Новости за 25.02.2024

Лениногорскиның Керкәле авылында запорожец автомобильләрендә ралли узышлар узды. Анда районның төрле авылларыннан килгән 19дан артык ир-егетләр катнашты. Һәр катнашучының запорожец автомобиле үзенчәлекле иде. Алар арасында җырчы Фирдүс Тямаевның да ике машинасы катнашты. Бу хакта «Заман сулышы» хәбәр итә.

Әлмәт районы башлыгы Тимур Нагуманов волонтерларга блиндаж шәмнәр ясау өчен парафин сатып алырга ярдәм итте. Бу хакта «Әлмәт таңнары» хәбәр итә.

Саба районы Шәмәрдән мәдәният йорты хезмәткәрләре 23 февраль көнне Ватанны саклаучылар көне хөрмәтенә «Россияне саклаучылар» автоузышын оештырды. Бу хакта http://saby-rt.ru/ хәбәр итә.

Кичә, 23 февраль, Уфада «Төмәнәк моңнары» конкурсының гала-концерты узды. Чарада Бөтендөнья татар конгрессы Башкарма комитеты җитәкчесе Данис Шакиров катнашты. Бу турыда конгрессның матбугат хезмәте хәбәр итте.

РФ Президенты Владимир Путин киләсе атнада Россия Федерациясе Федераль Җыенына юллама белән мөрәҗәгать итәчәк һәм Иминлек советының даими әгъзалары белән киңәшмә үткәрәчәк. «Россия-1» каналындагы «Мәскәү. Кремль. Путин» телепрограммасында шул хакта хәбәр иттеләр.

Бүген Түбән Кама районында пассажир автобусы катнашында юл-транспорт һәлакәте булган. Бу хакта ТР буенча Эчке эшләр министрлыгының матбугат хезмәтендә хәбәр иттеләр.

Ханты-Манси автономияле округы-Юграның Покачи шәһәре «Туган як» иҗтимагый оешмасы әгъзалары «Кызыл күлмәк. Хатын-кыз йөрәге» акциясендә катнашты. Бу хакта Бөтендөнья татар конгрессының матбугат хезмәте хәбәр итә.

2024 елда төбәк әһәмиятендәге комплекслы профильле «Зәңгәр күлләр» дәүләт табигать заказнигы территориясендә урманнарны саклау буенча эшләр дәвам итәчәк. Чараларны «Шәһәр яны урманчылыгы» ТР ДКУ һәм «Шәһәр яны өйрәнү-сынау урман хуҗалыгы» ТР ДБУ белгечләре башкарачак. Бу турыда Татарстан Урман хуҗалыгы министрлыгы хәбәр итте.

9 февральдә «Татарстан агробизнес кадрларын яңадан әзерләү институты» өстәмә һөнәри белем бирү учреждениесендә «Казан-2024» бал фестивале узды. Республика умартачылары үз продукцияләрен тәкъдим иттеләр. Бу турыда Татарстан Авыл хуҗалыгы һәм азык-төлек министрлыгы хәбәр итте.

Көньяк Африка Республикасы Россиягә БРИКС спорт Уеннары флагын тапшырды. Тантана «Россия» күргәзмә-форумында «Физик культура һәм спорт өлкәсен үстерүдәге уңышлар» пленар утырышы кысаларында узды. Бу хакта ТАСС агентлыгы хәбәр итә.

«Киләчәк уеннары»н ачу тантанасын һәм узган ярышларны миллиард тапкырдан артык караганнар. Вице-премьер Дмитрий Чернышенко «Россия» күргәзмә-форумында «Физик культура һәм спорт өлкәсен үстерүдәге уңышлар» пленар утырышында шундый мәгълүматлар белән уртаклашты. Бу хакта ТАСС агентлыгы хәбәр итә.

Бүген «Теләче-Арена» боз сараенда яшьләр арасында якташлары, Татарстан Республикасының атказанган химигы Шамил Галәвиев истәлегенә хоккей турниры узды. Бу турыда «Татар-информ» яза.

Entity җыелма командасы Dota 2 буенча Yota Фиджитал MOBA суперфиналында 19:4 исәбе белән җиңде. Киберспортчыларга «Киләчәк уеннары» трофее һәм 50 мең доллар күләмендә акчалата бүләк тапшырылды.

«Киләчәк уеннары» ярышларына билетларның 3 проценты гына сатуда калган. Татарстан спорт министры Владимир Леонов журналистларга шулай дип белдерде. Ярышлар 3 мартка кадәр дәвам итә. Бу хакта ТАСС агентлыгы яза.

Белоруссия Президенты Александр Лукашенко 2025 елда дәүләт башлыгын сайлауда катнашырга ниятли. Ул Белоруссия парламентына сайлауларда бердәм тавыш бирү көнендә сайлау участогына килгәч, яңа срокка үз кандидатурасын күрсәтергә карар кылуы турында игълан итте. Бу хакта РИА Новости агентлыгы яза.

Саба районы Олы Кибәче авылында ир балалар арасында азанчылар бәйгесе үткән. Бу хакта «Татар-информ»га бәйгене оештыручы Люция Шәрәфиева хәбәр итте.

Казандагы БРИКС Уеннарына 35 яки аннан артыграк илдән спортчылар киләчәк. Бу хакта ТАСС агентлыгы Татарстан спорт министры Владимир Леоновка сылтама белән хәбәр итә.

1 марттан февральдә 80 яше тулган россиялеләрнең пенсиясе күтәрелә. Шул ук вакытта, иминият пенсиясе составындагы фиксацияләнгән түләү ике тапкыр арта, дип искәртте Г.В.Плеханов исемендәге Россия икътисад университетының дәүләт һәм муниципаль финанслар кафедрасы профессоры Юлия Финогенова «Прайм» агентлыгына биргән интервьюсында.

25 февральдә россиялеләрнең бер өлеше өчен ил Президентын сайлауда өстәмә тавыш бирү башланды. Ул ерактагы һәм барырга кыен булган урыннарга, шулай ук суда йөзүче судноларга кагыла. Элегрәк Россия Үзәк сайлау комиссиясе әлеге процедураның башлануы хакында игълан иткән иде.

22 февральдә Пенза өлкәсе татар милли-мәдәни автономиясе рәисе Җиһанша Туктаров һәм аның урынбасары Марат Тенишев өлкәнең Пачелма районы Решетино авылы урта гомуми белем бирү мәктәбендә булды һәм татар теле сыйныфының эше белән танышты. Бу хакта Пенза өлкәсе татар милли-мәдәни автономиясе «ВКонтакте» социаль челтәрендәге төркемендә хәбәр ителә.

Көнчыгышны һәм туган якны өйрәнү белгече Әхмәт Галимов 26 февральдә Мәскәү Җәмигъ мәчетендә соңгы юлга озаталар. Бу хакта Татарстанның Россиядәге Тулы вәкаләтле вәкиллеге телеграм-каналында хәбәр ителә.

21 февральдә Түбән Новгород өлкәсенең «Без бергә!» Татар иҗтимагый берләшмәләре конференциясе кысаларында Түбән Новгород өлкәсе татарлары төбәк милли-мәдәни автономиясе инициативасы белән түгәрәк өстәл узды. Бу хакта Түбән Новгород өлкәсе татарлары төбәк милли-мәдәни автономиясенең «ВКонтакте» социаль челтәрендәге төркемендә хәбәр ителә.

Австралия, санкцияләр исемлеген киңәйтеп, анда Россиянең тагын 55 гражданын һәм 37 оешмасын керткән. Исемлек илнең Тышкы эшләр министрлыгы сайтында урнаштырылган.

Бүген, 25 февральдә, Татарстанда салкынча һәм шул ук вакытта тыныч һава торышы көтелә. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Чирмешән районы мөхтәсибе Рамил Ибраһимов Иске Кади китапханәсенә китаплар бүләк итте. Тулаем 4 мең сумлык мондый 33 китапка бик сөенделәр. Бу хакта «Безнең Чирмешән» хәбәр итә.