«Крокус» белән идарә итүче компания концерт залын торгызырга вәгъдә итте

Мәскәү өлкәсе Красногорск шәһәрендә теракттан соң янган «Крокус Сити Холл» концерт залы торгызылачак. Бу хакта объект белән идарә итә торган «Крокус Интернешнл» компаниясенең матбугат хезмәте хәбәр итә.

«Без террорчыларның корбаны булганнарны беркайчан да онытмаячакбыз. Аларның пычрак куллары белән җимерелгән объект торгызылачак», диелгән компания сайтындагы хәбәрдә.

«Крокус Интернешнл» «кайгы уртаклашу» белдерде һәм «хакимиятләргә һәм махсус хезмәтләргә, шулай ук һөҗүм корбаннарына ярдәм итү өчен мөмкин булганның барысын да эшләргә», вәгъдә итте.

«Россия белән без һәлак булганнар өчен кайгырабыз һәм бу коточкыч фаҗигадә зыян күрүчеләрнең тизрәк терелүенә өметләнәбез», - диделәр компаниядә.

Моннан тыш, фирма концерт залы командасына рәхмәт белдерде. Хәбәрдә әйтелгәнчә, алар «профессиональ, төгәл һәм геройларча» эш иткән, шуның аркасында кунакларның һәм хезмәткәрләрнең күбесе котылып кала алган.

Җомга, 22 мартта, Мәскәү өлкәсендәге концертлар залына һөҗүм ясалды. Тикшерү комитетының соңгы мәгълүматлары буенча 133 кеше һәлак булган санала. Гадәттән тыш хәлләр министрлыгы күптән түгел искәрткәнчә, зыян күрүчеләр 154 кешегә җиткән. Шимбә, 23 мартта Россия Президенты Владимир Путин гражданнарга мөрәҗәгать белән чыгыш ясады, анда якшәмбе көнен илкүләм матәм көне дип игълан итте.

Россиянең күп шәһәрләрендә мемориаллар барлыкка килде. Татарстанда, аларны Казан, шулай ук Чаллы, Түбән Кама, Әлмәт, Яшел Үзән һәм Менделеевскида оештырдылар.

Татарстан Республикасы Рәисе Рөстәм Миңнеханов һәм республика Дәүләт Советы Рәисе Фәрит Мөхәммәтшин һәлак булганнарның туганнары һәм якыннарының кайгысын уртаклашты.