Новости за 08.02.2024

Татарстанның Тукай районында хәрбиләр өчен «ГАЗ – 66» автомобиле базасындагы автобустан мунча ясаган. Бу районнан махсус хәрби операциядә катнашучыларга җибәрелгән икенче мунча булып тора. Аны «Тукай Тепло-Газ» ҖЧҖдә хезмәт куючы ир-егетләр ясаган. Бу хакта «Якты юл» сайтында хәбәр ителә.

Төмән өлкәсенең «Яңарыш» газетасында «Боровскийда да татар телен өйрәнергә мөмкин» дигән язма чыкты.

2023 ел нәтиҗәләре буенча Нурлат районында тулаем территориаль продукт 85 миллиард сум тәшкил иткән. Бу моннан алдагы чор белән чагыштырганда 2 процентка күбрәк. Төяп җибәрелгән продукция күләме дә, шуның кадәр үк артып, 39 миллиард сум тәшкил иткән. Муниципалитет башлыгы Дамир Ишкинеев район Советы утырышында шул хакта хәбәр итте.

Бүген Саратовта Идел буе федераль округы дәүләт хакимиятенең закон чыгару органнары каршындагы Яшьләр парламентлары ассоциациясе утырышы булды. Утырыш эшендә ТР Дәүләт Советы Рәисе Фәрит Мөхәммәтшин катнашты. Бу турыда Татарстан Дәүләт Советы матбугат хезмәте хәбәр итте.

Бүген «Ак Барс» Чиләбенең «Трактор» хоккей командасын 2:1 исәбенә җиңде. Уен Казанда «Татнефть Арена» боз сараенда узды.

Удмуртиянең «Яңарыш» газетасы «Туй көнем һәм бүгенгем» дип аталган фотомарафон игълан итте. Бу турыда «Яңарыш» газетасының «ВКонтакте»дагы сәхифәсендә хәбәр ителә.

11 февральдә Сургутта «Сандугач» татар мәдәнияте коллективының балалар составы «Син кояш кебек!» дигән концерт программасы белән чыгыш ясаячак. Бу хакта Сургут татарлары милли-мәдәни автономиясенең «ВКонтакте» социаль челтәрендәге төркемендә хәбәр ителә.

2023 ел нәтиҗәләре буенча Нурлат районында уртача хезмәт хакы 56 мең сумнан арткан, бу моннан алдагы чор күрсәткечләрен дүрттән бер өлешкә узып киткән. Район муниципаль советы утырышында шул хакта билгеле булды, анда ТР Премьер-министры Алексей Песошин да катнашты. Бу турыда «Татар-информ» хәбәр итте.

Татарстан Хөкүмәте республикада Гаилә елын үткәрүне оештыру комитетын раслады. ТР вице-премьеры Ләйлә Фазлыева комитет рәисе итеп билгеләнде, диелә шул хактагы боерыкта.

Татарстан башкаласында кышның соңгы аеның беренче атнасында бүгенге буран нәтиҗәсендә айлык норма күләмендә кар яуды. Бу хакта «Татар-информ» агентлыгына Казан федераль университеты Экология һәм табигатьтән файдалану институтының метеорология, климатология һәм атмосфера экологиясе кафедрасы доценты Тимур Әүһәдиев хәбәр итте.

Башкортстан Республикасы Фәннәр академиясенең Башкорт энциклопедиясе институты коллективы Башкортстанның беренче Президенты Мортаза Рәхимовның тууына 90 ел тулу уңаеннан «Мортаза Рәхимов» энциклопедиясен әзерләгән һәм бастырып чыгарган. Бу хакта «Башинформ» агентлыгы яза.

Татарстан Рәисе Рөстәм Миңнеханов Discover Events компаниясенең идарә рәисе, Төркиянең Халыкара күргәзмә оештыручылар ассоциациясе президенты Юныс Эте белән «Россия – Ислам дөньясы: KazanForum» икътисади форумына әзерлек хакында фикер алышты. Бу хакта ТР җитәкчесенең матбугат хезмәте хәбәр итә.

Татарстан Рәисе Рөстәм Миңнеханов Азәрбайҗанда Президент сайлауларында җиңгән Илһам Алиевка котлау телеграммасы юллады. Тавыш бирү нәтиҗәләре гамәлдәге дәүләт башлыгының республика халкы алдындагы бәхәссез абруен раслады, дип язган ул. Бу турыда «Татар-информ» хәбәр итте.

Бүген Татарстан Республикасы Рәисе Рөстәм Миңнеханов Бөтенроссия җирле үзидарәне үстерү ассоциациясе рәистәше Ирина Гусева белән очрашты.

«Татмедиа»да 2024 елның беренче алты аена холдинг басмаларына язылучылар арасында бүләкләр уйнатылды. «Язылган өчен шифаханәгә юллама, телевизор һәм башка бүләкләр» акциясендә 452 кеше катнашты, алар арасында Татарстаннан гына түгел, Башкортстан Республикасы, Самара, Түбән Новгород өлкәләреннән дә газета-журналларга язылучылар бар иде. Төп бүләккә Балтач районы кешесе лаек булды.

Татарстан Премьер-министры Алексей Песошин Нурлат районында булды. Ул 2023 ел нәтиҗәләре буенча йомгаклау сессиясендә катнашты. Сәфәр барышында Алексей Песошин Нурлат шәһәрендәге су алу төене булган су белән тәэмин итүнең яңа системасы эше белән танышты. Бу турыда Татарстан Рәисенең матбугат хезмәте хәбәр итте.

Россия Үзәк сайлау комиссиясе ил Президенты вазифасына дүрт кандидатны теркәүдән баш тартты. Моның сәбәбе – дөрес имзаларның җитәрлек санда булмавы, шулай ук сайлаучыларның яраксыз имзалары проценты зур булу, дип хәбәр итә РФ Үзәк сайлау комиссиясе.

«Миллиард.Татар» порталы һәм «Китап» радиостанциясе Идел-Урал урта гасыр суфи шигъриятен популярлаштыруны максат итеп куйган проект гамәлгә ашыра башлады.

Бүген Татарстан Республикасы Рәисе Рөстәм Миңнеханов «Яңа коры җир ашлык коридоры» компаниясе башкарма директоры Карен Овсепян белән потенциаль хезмәттәшлек һәм үзара ярдәм итешү мәсьәләләре хакында фикер алышты. Бу хакта республика җитәкчесенең матбугат хезмәте хәбәр итә.

14 февральдә Мәскәү консерваториясенең Кече залы сәхнәсендә Татарстан, Мәскәү һәм Россиянең башка шәһәрләреннән яшь музыкантлар һәм укучылар чыгыш ясаячак. Анда Муса Җәлилнең рус һәм татар телләрендә шигырьләре, С.Рахманинов, Н.Римский-Корсаков, Л. ван Бетховен һәм башка композиторларның әсәрләре яңгыраячак. Бу хакта Татарстанның Россиядәге Тулы вәкаләтле вәкиллеге матбугат хезмәте хәбәр итә.

Тарих фәннәре докторы, Татарстан Фәннәр академиясенең Исламны өйрәнү үзәгенең өлкән фәнни хезмәткәре Илдус Заһидуллин Галиәсгар Камалның 145 еллыгына багышланган «ХХ йөз башы татар яңарышы һәм Галиәсгар Камал» түгәрәк өстәлендә драматургның иҗтимагый-сәяси тормышы турында сөйләде.

Татарстан Рәисе Рөстәм Миңнеханов 2024 елда Ураза гаетен һәм Корбан бәйрәмен үткәрү даталарын билгеләде. Республика җитәкчесе шул хактагы указны имзалаган.

Синоптиклар фаразлавынча, республикада якындагы тәүлектә буран вакытында күз күреме 1-2 км га кадәр начарлана, көчле җил саклана, аның тизлеге төнлә секундына 15-20 метр, көндез 15 метрга җитәчәк. Татарстан территориясендә урыны белән һәм Казанда бозлавык булырга мөмкин. Бу хакта Россия Гадәттән тыш хәлләр министрлыгының Татарстан буенча Баш идарәсе хәбәр итә.

Шимбә көнне, 10 февральдә, 11-18 сәгатьтә Мамадышта «SUNNYФест» VIII Бөтенроссия креатив чаналар фестивале узачак. Нократта шәһәрнең тарихи үзәгендә 20 команда һәм меңләгән тамашачы җыелачак.

14 февральдә Татарстан Милли музее филиалы - Каюм Насыйри музеенда «Мәгариф елында» дип исемләнгән яңа күргәзмә ачыла. Күргәзмәдә XIX гасыр азагы - XX гасыр башы шәмаилләре, мәгърифәтче галим, язучы Каюм Насыйринең кулъязмалары һәм фәнни хезмәтләре күрсәтеләчәк. Күргәзмә Каюм Насыйринең 199 еллыгына багышлана.