Новости за 24.02.2024

Питрәч районы Керәшен Сәрдәсе авылы музееның фәнни хезмәткәре Олег Волков Көлкамәр авылы аксакалы Иван Долговка багышланган зур күргәзмә әзерләгән. Күргәзмәдә аның авыллар, мәктәпләр, нәселләр тарихына багышлаган язмалары, фотографияләре, шәхси әйберләре белән танышып була. Бу хакта «Алга» сайтында хәбәр ителә.

Көннәр салкын булу сәбәпле, Әгерҗедә «Россия чаңгы юллары» киңкүләмле спорт чарасы уздырылмый калган иде. Аны ир-егетләрнең бәйрәмендә озын ялларда оештырып ялгышмаганнар. Бүген «Орешник» ял паркына йөзләгән спорт сөюче һәм җанатарлар җыелды. Ярышка авыллардан да килүчеләр күп иде. «Әгерҗе хәбәрләре» шул хакта яза.

Түбән Кама халкы махсус хәрби операциядә катнашучыларга актив ярдәм итә. Шәһәрдә яшәүчеләргә уңайлы булсын өчен 22 гуманитар ярдәм җыю пункты эшли, алар микрорайоннарның иҗтимагый үзәкләрендә урнашкан. Бу хакта http://nkamsk-rt.ru/ хәбәр итә.

Кукмарада өстәл теннисы буенча «Район башлыгы кубогы»на район беренчелеге старт алды. Бүген «Барс Арена» спорт комплексында ярышларның беренче этабы узды. «Хезмәт даны» сайтында шул хакта хәбәр ителә.

Бүген Казанның «Ак Барс» хоккейчылары Хабаровск шәһәренең «Амур» командасын 4:2 исәбенә җиңде. Матч Казанда «Спорт сарае»нда узды.

Бүген Казанда Горки-Әмәт урманында III спорт-тарихи фестиваль «Кыш Батыр» фестивалендә «РФ Кораллы Көчләрендә контракт буенча хәрби хезмәт – Синең сайлавың!» акциясе башланды.

Түбән Кәминкә авылы мәчете нык иркенәйде. Биредә, эшләп килүче мәчеткә шул кадәр үк зурлыкта янкорма төзеп, мәдрәсә ачтылар. Бу хакта «Безнең Чирмешән» хәбәр итә.

Махсус хәрби операциядә катнашучы һәм ил тынычлыгы өчен көрәштә яу кырында башларын салган батыр солдатларның балаларын Кукмарада «Бакыр тау»да ватрушкада шуу өчен җыйдылар. Бу хакта «Хезмәт даны» сайтында хәбәр ителә.

Бүген Галиәсгар Камал исемендәге Татар дәүләт акпдемия театры оркестры солестлары «Бердәм дөнья телендә. Яңа» дип исемләнгән концерт программасын тәкъдим итә. Программада республикабызның яшь, талантлы, популяр композиторлары Эльмир Низамов, Ильяс Камал, Алсу Сөнгатуллина, Миләүшә Хәйруллина һ.б. әсәрләре яңгыраячак. Проектның авторы – Варвара Терехова. Оркестрның сәнгать җитәкчесе һәм дирижеры – Данияр Соколов.

Иртәгә, 25 февральдә, Татарстанда һава температурасы сизелерлек төшәчәк. Бу хакта Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Татарстан спорт министры Владимир Леонов БРИКС уеннарына әзерлек турында сөйләде, алар 11-23 июньдә Казанда уза.

24 февральдән 25 февральгә каршы төндә мөселманнар Шәгъбан аеның 15нче төнен, ягъни Бәраәт кичәсен каршы ала. Бу хакта Россия Мөфтиләр шурасы матбугат хезмәте хәбәр итә.

Мартта Россия Президенты сайлауда дистанцион электрон тавыш бирүдә катнашу өчен 3 миллионнан артык кеше гариза биргән. Бу хакта ТАСС Россия Цифрлы үсеш, элемтә һәм массакүләм коммуникацияләр министрлыгына сылтама белән хәбәр итә.

Россия Президенты Владимир Путин РФ Югары суды рәисе Вячеслав Лебедевның туганнарының һәм якыннарының, илнең барлык судьялар бергәлегенең кайгысын уртаклашу белдерде. Бу хакта Кремльнең матбугат хезмәте хәбәр итә.

Мәскәүдә «Россия» Халыкара күргәзмә-форумы эше кысаларында бүген сәламәтлек темасына багышланган Илкүләм казанышлар форумы уза.

Буа районы башлыгы Ранис Камартдинов Бөек Ватан сугышында катнашучы 104 яшьлек Рәүф Төхвәтуллинны Ватанны саклаучылар көне белән котлады. Район җитәкчесе ветеранның өенә барып, аңа бүләкләр тапшырды.

Татарстан Авыл хуҗалыгы һәм азык-төлек министрлыгы сортларын яңартырга планлаштырган хуҗалыкларга бөртекле культураларның Татарстан сортларын сатып алырга киңәш итә. Бу хакта Татарстан Рәисенең матбугат хезмәте хәбәр итә.

Кичә Россия Югары суды Рәисе Вячеслав Лебедев вафат булган. Аңа 79 яшь иде. Бу хакта РИА Новости хәбәр итә.

Социаль пенсиянең уртача күләме 2024 елның 1 апреленнән 938 сумга артачак һәм 13455 сум тәшкил итәчәк. Инвалид балалар 1392 сумга күбрәк пенсия алачак, уртача 19948 сум була. Балачактан 1нче төркем инвалидларга 20110 сум, инвалид-хәрби хезмәткәрләр өчен 18236 сум була. Хәрби хезмәткәрләрнең балаларына туендыручысын югалту буенча пенсия 15999 сумга кадәр арта. Бу хакта «Российская газета» яза.

«Киләчәк уеннары» Халыкара мультиспорт турнирында катнашучылар һәм кунаклар ярышлар уздыру мәйданчыгы - «Казан Экспо» халыкара күргәзмә үзәгенә электричкада һәм бушлай автобус-шаттлларда барып җитәргә мөмкин, ул «Җиңү проспекты» метро станциясеннән кузгала.

Татарстан мөфтие Камил Сәмигуллин якынлашып килүче Бәраәт кичәсе уңаеннан мөселманнарны котлый. Бүген кояш баегач, ислам календарендәге иң мөбарәк төннәрнең берсе - Бәраәт кичәсе керә. Ул Шәгъбан аеның 14еннән 15енә каршы төнендә, ягъни Изге Рамазан аена төгәл ике атна кала җитә.

Россия Мәгариф министрлыгы социаль челтәрләрдә махсус рубрикалар ярдәмендә халыкның финанс белемен арттырырга планлаштыра. «Татар-информ» журналистына хәбәр итүләренчә, проектны 2024 елның икенче кварталында эшләтеп җибәрү планлаштырыла.

«Татарстан» радиосында «Күрше хакы» дип исемләнгән өр-яңа тапшырулар циклы башланып китә. Беренче тапшыру бүген - 24 февральдә 13 сәгать 12 минутта эфирга чыга.

Шимбә, 24 февральдә, Татарстанда бозлавык һәм җил көньяктан секундына 4-9 метр тизлектә фаразлана. Явым-төшем ихтималы аз. Бу хакта Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

2023 елда Татарстанда «Хезмәт җитештерүчәнлеге» илкүләм проектында 248 предприятие катнашты. Илкүләм проектта катнашкан предприятиеләрнең 4 509 хезмәткәре һәм төбәк хакимият органнары вәкилләре хезмәт җитештерүчәнлеген арттыру инструментларын файдалану буенча укулар узды. Проектта катнашкан предприятиеләрнең 241 вәкиле «2021-2023 елларда җитештерүчәнлекнең лидерлары» идарәче кадрларны укыту программасын үтте. Әлеге мәгълүматларны ТР Сәнәгать һәм сәүдә министрлыгы хәбәр итте.