Новости за 27.03.2024

Казанда узган «Иң яхшы татар теле һәм әдәбияты укытучысы-2024» Бөтенроссия бәйгесендә Самара шәһәренең «Яктылык» мәктәбе туган (татар) тел һәм әдәбият укытучысы Румия Исмәгыйлева «Туган телләрне укытуда заманча технологияләр» номинациясендә җиңүче дипломы белән бүләкләнде. Бу хакта «Самар татарлары» сайты хәбәр итә.

Россия гражданнарына чит илгә барырга әзерләнгәндә куркынычлар турында җентекләп уйларга кирәк. РФ Эчке эшләр министрлыгында аңлатуларынча, россиялеләр чик аша үткәндә «үз ихтыяры белән чит ил юрисдикциясенә эләгүен, барырга җыенган илнең закон һәм нормаларын үтәргә бурычлы искәнен» исәпкә алырга тиеш. Бу хакта РИА Новости агентлыгы хәбәр итә.

Бүген Татарстанда яңгыр, җепшек кар һәм кар көтелә, явым-төшем күләме тәүлегенә 15-30 миллиметр тәшкил итәчәк. Бу хакта ТР Гидрометеорология һәм әйләнә-тирә мохитне күзәтү идарәсенең матбугат хезмәте хәбәр итә.

Кичә Казан шәһәренең Апанай мәчете мәдрәсәсендә Бөтендөнья татар яшьләре форумының фикер алышуы булды.

Татарстан Рәисе Рөстәм Миңнеханов эш сәфәре белән Үзбәкстанның Сурхандәрья өлкәсенә килде. Термез шәһәренең халыкара аэропортында аны өлкә хокиме Улугбек Косимов каршы алды. Бу хакта «Татар-информ» агентлыгына ТР Рәисенең матбугат хезмәте җитәкчесе Лилия Галимова хәбәр итте.

5 апрельдә, Изге Рамазанның соңгы җомга көнендә, Казанда хәйрия маршруты оештырыла. Беренче тапкыр ул рейска Рамазан ае хөрмәтенә мөфтиятнең «Зәкят» хәйрия фонды башлангычы белән узган ел чыкты һәм казанлылар аны хуплап каршы алды. Бу турыда Татарстан Диния нәзарәте хәбәр итте.

«Туган тел» Самара өлкәсе татар җәмгыяте Президенты, Самара өлкәсе татар эшкуарларына ярдәм итү ассоциация идарәсе рәисе Ильяс Шәкүров Самара өлкәсе универсаль фәнни китапханәсенең комплектлау бүлегенә бушлай басмалар тапшырды. «Самара татарлары» сайтында шул хакта хәбәр ителә.

«Җиңү диктанты» Бөтенроссия акциясе 26 апрельдә узачак, акция алтынчы тапкыр узачак, дип хәбәр итә Россия хәрби-тарихи җәмгыяте. Бөек Ватан сугышы тарихын белү буенча тест бөтен Россия һәм чит илләрдә була. Бу турыда Татарстан Мәгариф һәм фән министрлыгы хәбәр итте.

Ульяновскиның «Өмет» газетасында «Татар мәктәбе» дигән язма чыкты.

2004 елның 1 сентябрендә Ульяновск өлкәсе җитәкчелеге карары белән Димитровград шәһәрендә Габдулла Тукай исемендәге 22 нче татар этномәдәни компонентлы мәктәп ачылды.

Хәзерге вакытта бу мәктәптә 300гә якын бала укый. Алар татар теле һәм әдәбиятын аерым фән буларак өйрәнәләр. Биредә класстан тыш һәм мәктәптән тыш тәрбия чаралары үзебезнең ана телебездә үткәрелә. Мәктәпне тәмамлаучы барлык егетләр һәм кызлар да БДИны югары балларга тапшырып... Читать дальше...

Әлмәттә җитәкчеләргә Мәскәү өлкәсендәге фаҗигале вакыйгалардан соң иминлек чараларын көчәйтү йөкләмәсе бирелде. Бу хакта район башкарма комитеты җитәкчесе Айдар Каюмов шәһәр активы киңәшмәсендә чыгыш ясаганда белдерде. Бу хакта «Әлмәт таңнары» яза.

Түбән Камада Корабельная һәм Студентлар урамнарында юлларга капиталь ремонт ясалачак. Бу мәгълүмат дәүләт сатып алулары порталында чыкты. Бу хакта http://nkamsk-rt.ru/ хәбәр итә.

Саба районы Шәмәрдән участок урманчысы Илгиз Зиннәтуллин Эзмә урта мәктәбе укучыларына «Калатау» мәктәп урманчылыгы биләмәсендә «Сыерчык ояларын ничек дөрес беркетергә?» дигән ачык дәрес үткәрде. Бу хакта http://saby-rt.ru/ хәбәр итә.

«Ел хатын-кызы. Ел ир-аты – хатын-кыз карашы» зональ бәйгесе Аксубай районы вәкилләре өчен уңышлы узды – ике катнашучы бәйге җиңүчеләре булды. Бу хакта «Авыл таңнары» хәбәр итә.