ЖК: Акаев Санарип министрлигиндеги Ширшовдун таасирин айтты
Жогорку Кеңештин Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин регламенти комитетинин жыйынында депутат Жанарбек Акаев Санарип өнүктүрүү министрлиги жана бул мекемеге берилген ишканалар, коррупциялык иштерде аты аталган Алексей Ширшовдун таасири тууралуу дагы маселе көтөрдү. Ал санарип өнүктүрүү министри кызматына көрсөтүлгөн Нурия Кутнаеваны айтылган дооматтарды жоюуга, паракорчулукка байланыштуу аты аталган адамдардан оолак болууга чакырды.
"Санарип өнүктүрүү министрлигине биз беш ишкананы дагы кошуп бергенбиз. Алар "Кыргыз почтасы", "Кыргыз телеком", "Альфа Телеком", "Дастан" заводу жана "Евразия сактык банкы". Сиз министр болуп барган жерде коррупциялык иштерде атагы чыккан Алексей Ширшовдун таасири абдан күчтүү. "МЕГА" ишканасына анын жакыны делген Евгения Судецтин күйөөсү Владимир Андросик дегендер кирген. Бул тууралуу сиздин маалыматыңыз бар. Сиз ошолордон кутулбасаңыз, анча-мынча жакшы иштериңиз көзгө көрүнбөй калышы мүмкүн. Мына ошондой адамдар мурдагы министр Иманов аркылуу "Дастанды" дагы башкарды, "МЕГА" дагы ошолордун колунда. Жакында эле "МЕГАнын" баасы бычылып, сатыкка коюлду. Бул маселе дагы күн тартибинде турат. "Евразия сактык банкы" тууралуу дагы маселе турат. Башка ишканалар дагы бул министрликке өткөндөн кийин кирешеси канча көбөйдү деген маселеге дагы биз сөзсүз кайрылабыз",- деди Акаев.
Аталган комитет министр кызматына Кутнаеванын талапкерлигин жактырды.
Жанарбек Акаев апрель айында парламентте бул министрликте Ширшовдун аты аталган айрым каржылык схемалар тууралуу маселе көтөргөн. Ал буга байланыштуу Эсептөө палатасынын төрагасы Алмазбек Акматовго кайрылып, жагдайга көңүл бурулушу керектигин эскерткен.
Анын алдында Евгения Судец Кыргызстандын Мамлекеттик өнүгүү банкынын жетекчилигинен өз арызы менен кеткен. Ал бул кызматка былтыр жыл аягында дайындалган. Ошол маалда анын жарым жыл мурда кыргыз жарандыгын алганы талаш-талкуу жараткан. Мурда орус жараны болгон Судец буга чейин көп жылдар бою Орусиянын ВТБ банкынын тутумунда ар кандай жетекчилик кызматтарды аркалаган.
Судецтин аты мамлекеттик “Альфа Телеком” ишканасы (мурдагы MegaCom, азыркы Mega мобилдик байланыш компаниясы) 14,6 миллиард сомго бааланып, сатыкка коюлганына байланыштуу чыккан журналисттик иликтөөдө аталган. Судец өзүнүн жана жолдошунун Максим Бакиев менен Алексей Ширшовго байланышы жок экенин билдирген.
Башкы прокурор Курманкул Зулушев депутат көтөргөн маселени карап чыгып жооп берерин билдирген.
Алексей Ширшов былтыр май айында кармалган жана көп өтпөй эле үй камагына чыккан. Улуттук коопсуздук комитети (УКМК) ал "Аврора плюс" пансионатындагы кымбат баалуу ондогон батир жана коттеждердин жеке менчикке өтүп кеткени боюнча козголгон кылмыш ишинин алкагында кармалганын билдирген. Аны үй камагына чыгаруу өтүнүчү менен атайын кызматтын Башкы тергөө башкармалыгы сотко кайрылганы белгилүү болгон.
Энергетикадагы коррупциянын көмүскө схемасын түзгөн делген адамдын кармалып, кайра тез эле эркиндикке чыгып кетиши коомчулукта сынга кабылган. Көп өтпөй Садыр Жапаров аны менен беш-алты ай мурда жолукканын, Максим Бакиевдин камакта турган миллиондогон долларын Кыргызстанга кайтарууга көмөктөшөрүн билдирген. Ошондой эле 2010-жылы Убактылуу өкмөт Ширшовго иш козгобогонун, издөөгө албаганын билдирген.
Ошол маалдагы Кыргызстандын Малайзиядагы элчиси, убагында Убактылуу өкмөттүн мүчөсү болгон Азимбек Бекназаров Ширшовго иш ачылган эмес деген сөздү төгүндөп чыккан.