Новости за 21.03.2024

Актаныш районында елдан артык утын кисү өмәләре оештырыла. Бүген махсус хәрби операциядә катнашучыларның гаиләләренә утын әзерләү өмәсенә авыл җирлеге башлыклары да кушылды. Бу хакта «Актаныш» сайтында хәбәр ителә.

Студент кызлар арасында үткәрелүче «Яз гүзәле» матурлык һәм талант бәйгесендә Самара дәүләт педагогия университеты студенты Фәрзәнә Мәхмүтова җиңде. Җиңүчегә калфак һәм хәситә тапшырдылар. 


Март башында Кырым Республикасының Ялта шәһәр Советы тарафыннан Советлар Союзы Герое, Ялтаның мактаулы гражданины Гали Мәҗитовның истәлеген мәңгеләштерү турында карар кабул ителде. Аның бюсты Ялтаның 9нчы урта мәктәп-лицее янындагы скверда урнаштырылачак. Бу хакта Бөтендөнья татар конгрессының матбугат хезмәте хәбәр итә.

Мәскәүнең Мемориаль мәчете каршында оештырылган «Рамазан чатыры»нда гаилә һәм сәламәтлек кичәсе узды. Бу хакта Россия Мөфтиләр шурасының матбугат хезмәте хәбәр итә.

Казанда Россия Эчке эшләр министрлыгының Казан юридик институты оешуга 50 ел тулу уңаеннан тантаналы чара булды. Анда югары уку йортын тәмамлаучылар, курсантлар һәм мактаулы кунаклар җыелды, алар арасында Татарстан Дәүләт Советы Рәисе Фәрит Мөхәммәтшин да бар иде.

Чара Бөтендөнья шигърият көненә багышланды.

Мошенниклар Менделеевск районы җитәкчесе Радмир Беляевның ялган аккаунтын ясаган. Хакимият башлыгы телеграм-каналында шул хакта хәбәр итә.

Татарстанда республика Мәгариф һәм фән министрлыгының коллегия составы яңарды. ТР Премьер-министры Алексей Песошин шул хактагы карарны имзалады.

Россия этнография музеенда сакланган татар киемнәре коллекциясе альбом-каталог булып басылып чыкты. Китап өч телдә басылган һәм ул «Татар киеме»/»Татарский костюм»/»Tatar Clothes» дип атала.

Казанның «Пирамида» концертлар залында студент кызлар арасында үткәрелүче «Яз гүзәле» матурлык һәм талант бәйгесенең финалы башланды. Быел ул Гаилә елына багышланган һәм «Гаилә - гомер бишеге» слоганы астында үтә. Финалда Россия төбәкләреннән һәм 30 кыз «Яз гүзәле» титулы өчен көч сынаша.

Татарстан Дәүләт Советы Россия Хезмәт кодексының 265нче маддәсенә үзгәрешләр кертү буенча закон инициативасы әзерләде. Закон проекты нигезендә, әлеге маддәне яшүсмерләргә 16 яшьтән 18 яшькә кадәр куркыныч производстволарда эшләргә рөхсәт итә торган яңа өлеш белән тулыландырырга тәкъдим ителә.

Танылган театр режиссеры Илгиз Зәйниев беренче милли цирк тамашасының (хәзерге вакытта Казан циркында аның репетицияләре бара) режиссеры булачак. Казан циркы директоры Эльмира Булатова Татарстан мәдәният министрының Казан цирк мәктәбендә шөгыльләнүчеләр белән очрашуы вакытында шулай дип белдерде. Яшь артистлар Франциянең Сен-Поль-ле-Дакс шәһәрендә узган XXIII Халыкара цирк артистлары фестиваленнән көмеш (көмеш алма) алып кайтты.

Татарстан мөфтиятенең Рамазан ае уңаеннан җәмәгать урыннары арасында иң матур бизәлештә ярышу буенча «Нурлы Рамазан» бәйгесенә гаризалар кабул итү төгәлләнде. Конкурсның беренче этабы нәтиҗәләре буенча Татарстанның төрле почмакларында 52 урын бизәлде: болар – шәхси йортлар, мәчетләр, кибетләр, кафелар.

Республикада 25 мартка кадәр РФ Саклану министрлыгы белән контракт төзегән гражданнар өстәмә акчалата түләү алачак. Казанда контракт буенча хәрби хезмәткә сайлап алу пункты башлыгы Евгений Токмаков «Татар-информ» агентлыгына шулай дип белдерде.

30 мартта Татарстан Халыклар дуслыгы йортында чуваш телендә чыгучы республика «Сувар» газетасының 30 еллыгына багышланган юбилей чарасы узачак. Бу хакта вакыйганы оештыручылар хәбәр итә.

Самара шәһәренең «Заман» татар балалар фольклор ансамбле Казанда Габдулла Тукай музеенда чыгыш ясады. Аларны Татар ресурс үзәге чакырган. Бу хакта «Самара татарлары» сайтында хәбәр ителә.

Казан - уртача хезмәт хакы күләме айлык ипотека түләвеннән түбәнрәк булган миллионлы шәһәрләр арасында дүртенче урында. Бу хакта «Циан.Аналитика» мәгълүматларына сылтама белән РБК хәбәр итә.

1 апрельдә Татарстан башкаласында «Трамвай 60 минут Күчеп утыру» тарифы бәясе бер сәфәр өчен 35 сумнан 38 сумга кадәр арта. Бу хакта «Метроэлектротранс» муниципаль унитар предприятиесенең матбугат хезмәте Telegram-каналында хәбәр итә.

Пенза өлкәсенең шәһәр тибындагы Исса бистәсе мәчетендә милләтара ифтар узды. Бу хакта Пенза өлкәсе мөселманнары Диния нәзарәте сайтында хәбәр ителә.

«Нәфис Косметикс» предприятиесе хезмәткәрләре арасында сальмонеллез йоктыручылар саны 69 кешегә җитте. Бу хакта «Татар-информ» агентлыгына Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе матбугат хезмәтендә хәбәр иттеләр.

«СалаваTik»лар сәламәтлекне кечкенәдән сакларга, һәр иртәне зарядка белән башларга киңәш итә. Ютуб каналда аларның бүген «Зарядка ясыйм» җырына төшерелгән өр-яңа видеолары чыкты. Бу турыда оештыручылар хәбәр итте.

Татарстанда кар мартның соңгы көннәрендә, республикада тотрыклы югары температура урнашкач актив рәвештә эри башлаячак. Климатик норма буенча, кар апрельнең икенче декадасында тулысынча эреп бетәчәк. КФУның Экология һәм табигатьтән файдалану институты метеорология, климатология һәм атмосфера экологиясе кафедрасы доценты, халыкара эшчәнлек буенча директор урынбасары Тимур Әүһәдиев шулай дип белдерде.

Россия Президенты Владимир Путин россиялеләргә дәүләт башлыгын сайлауда тавыш бирүнең рәсми нәтиҗәләрен чыгару уңаеннан мөрәҗәгать итте.

«Татар-информ» мәгълүмат агентлыгының татар редакциясе, «Интертат» электрон газетасы, «Атна вакыйгалары» газетасы баш мөхәррире Рәмис Латыйпов балалар һәм яшүсмерләр матбугатында яшьләргә өлкәннәр тарафыннан артык тәнкыйди караш барлыгын әйтте.

2 апрель көнне «САЛАВАТIK» мәктәбенә кастинг була. Ул 4-8 яшьлек талантлы балалар өчен оештырыла. «САЛАВАTIK» мәктәбендә татар теле дәресләре; хореография; актёрлык осталыгы; вокал көтәчәк, дип хәбәр итте оештыручылар. Атнага ике тапкыр алар белән тәҗрибәле укытучылар татар телендә шөгыльләнәчәк һәм яраткан «САЛАВATIK»лар төркеменең вәкиле булырга мөмкинлек була. Барлык дәресләр дә бушлай үтәчәк.