Халыкара экспертлар һәм күзәтүчеләр Чаллыда булды: Сездә өйрәнерлек нәрсәләр бар
Чаллыда халыкара экспертлар һәм күзәтүчеләр берничә сайлау участогында булды.
Деви Рахмавати Индонезиядән эксперт, ул сайлау процессының чисталыгын бәяли. Кыз безнең илдә өйрәнерлек нәрсәләр барлыгын әйтте.
«Сез сайлауларны 3 көн дәвамында үткәрәсез. Ә бездә тавыш бирү өчен бер көн бирелә. Бу бик кызыклы тәҗрибә. Индонезиядә халык саны Россиягә караганда ике тапкыр күбрәк, шуңа күрә өч көн күпкә уңайлырак», диде Деви Рахмавати.
Халыкара экспертлар һәм күзәтүчеләр Доминикан Республикасыннан, Бангладештан, Индонезиядән, Испаниядән һәм Танзаниядән килгәннәр. Алар Россиядә дәүләт башлыгын сайлауга җитди карауларын ассызыкладылар.
«Барыннан да бигрәк мине барысы да яхшы оештырылган булуы гаҗәпләндерде. Һәр участокта камералар урнаштырылган, һәр җирдә барысы да регламент буенча бара һәм сайлау пунктларының берсендә дә хокук бозулар юк. Һәркем теләсә нинди мәгълүмат бирергә, сорауларга җавап бирергә әзер, һәрвакыт диалогка ачык», — ди Танзания эксперты Фрэнсис Альфред Мвакабумбе.
Экспертлар безнең илдә тавыш бирүнең ничек узуын үзләрендәге белән чагыштырып, охшаш элементлар да, аермалар да барлыгын билгеләп үттеләр. Әйтик, Россия өчен сайлаулар – бәйрәм ул, өлкәннәрнең балалар белән килүе һәм барысының да яхшы кәефтә булуы.
«Барысы да яхшы атмосферада уза, барысы да закон нигезендә оештырылган. Барлык нормалар үтәлә. Һәм гаҗәп, боларның барысы да чыннан да бәйрәмчә бара. Димәк, кешеләр өчен бу бәйрәм», - дип ассызыклады Испаниядән Хосе Мануэль Менедес Манхон.
Әгәр сайлаучылар өчен сайлаулар бәйрәм булса, күзәтүчеләр һәм экспертлар өчен мөһим миссия. Алар тавыш бирү процессын гына бәяләп калмый.
«Без сайлау участогын ябуда, шулай ук тавышларны санаганда катнашачакбыз. Мин хәзер без булачак сайлау участогын төгәл әйтә алмыйм, әмма бездә бу программа буенча планлаштырылган. Шулай ук беренчел нәтиҗәләрне дә белербез», — дип уртаклашты Доминикан республикасы эксперты Джоэль Ирисарис Паулино Кастелланос.
Халыкара экспертлар участокларда сайлаучыларның ничек тавыш бирүен, Россия күзәтүчеләренең ничек эшләвен күрә алды. Чит ил кунаклары ил Президентын сайлауны югары технологияле дип атады.
Искәртеп узыйк, Россия Президентын сайлау 15 мартта башланды. Ул 3 көн дәвам итәчәк. Татарстанда 65 территориаль һәм 2722 участок сайлау комиссиясе эшли, шулай ук хастаханә, шифаханә, тикшерү изоляторы, вокзал һәм аэропортта вакытлыча 45 сайлау участогы бар.
3 миллионга якын Татарстан кешесе сайлау хокукына ия. Сайлау уздыруны сайлау комиссияләренең 22 мең әгъзасы тәэмин итә. Сайлау участокларында 16 меңнән артык күзәтүче эшли, шул исәптән чит ил күзәтүчеләре дә бар. Россия Федерациясе Президентын сайлау 8нче тапкыр үткәрелә, быел ул 15, 16 һәм 17 мартта уза.
Сайлауда 4 кандидат – Владислав Даванков («Яңа кешеләр» партиясеннән), Леонид Слуцкий (ЛДПР партиясеннән), Николай Харитонов (КПРФ партиясеннән) һәм Россиянең хәзерге Президенты Владимир Путин (үзен-үзе тәкъдим итүче) катнаша.