Путинга «Крокус»та булган хәлләр турында беренче минутта ук хәбәр иткәннәр
Россия Президенты Владимир Путин Мәскәү өлкәсендә «Крокус Сити Холл» концерт залында булган хәлләр турында беренче минуттан ук докладлар ала башлаган. Бу кадрлар «Мәскәү. Кремль. Путин» программасында китерелгән. «Россия 1» телеканалы хәбәрчесе Павел Зарубин видеодан өзекне Телеграм-каналында урнаштырган.
Журналист сүзләренчә, Россия лидерына телефоннан РФ Иминлек федераль хезмәте директоры Александр Бортников, РФ эчке эшләр министры Владимир Колокольцев, РФ Тикшерү комитеты рәисе Александр Бастрыкин, Росгвардия директоры Виктор Золотов, РФ вице-премьеры Татьяна Голикова, Россия Гадәттән тыш хәлләр министрлыгы җитәкчесе Александр Куренков, РФ сәламәтлек саклау министры Михаил Мурашко һәм Мәскәү өлкәсе губернаторы Андрей Воробьев кебек түрәләрдән хәбәрләр килгән.
Путинга «Крокус»ка һөҗүм турында беренче минутларда ук хәбәр итүләре турында Кремль вәкиле Дмитрий Песков хәбәр итте.
Җомга, 22 мартта, Мәскәү өлкәсендәге концертлар залына һөҗүм ясалды. Тикшерү комитетының соңгы мәгълүматлары буенча 133 кеше һәлак булган санала. Гадәттән тыш хәлләр министрлыгы күптән түгел искәрткәнчә, зыян күрүчеләр 154 кешегә җиткән. Шимбә, 23 мартта Россия Президенты Владимир Путин гражданнарга мөрәҗәгать белән чыгыш ясады, анда якшәмбе көнен илкүләм матәм көне дип игълан итте.
Россиянең күп шәһәрләрендә мемориаллар барлыкка килде. Татарстанда, аларны Казан, шулай ук Чаллы, Түбән Кама, Әлмәт, Яшел Үзән һәм Менделеевскида оештырдылар. Татарстан Республикасы Рәисе Рөстәм Миңнеханов һәм республика Дәүләт Советы Рәисе Фәрит Мөхәммәтшин һәлак булганнарның туганнары һәм якыннарының кайгысын уртаклашты.