Новости за 26.03.2024

Татарстанда ТР Спорт министрлыгы инициативасы белән гольф буенча республика спорт мәктәбе барлыкка киләчәк. Спорт министрлыгы үз өстенә оештыручы вәкаләтләрен дә ала. Бу республика Хөкүмәте карарыннан билгеле булды.

Тикшерү комитеты судтан Мәскәү өлкәсендәге «Крокус Сити Холл»да теракт эше буенча сигезенче гаепләнүчене кулга алуны сорый. Бу хакта ТАСС судның матбугат хезмәтенә сылтама белән хәбәр итә.

Татарстан Республикасы вице-премьеры Евгений Варакин Лисичанск торак-коммуналь хуҗалыгы идарәсе башлыгы Александр Сосновский белән күчмә киңәшмә үткәрде. Шеф-регион кураторы 2024 елда комплекслы төзекләндерү үткәрү өчен исемлеккә кертү планлаштырылган күп фатирлы йортларны карап чыкты.

Россиядә түләүсез медицина ярдәме күрсәтүнең дәүләт гарантияләре программасы киңәйтелде. Тиешле карарны Премьер-министр Михаил Мишустин имзалады.

Бүген Татарстан Республикасы Рәисе Рөстәм Миңнехановка Татарстан Республикасы хәрби комиссары итеп билгеләнгән Юрий Беляевны тәкъдим иттеләр. Бу хакта ТР Рәисенең матбугат хезмәте хәбәр итә.

2023 ел нәтиҗәләре буенча Россиядә туу коэффициенты 1,41 тәшкил итте һәм күпьеллык минимумны яңартты. Моннан түбәнрәк күрсәткеч 2007 елда гына – 1,31 булган, дип хәбәр итә РБК Федераль дәүләт статистикасы хезмәтенең (Росстат) беренчел мәгълүматларына сылтама белән.

Россиялеләргә энергия системасына йөкләнешне киметү буенча эксперимент тәкъдим итәргә мөмкиннәр. Моның өчен алар билгеле бер вакытта көнкүреш приборларын сүндерергә тиеш булачак, дип хәбәр итә «Коммерсантъ» Энергетика министрлыгы инициативасына сылтама белән.

Гаепләнүчеләр заказчылар һәм Мәскәү өлкәсендәге «Крокус Сити Холл»да теракт әзерләүдә ярдәм итүчеләр турында җентекле күрсәтмәләр биргән. Бу хакта кичә РФ Президенты Владимир Путинга Тикшерү комитеты башлыгы Александр Бастрыкин хәбәр итте.

Россия хөкүмәте башлыгы Михаил Мишустин россиялеләрнең хезмәт хаклары һәм реаль керемнәре артты дип белдерде.

«Канун. Парламент. Җәмгыять» тапшыруының элекке алып баручысы, журналист Әнзия Ханнанова «Татар журналисты» сәхифәсенә биргән әңгәмәсендә журналист һөнәренең үзенчәлекләре турында сөйләде.

Татарстанда Саклану министрлыгы белән контракт төзүчеләргә бер тапкыр бирелә торган 400 мең сум түләүне 1 апрельгә кадәр озайттылар.

Татарстан башкаласы мәктәпләрендә пилотсыз очкычларны эшләргә, җитештерергә һәм эксплуатацияләргә өйрәтү буенча махсус җиһазландырылган сыйныфлар ачылачак. Чараларны гамәлгә ашыру турындагы карар хокукый мәгълүмат порталында бастырылган, дип хәбәр итә Казан мэриясе матбугат хезмәте.

Татарстанга көньяктан кыр казлары һәм челәннәр кайта башлады. Күчмә кошларны республиканың Чүпрәле районында күреп алдылар, дип хәбәр итә ТР биоресурслар буенча дәүләт комитетының матбугат хезмәте.

Казанның 8 меңнән артык укучысы мәктәп яны лагерьларында ял итә, алар 160 белем бирү учреждениесендә оештырыла. Сменаларның төп темасы – «Гаилә һәм Туган ил – бердәм».

Бүген, 26 мартта, көньяктан килгән циклон Татарстанда һава шартларының начарлануына китерәчәк. Температура фоны бераз төшәчәк, дип хәбәр итә ТР Гидрометеоүзәге.

Әлмәт студентлары төбәккә туристларны җәлеп итү өчен үз идеяләрен тәкъдим иттеләр. Алар үз проектларын музейда узган очрашуда тәкъдим иттеләр. Бу хакта «Әлмәт таңнары» хәбәр итә.

Саба районы Төбәк авылы хатын-кызлары махсус хәрби операциядәге егетләргә кулдан токмач кисүне оештырды. Бу хакта http://saby-rt.ru/ хәбәр итә.

Актанышта Тантаналар залында 22 мартта зур бәйрәм узды. 2024 елда Актаныш, Аеш, Яңа Кадермәт авылларында яшәп алтын, зөбәрҗәт, тимер туйларын каршылаган парларны Актаныш районы башлыгы Ленар Зарипов тәбрик итте. Бу хакта «Актаныш» сайтында хәбәр ителә.

Минзәлә районы Урыс гомумбелем бирү мәктәбендә язгы «Мәрхәмәт» атналыгы бара. Аның кысаларында мәктәптә хәйрия ярминкәсе дә оештырылган. Бу хакта «Минзәлә» сайтында хәбәр ителә.

Балтач районы Шода авылы мәчетендә Җәмил хәзрәт ярдәме белән зурлап ифтар мәҗлесе уздырганнар. Шулай ук «Якты юл» җәмгыяте ит белән ярдәм иткән. Бу хакта «Хезмәт» сайтында хәбәр ителә.