Жазуучу Олжобай Шакир УКМКда сурак берип жатат
Жазуучу жана публиицист Олжобай Шакир Улуттук коопсуздук боюнча мамлекеттик комитетинде (УКМК) экенин укук коргоочулар билдирип жатышат. Атайын кызмат расмий маалымат тарата элек.
Жазуучуну бошотууну талап кылган бир нече активист, журналист жана укук коргоочулар жана анын жакындары УКМКнын имаратынын алдында топтолууда.
Олжобай Шакир жети сааттан бери дайынсыз болуп жатканын жакындары 23-августта айтып чыгышты.
Жубайы Назгүл Бодбаева жазуучу түшкө маал үйүндө жалгыз болгонун, ошондон бери дайыны билинбей жатканын "Азаттыкка" билдирди.
“Үйгө келсем ачык калыптыр, Олжобай жок. Телефону өчүк болуп жатат. Тууган, жакындары менен байланышпаптыр. Дайынын билбей жатабыз. Үйгө мен келген учурда Бишкек шаардык милиция кызматкерлери да келишти. Алар Олжобай айткан 31-августтагы акция тууралуу сурайлы деп келгенин айтышты”,- деди ал.
Кийинчерээк жазуучунун дайыны Улуттук коопсуздук комитетинин чыкканын "Кылым шамы" уюмунун жетекчиси Гүлшайыр Абдирасулова “Азаттыкка” билдирди. Анын айтымында, Олжобай Шакирди УКМКга суракка алып киришкен, жанында адвокаты бар экенин кабарлады.
Жазуучунун кармалганы тууралуу атайын кызмат комментарий бере элек.
52 жаштагы Олжобай Шакир бийликтин дарегине ачуу сын-пикир айтып келген. Негизинен Ысык-Көлдөгү төрт пансионаттын Өзбекстанга башкарууга берүүгө каршы чыккан. Президент Садыр Жапаров менен УКМК төрагасы Камчыбек Ташиевди маекке чакырып жүргөн. Мыйзамсыз аракеттерине каршы 31-августта нааразылык акциясын өткөрүү демилгесин көтөрүп жаткан.
Социалдык тармактарда журналист, активист, укук коргоочулар, жазуучу-акындар Олжобай Шакирдин суракка чакырылышын сындап, аны бошотууну талап кылып жатышат. Журналист Али Токтакунов Олжобай Шакир бийликке ачуу сыны, курч билдирүүлөрдү айтып жүргөнүн белгилеп, анын кармоо себебин түшүндүрүүнү талап кылды:
"Жакында төрт пансионаттын Өзбекстанга берилишине каршы митингге чыгарын жарыялаган. Жапаров-Ташиевди интервьюга чакырып, курч суроолорду берем деп жазган. Мунун баары анын Конституциялык укугу эмеспи! Эмнеси болсо да адегенде кармоонун расмий себебин түшүндүрүүнү талап кылабыз", - деп жазды ал Фейсбукка.
Олжобай Шакир соңку кездерде журналисттик иликтөөлөрдү жасаган Temirov Live командасы менен дагы кызматташып жүргөн.
Ал 2017-жылдары “РухЭш” коомдук агартуу багытындагы сайтты негиздеген. Сайт "Улут үлгүсү" жана "Улут абийири" сыйлыктарын уюштуруп, коомчулукта кадыр-баркка ээ, коомчулуктун көйгөйүн көтөрүп келген ишмерлерге берилип келет.
2019-жылы Бишкекте Абдылас Малдыбаев атындагы опера жана балет театрында акын жана жазуучу Олжобай Шакирдин "Дүк-дүк жүрөк" деген адабий-музыкалык поэзия кечесин өткөргөн.
Ушул аптада интернеттеги социалдык түйүндөр аркылуу коомдук маселелер боюнча өз оюн ачык билдирип жүргөн Төлөн уулу Бектемир эки күн катары менен суракка чакырылды.
Ага чейин Кемин шаардык кеңешинин депутаты Наталья Дубинина УКМКга сурак берип чыкты. Бул арада жарандык активист Өндүрүш Токтонасыровдун кылмыш иши прокуратурага өттү.
Айрымдар мындай көрүнүштү өлкө автократия тарапка баратканынын белгиси деп атап жатат. Кыргыз бийлиги өлкөдө сөз эркиндигине эч кандай басым же кысым жок экенин билдирип келет.