Татарстанда 14 меңгә якын кеше су басу зонасында калырга мөмкин
Язгы ташу көчле булган очракта Татарстанның 220 торак пункты су басу зонасына эләгергә мөмкин, аларда 13,6 мең кеше яши. Бу хакта Татарстан Хөкүмәте йортында Гадәттән тыш хәлләр комиссиясе утырышында ТР Премьер-министрының беренче урынбасары Рөстәм Нигъмәтуллин сөйләде.
«Махсус оештырылган төркемгә гамәлдәге нормативлар нигезендә югары әзерлектә булырга кушылды. Бөтен районнарга язгы ташу көчәйгәндә югары әзерлек режимына, ә су баса башлаган очракта, гадәттән тыш хәл режимына күчәргә кирәк булачак», - диде ул.