Чаллы мэры Наил Мәһдиев тиз арада өй түбәләреннән карны чистартырга кушты

Чаллы мэры аппарат киңәшмәсендә, кар ишелеп төшмәсен өчен торак йорт һәм социаль объект түбәләреннән һәм түбә кыекларыннан карны чистартырга кушты. Наил Мәһдиев республикада соңгы көннәрдә булган берничә вакыйганы искә төшерде, дип яза «Татар-информ».

«9 катлы йорттан зур кар кисәге төште. Бала имгәнгән, хастаханәгә китерелгән, хәле авыр дип бәяләнә. Шулай ук үтеп баручы ир-ат та зыян күрде», - дип сөйләде ул республика шәһәрләренең берсендә булган гадәттән тыш хәл турында.

«Безнең мәктәпләр, мәктәп директорлары, соңыннан РФ Җинаять кодексының 238нче маддәсе буенча тикшерүче каршында тормас өчен проблемалар тудырырга кирәкми, аның буенча ваемсызлык аркасында иректән мәхрүм итәргә мөмкиннәр. Һәм әгәр сиңа ышанып тапшырылган объектта өлкәннәр яки бала зыян күрсә, нинди күңел халәте белән йөрергә кирәк. Беркемне дә бу эшкә чакырырга җыенмыйм, мин сезгә кушам», - диде шәһәр җитәкчесе.

Моннан тыш, ул Татарстан Рәисе Рөстәм Миңнеханов катнашындагы шимбә киңәшмәсен искә төшерде, анда бу мәсьәләдә тәртип урнаштыру буенча йөкләмә яңгырады.

«Кеше күп йөри торган керү урыннарыннан башлагыз. Моңа игътибар итегез, коммерция предприятиеләре кул селтәмәсен өчен җитди шөгыльләнә башлауларын таләп итегез. Мондый куркыныч бар, көн дәвамында нульдән югары температура өстенлек итә», - дип мөрәҗәгать итте ул башкарма комитет җитәкчесенең беренче урынбасары Илья Зуевка.