Новости за 28.03.2024

Казан Кремлендә сәнәгать, төзелеш һәм транспорт хезмәткәрләрен, медицина, мәдәният, гаммәви мәгълүмат чаралары һәм башка өлкә вәкилләрен бүләкләү тантанасы булды. Чарада республика Премьер-министры Алексей Песошин катнашты.

«Ялкын» редакциясе һәм Татарстанның актив яшүсмерләре ТР Мәгариф һәм фән министры Илсур Һадиуллин белән очрашты. Очрашуда Татарстан шәһәр, районнарыннан 15 егет һәм кызлар катнаша.

Бүген Татарстан Язучылар берлеге рәисе Ркаил Зәйдулла Берлекнең яңа әгъзаларына таныклыклар бирде. Таныклыклар Рәмис Латыйпов, Фирдүс Гыймалтдинов, Гүзәл Галләмова, Алинә Хисамиева, Гөлчәчәк Садретдинова, Рауза Хуҗиәхмәтоваларга тапшырылды.

Бердәм дәүләт имтиханының сынауны яңадан тапшыруны исәпкә алган яңа расписаниесен апрель ахырына кадәр расларга мөмкиннәр, дип белдерде Мәгариф һәм фән өлкәсендә күзәтчелек федераль хезмәте (Рособрнадзор) башлыгы Анзор Музаев. Бу хакта РИА Новости агентлыгы хәбәр итә.

Чиләбе өлкәсе татарлары конгрессы Кунашак муниципаль районы хакимиятенең Мәгариф идарәсе белән берлектә балаларны «Йолдызлык» милли лагерена чакыра. Бу хакта Бөтендөнья татар конгрессының матбугат хезмәте хәбәр итә.

30 мартта Казанның «Корстон» үзәгендә узачак «Бизнес-ифтар» форумында катнашучы һәр эшмәкәр теләкләр агачында язылган бер хыялны чынга ашыра алачак. Бу хакта оештыручылар «Татар-информ» агентлыгында узган матбугат очрашуында сөйләде.

Гаризалар күп килү сәбәпле, «Рамазан Кәрим – 2024» хәйрия акциясен оештыручылар аз керемлеләргә өләшү өчен азык-төлек җыелмаларының өстәмә партиясен бүлеп бирде. +7 495 150 16 70 телефоны буенча гаризалар кабул итү яңадан башлана. Бу хакта Россия мөселманнары Диния нәзарәтенең матбугат хезмәте хәбәр итә.

29 мартта «Казан Экспо» Халыкара күргәзмә үзәгендә узачак 12нче Республикакүләм ифтарда куркынычсызлыкны тәэмин итү чараларын арттырачаклар, дип хәбәр итә ТР Диния нәзарәте.

Орел өлкәсе мөселманнары Диния нәзарәтенең (Орел мөхтәсибәте) барлык гыйбадәт йортларында - Орел, Мценск, Болохово, Новосиль шәһәрләрендә, Новосиль районының Заречье бистәсендә һәм Залегощь районында көн саен ифтарлар уза һәм тәравих намазлары укыла. Бу хакта Россия мөселманнары Диния нәзарәтенең матбугат хезмәте хәбәр итә.

Татарстанның 39 муниципаль берәмлегендәге 13 меңнән артык кеше яши торган 220 торак пункт су басу зонасында калырга мөмкин. Республика вице-премьеры Рөстәм Нигъмәтуллин шулай дип белдерде.

Россиядә 1 апрельдән машина йөртү таныклыгы алу өчен имтихан тапшырганда СНИЛС та кирәк булачак, диелә Хөкүмәт карарында. Бу хакта РИА Новости агентлыгы хәбәр итә.

Программа хәзер тест режимында эшли. Аның ярдәмендә югары уку йорты студентлары һәм хезмәткәрләренең эшләре сайлап тикшерелә.

Татарстанда җәмәгать туклануы объектларында алкогольне ваклап сату вакытын чикләргә, шулай ук сыра, медовуха һ.б. эчемлекләр сатып алырга мөмкин булган урыннар санын киметергә ниятлиләр. ТР Рәисенең шул хактагы закон проекты коррупциягә каршы экспертиза уза.

30 мартта Казанда «Корстон» үзәгендә узачак «Бизнес-ифтар» бизнес җәмәгатьчелеге форумында катнашучылар арасында кече хаҗ – Гомрәгә юллама уйнатылачак.

26 март көнне Бөтендөнья татар яшьләре форумы Апанай мәчете мәдрәсәсендә ифтар уздырды.Чара кысаларында татар яшьләре үзләренең проектлары турында сөйләде һәм нәтиҗәләре белән уртаклашты.

Галиев мәчетендә Үзбәкстан Республикасының Казандагы Генераль консуллыгына яңартылган «Казан басмасы»ның бер өлешен тапшыру тантанасы булды. Татарстан Мөфтиенең беренче урынбасары Илфар хәзрәт Хәсәнов Мүсхәфне Үзбәкстанның Казандагы Генераль консуллыгының беренче сәркатибе Азизбәк Разаковка тапшырды.

Картлык, инвалидлык, туендыручысын югалту сәбәпле һәм ата-аналары билгесез булган балаларга социаль пенсияләр Россиядә быелның 1 апреленнән 7,5 процентка индексацияләнәчәк, дип сөйләде РИА Новостига Социаль анализ һәм фаразлау институтының өлкән фәнни хезмәткәре Виктор Ляшок. «Быелның 1 апреленнән социаль пенсияләр 7,5 процентка индексацияләнәчәк: картлык, инвалидлык, туендыручысын югалту сәбәпле, шулай ук ата-аналары билгесез булган балаларга», - диде ул.

Казанда «Игелек кәрзине» акциясе кысаларында 1052 кг азык-төлек җыелган. Якын көннәрдә аларны сәламәтлеге ягыннан мөмкинлекләре чикле кешеләргә, күп балалы һәм аз керемле гаиләләргә, шулай ук хәрбиләрнең якыннарына тапшырачаклар. Бу хакта Казан мэриясе хәбәр итә.

Бүген, 28 мартта, Татарстанда болытлы һава торышы көтелә. Бу хакта республиканың Гидрометеорология үзәге хәбәр итә.

Лаеш районына Краснодардан туристлар килде. Алар Атабай авылында татар халык мәдәнияте белән танышты. Бу хакта «Кама ягы» сайтында хәбәр ителә.

Казанда укучы кызлар һәм егетләр арасында «Ак калфак» VII Бөтенроссия бәйгесе тәмамланды. Биредә 11 төбәктән 162 катнашучыдан 7 егет һәм 8 кыз финалга сайлап алынган. Иң куанычлысы шушы иң-иңнәр арасында Зәйнең Ринат Фәрдиев исемендәге татар гимназиясе IX укучысы Әминә Хөснетдинова бар. Алай гына да түгел, Әминә бәйгенең иң зур бүләге — Гран-прига лаек булды. Бу хакта «Зәй яңалыклары» хәбәр итә.

Әлмәт районы башлыгы Тимур Нагуманов Татарстан министрлыклары һәм ведомстволары җитәкчеләренең, район һәм шәһәр башлыкларының медианәтиҗәлелек рейтингында 2023 елның дүртенче кварталы йомгаклары буенча 5нче урында калды. Бу хакта «Әлмәт таңнары» хәбрә итә.

Балтачның 4нче балалар бакчасы базасында «Яшел ут-2024» республика смотр-конкурсының муниципаль этабында катнашучыларга дипломнар һәм призлар тапшыру тантанасы булды. Бу хакта «Хезмәт» сайтында хәбәр ителә.

Теләче авылының «Ихлас» мәчетендә шәхси эшмәкәр Расих Габдрахманов иганәсенә ифтар мәҗлесе үткәрелде. Бу хакта «Теләче-информ» сайтында Фәнил Гаязов хәбәр итә.