Новости за 05.03.2024

Рамазан ае якынлашып килгән көннәрдә, мөселманнарның яңа бергәлеге – MosMuslim командасы изге гамәлләр кылу өчен Мәскәүнең мөселман яшьләрен берләштерергә омтыла һәм башкалада формаль булмаган очрашулар, яшьләр катнашында ифтарлар үткәрә башлый. Бу хакта Мәскәү шәһәре татар милли-мәдәни автономиясе төбәк иҗтимагый оешмасының матбугат хезмәте хәбәр итә.

Әстерхан өлкәсе Идел буе районының Яр-Түбә авылы башлыгы Фаил Бердиев Татарстанның һәрвакыт ярдәм итеп торуын ассызыклады. Бу хакта ул «Корстон» үзәгендә XII Бөтенроссия татар авыллары эшмәкәрләре җыенының пленар утырышындагы чыгышында әйтте.

3 мартта Татарстанның Свердловск өлкәсендәге Даими вәкиллеге консультанты Рифат Йосыпов Каменск-Уральский шәһәр округының «Дуслык» иҗат коллективы оешуга 25 ел тулуга багышланган юбилей чарасында катнашты. Бу хакта Татарстанның Свердловск өлкәсендәге Даими вәкиллеге матбугат хезмәте хәбәр итә.

Казан БРИКС саммитын үткәрү урыны сыйфатында очраклы рәвештә генә сайланмаган. Шәһәр һәм Татарстан җитәкчелеге мондый дәрәҗәдәге вакыйганы үткәрергә әзер һәм аны уңышлы оештыру өчен кирәкле бөтен нәрсә белән тәэмин ителгән. Россия Президенты ярдәмчесе Юрий Ушаков ТАСС агентлыгына биргән интервьюсында шундый фикере белән уртаклашты.

Татарстан Республикасы Рәисе Рөстәм Миңнеханов XII Бөтенроссия татар авыллары эшмәкәрләре җыены кысаларында узган «Татар базары» күргәзмәсе белән танышты.

2026 елда Чаллының 400 еллыгы бәйрәм ителәчәк. Язучы, «Мәдәни җомга» газетасы баш мөхәррире, 2015 елга кадәр 30 елдан артык Чаллыда гомер иткән Вахит Имамов әлеге датаны бәйрәм итүгә карата үз фикерен белдерде.

Казанда III «Үз телем» конкурсына гаризалар кабул итү башланды, аның нәтиҗәләре буенча татар телен өйрәнүгә багышланган иң яхшы проектлар билгеләнәчәк. Җиңүчеләр үзара 2 млн сумлык приз фондын бүлешәчәк. Бу хакта Казан мэриясе матбугат хезмәте хәбәр итә.

10 мартта Новосибирск шәһәрендәге Татар мәдәнияте йортында «Яз нуры» татар кызлары бәйгесе узачак. Әлеге бәйге инде дүртенче тапкыр үткәрелә. Бу хакта Новосибирск татарларының Вконтакте социаль челтәрендәге битендә хәбәр ителә.

Бүген, 5 мартта, Татарстанда алмашынучан болытлы һава торышы фаразлана, әмма температура фоны алдагы көн белән чагыштырганда бераз түбәнәячәк. Бу хакта ТР Гидрометеоүзәге хәбәр итә.

Чаллының 52 мәктәбендә 8б сыйныфында укучы Аделина Липатова акробатика буенча Россия чемпионатыннан җиңү белән кайтты. Бу инде аның әлеге абруйлы ярышларда өченче тапкыр югары баскычка күтәрелүе. Турнир 25 февральдә Башкортостанның Октябрьск каласында үткән. Анда илнең 20дән артык төбәгеннән 700ләп спортчы катнашкан. Бу хакта «Шәһри Чаллы» яза.

Буа егете Эмиль Сафиуллин 12 кешедән торган команда белән Африканың 5895 метр биеклектәге Килиманджаро тавына менгән. Эмиль бу максатына 6 ай әзерлек, спорт тренировкалары һәм дөрес туклану нәтиҗәсендә ирешкән. Ул 5986 метр биеклектә чәкчәк белән чәй эчкән. Бу хакта «Знамя» сайтында хәбәр ителә.

Чистайдан махсус хәрби операция зонасына хәрбиләргә һәм Лисичанск шәһәрендә яшәүчеләргә 20 тонна гуманитар йөк җибәрелде. Бу хакта «Чистай хәбәрләре» яза.

Апас урта мәктәбенең атаклы физкультура укытучысы Таһир Халитов истәлегенә чаңгы ярышлары узды. Кызлар һәм егетләр матур табигать кочагында урын алган чаңгы шуу базасына җыелды. Бу хакта «Апастово-информ» районның яшьләр эше һәм спорт бүлеге җитәкчесе Ленар Мотыйгуллинга сылтама белән хәбәр итә.

Балтач районы Иске Салавыч авылы кызы Айгөл Шакирҗанова Санкт-Петербургта бию ярышларында 7 алтын, 1 көмеш, 2 бронза медаль яулады. Бу хакта «Хезмәт» сайтында хәбәр ителә.