Новости за 15.03.2024

Россия Гадәттән тыш хәлләр министрлыгының Татарстан хезмәткәрләре РФ Президентын сайлауларга бәйле рәвештә көчәйтелгән эш режимына күчте. Бу хакта ведомствоның матбугат хезмәте хәбәр итә.

2026 елда Чаллының 400 еллыгы бәйрәм ителәчәк. Чаллы шәһәре депутаты Виталий Агапов әлеге датаны бәйрәм итүгә карата үз фикерен белдерде.

Татарстан Рәисе ярдәмчесе Тимур Сөләйманов Казан яшьләре алдында чыгыш ясаячак. Ул «Мөмкинлекләр дөньясында үз һөнәри юлыңны ничек сайларга?» дигән темага лекция укыячак. Бу хакта Казан мэриясе матбугат хезмәте хәбәр итә.

14 март көнне Ульяновскиның иң зур спорт корылмасында – «Волга-Спорт-Арена» спорт сараенда хәзер инде традициягә кергән өлкәкүләм ифтар ашы узды. Губернатор администрациясе белән өлкә хөкүмәте ярдәмендә Ульяновск өлкә мөфтияте һәм «Сембер» бизнес-клубы тарафыннан оештырылган күркәм мәҗлестә 5 меңгә якын кеше катнашты. Бу хакта «Өмет» газетасының телеграм-каналында хәбәр ителә.

Бүген Татарстанда көндез +5 градуска кадәр җылы булачак, көньяк-көнбатыштан көчле җил исәчәк, аның тизлеге урыны белән секундына 15 метрга җитәчәк. Бу хакта Гидрометеоүзәкнең матбугат хезмәте хәбәр итә.

Татарстан Республикасында исәп буенча сигезенче тапкыр Россия Президентын сайлаулар башланды, алар 17 мартка кадәр дәвам итәчәк.

Түбән Камада ел саен үткәрелә торган «Гаилә — Түбән Кама горурлыгы» муниципаль конкурсы башлана. Ул Түбән Кама районының ЗАГС идарәсе инициативасы белән үткәрелә. Бу хакта http://nkamsk-rt.ru/ хәбәр итә.

Саба районы Юлбат авылында яшәүче Наил Галиев авыл тарихын өйрәнүгә зур өлеш керткән шәхесләрнең берсе булу белән бергә, әнисе ягыннан 11, әтисенең 10 буын бабасын ачыклап, нәсел шәҗәрәләрен төзүгә ирешкән. Бу хакта http://saby-rt.ru хәбәр итә.

Чистайда «Ак калфак» оешмасы хатын-кызлары Гүзәл ханым Вәлиева, Роза ханым Сөләйманова hәм Флюра ханым Мусина мөхтәсибәт каршында оештырылган «Ягез әле, кызлар!» проектындагы яшь кызлар өчен өйрәнү дәресләре уздырды. Дәрес вакытында ак калфаклылар энә мендәрчекләре ясау ысулларын күрсәтте. Бу хакта Бөтендөнья татар конгрессы «Чистай» шәһәренең «Ак калфак» оешмасына сылтама белән хәбәр итә.

Әлмәттә 15-17 мартта Россия Президентын сайлауда катнашучылар участокларда махсус «ташламалы» беләзекләр алачак. Алар белән шәһәрлеләр 19 оешмадан ташлама ясала. Алар арасында кафе, ресторан, ягулык салу станциясе, спорт комплексы, кибет һәм күңел ачу үзәге бар. Бу хакта «Әлмәт таңнары» хәбәр итә.

Чирмешән лицее укучылары, әти-әниләре һәм педагоглары Кәрван сарае сәүдә үзәге мәйданында чираттагы «Игелек ярминкәсе» оештыра. Бу ярминкә 17 мартта, якшәмбе көнне була. Бу хакта «Безнең Чирмешән» хәбәр итә.