юбилярны котларга танылган шәхесләр килгән.

Зәкия Туешева исемендәге театр премиясе быел Туфан Миңнуллин исемендәге Татар дәүләт драма театры артисты Рәис Галиевка тапшырылды.

Россия Президенты Владимир Путин ике бүлекчәгә «гвардия» дигән мактаулы исем бирде. Указлар рәсми хокукый мәгълүмат интернет-порталына урнаштырылган.

Быел Дамир Сираҗиев премиясе артист гаиләләренә тапшырылды.

Премия Баталов исемендәге Бөгелмә театры артистлары Александр Кочетов һәм Марина Быстровага, Тинчурин театры артистлары Артем Пискунов һәм Резеда Сәләховага, шулай ук, Рабит Батулла, Нурбәк Батулла һәм Байбулат Батуллага тапшырылды.

«Намус һәм тугрылык» номинациясендә «Тантана» премиясе Камал театрының легендар артистлары Ринат Таҗетдинов һәм Әзһәр Шакировка тапшырылды.

Курчак театрының иң яхшы актеры дип Дилүс Хуҗәхмәтов танылды. «Тантана» премиясенең бу номинациясе аңа «Авиатор» спектаклендә Иннокентий Платонов роле өчен тапшырылды.

Салават Фәтхетдинов үзенең Шамил Закиров хөрмәтенә гамәлгә куйган махсус призын Буа театры директоры урынбасары Фәрит Садриевка тапшырды.

Филология фәннәре докторы, профессор Дания Заһидуллина Татарстанның халык язучысы, Габдулла Тукай исемендәге дәүләт премиясе лауреаты Әмирхан Еникинең 115 еллыгына багышланган «Әмирхан Еники һәм татар әдәбияты яңарышы» дип аталган түгәрәк өстәл утырышында катнашы. Галимә Әмирхан Еники прозасында поэтик ачышлар турында сөйләде.

Камал театры артисты Радик Бариевка «Тантана премиясе Туфан Миңнуллин пьесасы буенча куелган «Дуслар җыелган җирдә» спектаклендәге Рафис роле өчен тапшырылды.

30 мартта Казанда «Корстон» үзәгендә беренче тапкыр «Бизнес-ифтар» бизнес җәмәгатьчелеге форумы узачак. Оештыручылар бу ифтар форматының яңа булуы һәм шуңа Татарстанда узуы турында сөйләделәр.

«Иң яхшы хатын-кыз роле» номинациясендә «Тантана» премиясе Нәбирә Гыйматдинованың «Сихерче» спектаклендә Убыр ролен башкарган Чулпан Аскаровага бирелде.

Узган 2023 ел нәтиҗәләре буенча Татарстан һәм Үзбәкстан товар әйләнеше 27 процентка артып, 370 миллион долларга җиткән. Бу хакта Татарстан Республикасы Рәисе Рөстәм Миңнеханов белән Үзбәкстанның Сөрхандәрья өлкәсе хәкиме Олугбәк Косимов очрашуында әйтелде, дип хәбәр итте «Татар-информ»га ТР Рәисе матбугат хезмәте җитәкчесе Лилия Галимова.

«Икенче пландагы иң яхшы хатын-кыз роле» номинациясендә «Тантана» премиясе Камал театры артисты Алсу Каюмовага бирелде. Премия комиссиясе аның Туфан Миңнуллин пьесасы буенча куелган «Дуслар җыелган җирдә» спектаклендәге Саҗидә ролен билгеләп үткән.