Новости за 01.02.2024

Лениногорскиның 3нче спорт мәктәбе грек-рим көрәшчесе Альберт Минһажев Россия беренчелеге ярышларында катнашачак. Илкүләм ярышларында катнашу хокукына ул Идел буе федераль округы бәйгесендә призлы урын алуы белән ия булды. Бу турыда «Заман сулышы» Лениногорскиның 3нче комплекслы спорт мәктәбенең ВКонтакте социаль челтәрендәге сәхифәсенә сылтама белән хәбәр итә.

Казан аэропортының өченче пассажирлар терминалы концепциясен Татарстан Транспорт министрлыгы коллегиясендә тәкъдим иттеләр. Яңа бинаны ачык китап формасында төзергә телиләр, чөнки аэропорт татар шагыйре Габдулла Тукай исемен йөртә.

Ике ел эчендә Татарстанда 6 алдынгы инженерлык мәктәбе булдырылды. Бүген Татарстан Республикасы Рәисе Рөстәм Миңнеханов Президент Владимир Путинга шулай дип җиткерде. Бу хакта һәм республиканың заманча мәгариф инфраструктурасын булдыру өлкәсендә эшчәнлегенең нәтиҗәләре турында ул Әлмәттә югары нефть мәктәбен ачу тантанасында сөйләде. Дәүләт башлыгы чарада видеоэлемтә форматындагы катнашты.

Бүген җирле телеграм-каналларда Уң як Болак урамында «Татсоцбанк» бинасы янган видео таралды.

Юл хәрәкәте иминлеге мәсьәләләрен хәл итү мөһим. Һәм аеруча «өй-мәктәп-өй» маршрутларының куркынычсызлыгына игътибар итәргә кирәк. Бу хакта Татарстан Республикасы Рәисе Рөстәм Миңнеханов Татарстан Транспорт һәм юл хуҗалыгы министрлыгы коллегиясе утырышында белдерде.

Казанда акча күчерү белән бәйле җинаять кылуда шикләнелгән блогер Рәсүл Тәүдирәковне азат иттеләр. Бу хакта адвокат Руслан Нагиев хәбәр итте.

Суд приставлары федераль хезмәте россиялеләрдән ЮХИДИ линиясе штрафларын түләтүне тизләтү ысулын тапкан: алар төбәкләр буенча таратылмаячак, ә барысы да бер бүлек аша узачак. Бу хакта Суд приставлары федераль хезмәте директоры Дмитрий Аристов хәбәр итте, дип яза РИА Новости.

2 февральдә Татарстан Республикасы Милли музее филиалы – Татар әдәбияты тарихы музее һәм Шәриф Камал мемориаль фатирында Шәриф Камалның 140 еллыгына багышланган күргәзмә ачыла. Бу хакта ТР Мәдәният министрлыгы матбугат хезмәте хәбәр итә.

Дәүләт Думасына авыл туризмына ярдәм турында закон проекты кертелде. Бу хакта аның авторларының берсе, Думаның икътисади сәясәт комитеты рәисенең беренче урынбасары Надежда Школкина хәбәр итә. Аның сүзләренчә, документ тармак законында «авыл туризмы» төшенчәсен эчке туризмны үстерү юнәлешләренең берсе буларак ныгытырга тиеш. Бу хакта «Российская газета» яза.

Россия Президенты Владимир Путин видеоэлемтә аша Әлмәт дәүләт нефть институты базасында төзелгән «Югары нефть мәктәбе» фәнни-тикшеренү, уку үзәген ачты. Тантанада Татарстан Республикасы Рәисе Рөстәм Миңнеханов һәм уку йорты ректоры Александр Дьяконов катнашты.

«Черек күл» паркындагы шугалакта 2 февральдә тиз танышу кичәсе узачак. Теләге булган һәркем чарага кушыла ала.

Татарстан мәдәният учреждениеләрендә «Гаилә абонементы» акциясе старт алды. Ул гаиләләргә музей, театр һәм башка мәдәни объектларга барганда ташлама алырга мөмкинлек бирә. Бу хакта «Татар-информ»да узган матбугат конференциясендә Татарстан мәдәният министрының беренче урынбасары Юлия Әдһәмова хәбәр итте.

Россиядә медикларга Вифлеем сертификатын бирүнең федераль регламентын эшләргә тәкъдим иттеләр. Сертификатның акчалата күләме — йөклелекне өзү бәясе, ул бу карарны бала тудыру файдасына үзгәрткән саен булачак.

Россия Президенты Владимир Путин «Фидакарь хезмәт өчен» орденын гамәлгә кертте. Указ хокукый мәгълүмат порталында чыккан.

Россия Дәүләт Думасы депутаты, Кече һәм урта эшмәкәрлек комитеты рәисенең беренче урынбасары Әлфия Когогина Татарстанны мактады һәм икътисадның реаль секторын кадрлар белән тәэмин итү мәсьәләсен хәл итүдә республика тәҗрибәсен таратырга тәкъдим итте.

Бүген, 1 февральдә, Казанның «Гаилә» мәчетендә «Син һәм Мин» дип исемләнгән яңа проект башлана, әлеге чарада 25-35 яшьлек ялгызлар бәхетле гаилә кору өчен таныша алачак. Танышу кичәсе Казан шәһәре, Җәүдәт Фәйзи урамы, 2нче йорт адресы буенча 18:30 сәгатьтә башлана. Бу хакта ТР Диния нәзарәте матбугат хезмәте хәбәр итә.

Татарстан халкыннан җәмәгать транспорты эшенә кагылышлы зарлану һәм шикаятьләр күп килә. Һәм күрелгән чаралар җитәрлек түгел. Татарстан Транспорт һәм юл хуҗалыгы министрлыгы коллегиясе утырышында республика Рәисе Рөстәм Миңнеханов шулай дип белдерде.

«Без еш кына үткән заманны идеальләштерергә яратабыз, тик элек тә яхшы булмаган», – диде Айдар Хәйретдинов.

Табигатьне саклау чараларына Татарстан алты ел эчендә 60,5 млрд сум акча күчергән һәм берничә миллион кешенең яшәү шартларын яхшырткан. Бу хакта бүген Татарстанның экология һәм табигый байлыклар министры Александр Шадриков хәбәр итте. Ул бу саннарны Бәшир Рәмиев исемендәге Казан IT-паркында «Идел» клубының эксперт дискуссиясе вакытында китерде.

Татарстан үзләрен бәхетле дип санаган гражданнар саны буенча өченче урынны алды. Сораштыру нәтиҗәләре күрсәткәнчә, республикада яшәүчеләрнең 11 проценты 5 баллга үзләрен бәхетле хис итә, дип яза «СенатИнформ». Әлеге күрсәткеч бары тик Екатеринбургта һәм Свердловск өлкәсендә (халыкның 22 проценты 5 баллга бәхетле), шулай ук Түбән Новгородта (16 процент) гына югарырак.

Әзһәр Шакировка багышланган «Җылак» фильмы артистның туган көнендә – 22 февральдә прокатка чыга.

Галимҗан Ибраһимов исемендәге Тел, әдәбият һәм сәнгать институты Галиәсгар Камалның 145 еллыгына багышланган «ХХ йөз башы татар яңарышы һәм Галиәсгар Камал» түгәрәк өстәлен оештырды. Түгәрәк өстәл утырышында «Татар-информ» хәбәрчесе дә катнашты.

Казанның Совет районы суды «Азатлык радиосы»ның* Татар-башкорт хезмәте редакторы Алсу Кормашеваны сак астында тоту вакытын озайтты. Ул тагын ике ай вакытын тикшерү изоляторында үткәрәчәк.

Бу кышта карның күп явуы техник яктан яңадан коралланырга һәм белгечләр әзерләргә кирәклеген күрсәтте. Татарстан Рәисе Рөстәм Миңнеханов ТР Транспорт һәм юл хуҗалыгы министрлыгы коллегиясе утырышында шулай дип белдерде.

Ел башында Татарстанда эшсезлекнең рекордлы дәрәҗәдә түбән булуы билгеләп үтелә – 0,2 процент. Кайбер районнарда исә – Кайбыч, Тәтеш, Лаеш, Яшел Үзән, Алексеевск һәм Лениногорск – әлеге күрсәткеч республика буенча уртача дәрәҗәдән түбәнрәк. Бу хакта «Татар-информ» агентлыгына ТР Хезмәт, халыкны эш белән тәэмин итү һәм социаль яклау министрлыгының матбугат хезмәтендә хәбәр иттеләр.