Новости за 06.03.2024

Башкортстан Башлыгы Радий Хәбиров татар җәмәгатьчелеге белән очрашты. Даян Мурзин исемендәге Күп профильле көллиятнең тарих укытучысы, Кушнаренко районы татар конгрессы җитәкчесе Илфир Котдусов әлеге очрашуга карата үз фикерен белдерде.

Новосибирск мөфтияте 5-6 мартта шәһәрнең тарихи «Ихлас» мәчетендә бәйге үткәрә. Бу хакта Россия мөселманнары Диния нәзарәтенең матбугат хезмәте хәбәр итә.

Казанның «Ак барс» көрәш сараенда көрәш буенча Татарстан беренчелеге башланды. Ярышларда унбер үлчәү авырлыгында 300дән артык көрәшче бил алыша.

Россия гражданнарына РФ Президентын сайлауда аларны сайлаучылар исемлегенә кертүләрен ничек тикшерергә икәнен аңлаттылар.

Федерация Советында дәүләт маркетплейсы булдырырга тәкъдим иттеләр. Кичә югары палатаның Икътисади сәясәт комитеты рәисе урынбасары Иван Абрамов РФ Сәүдә һәм сәнәгать министрлыгының Эчке сәүдәне үстерү департаменты башлыгы урынбасары Юлия Юдинага шундый инициатива белән мөрәҗәгать итте, дип яза «Ведомости» газетасы.

Татарстанда гамәлдә булган дәүләт бушлай юридик ярдәм системасына үзгәрешләр кертелде. Шул хактагы республика законы 1 марттан үз көченә керде, дип хәбәр итә ТР Юстиция министрлыгының матбугат хезмәте.

Россия Президенты Владимир Путин агросәнәгать комплексы вәкилләре белән очрашуда фермер хуҗалыкларын ташламалы газлаштыру һәм мондый программаны тизәйтү мәсьәләсен хәл итәргә вәгъдә бирде. Бу хакта РИА Новости агентлыгы хәбәр итә.

Татарстан хезмәт, халыкны эш белән тәэмин итү һәм социаль яклау министры Эльмира Зарипова Казан дары заводының хезмәт коллективы белән очрашты һәм предприятиенең хезмәт династияләре вәкилләрен бүләкләде. Бу хакта ул җитәкли торган ведомствоның матбугат хезмәте хәбәр итә.

Әлмәттә күптән түгел ачылган мәхәллә мәчетенең имам-хатыйбы Фәһим хәзрәт Әхмәтҗанов мәчет шоу күрсәтә торган урын түгел, ә халыкка гыйбадәт кылу өчен хезмәт итә торган урын, ди. Шуңа күрә бу мәхәллә мәчетен тыныч кына ачтык та, эшли дә башладык, диде ул «Татар-информ» хәбәрчесенә.

Татарстанның Арча районында «Тукай эзләре буенча» туристик маршрут төзекләндереләчәк. Ул Ия елгасы яр буе буйлап 3 гектардан артык мәйданда урнашачак һәм Яңа Кырлай авылындагы шагыйрь музеен һәм Сәгъди музей-йортын берләштерәчәк, дип язылган дәүләт сатып алулары порталындагы тендерда.

Өч Дума фракциясе вәкилләре икенче һәм өченче балага ана капиталы күләмен 1 миллион сумга кадәр арттыру турында закон проектын әзерлиләр, дип хәбәр итте Дәүләт Думасының Хезмәт комитеты рәисе һәм либерал-демократлар фракциясе әгъзасы Ярослав Нилов үзенең Telegram-каналында. Бу хакта РИА Новости яза.

Татарстан кинематографиясенең 100 еллыгы уңаеннан «Татаркино» оешмасы тармак ветераннарын Тукай исемендәге Татар дәүләт филармониясе залына җыячак. Юбилей уңаеннан чаралар ел дәвамында барса да, юбилей тантанасы 13 март көнгә билгеләнгән.

Татарстанда бүген аязучан болытлы һава көтелә, иртән урыны белән аз гына кар ява. Бу хакта республиканың Гидрометеорология һәм әйләнә-тирәне күзәтү үзәге матбугат хезмәте хәбәр итә.

2024 елның 4 июленнән 7 июленә кадәр Татарстан Рәисе Рөстәм Миңнеханов ярдәме белән Борис Березовскийның «Алабугада җәйге кичләр» VI Халыкара музыка фестивале узачак. Бу хакта Алабуга дәүләт музей-ядкарьлегенең рәсми порталында хәбәр ителә. «Алабуга нуры» шул хакта яза.

Чирмешәннең Туймәттә авылында яшәүче Наилә һәм Рамил Кәримовлар гаиләсе «Гаилә тарихында гасырлар кайтавазы – Тарихта без эзлебез» нәсел шәҗәрәләренең республика фестиваленең муниципаль этабында җиңү яулап, бүләккә бирелгән 50 мең сумлык сертификатны махсус хәрби операциядә катнашучы якташларына җибәрде. Бу хакта «Безнең Чирмешән» яза.

8 март – Халыкара хатын-кызлар алдыннан Саба районында волонтер ханымнар белән солдат аналарын хөрмәтләделәр. Иң элек Коръән укып, Аллаһы Тәгаләдән ил-көннәрнең тынычлыгын, яуга киткән егетләрнең исән-имин кайтуларын сорап, күмәкләшеп дога кылынды. Бу хакта http://saby-rt.ru/ хәбәр итә.

Әлмәт районының Тайсуган авылында ат өстендә «Аударыш» ярышы узды. Ярыш нәтиҗәләре буенча Лениногорск нефть техникумының 2нче курс студенты Нияз Галиуллин 70 килограммга кадәрге авырлык категориясендә 2нче урынны алды. Бу хакта Лениногорск нефть техникумының Вконтакте социаль челтәрендәге сәхифәсендә хәбәр ителә, дип яза «Заман сулышы».

Түбән Кама районында күп балалы гаиләләр саны арткан. Мәгълүмат белән ЗАГС идарәсе башлыгы Гүзәлия Сәгыйтова «эшлекле дүшәмбе» дә таныштырды, дип яза http://nkamsk-rt.ru.