Новости за 15.03.2024

Россиянең кайбер төбәкләрендә Президент сайлауларында тавыш бирү барышына комачаулау фактлары – тавыш бирү урналарына «зеленка» агызу теркәлгән. ТР Үзәк сайлау комиссиясе рәисе Андрей Кондратьев «Татмедиа»да Россия Президентын сайлауның бердәм мәгълүмат үзәгендә бу хәлгә аңлатма бирде.

Татарстан Рәисе Рөстәм Миңнеханов Казанга килгән Бөтендөнья яшьләр фестивалендә катнашучыларны шәхсән сәламләү өчен Бәшир Рәмиев исемендәге IT-паркка килде.

ТР Үзәк сайлау комиссиясенә Россия Президентын сайлау законнарын бозуга карата шикаятьләр һәм мөрәҗәгатьләр килмәгән. Бу хакта «Татмедиа»да Россия Президентын сайлауларның бердәм мәгълүмат үзәгендә ТР Үзәк сайлау комиссиясе рәисе Андрей Кондратьев әйтте.

Татарстанда язгы ташуга әзерләнүгә 988 млн сум бүлеп бирелгән. Бу хакта Татарстан Хөкүмәте Йортында Гадәттән тыш хәлләр комиссиясе утырышында Гражданнар оборонасы эшләре һәм гадәттән тыш хәлләр министры вазифаларын вакытлыча башкаручы Николай Суржко сөйләде.

Бүген Россия Президентын сигезенче тапкыр сайлаулар илнең барлык төбәкләрендә, шул исәптән Татарстанда да башланды. Бу сәяси вакыйгада катнашу һәр гражданин өчен мөһим, чөнки без шул рәвешле дөньяга суверенитетыбызны һәм бердәмлегебезне күрсәтә алабыз. Әлеге фикерне «Татар-информ» хәбәрчесенә сәяси технолог, «Теория Дарвина» агентлыгы генераль директоры Владимир Кутилов әйткән.

Татарстан инвестицион үсеш агентлыгына бизнес миссиясе белән Кытай Халык Республикасыннан делегация килде. Алар пилотсыз очкычлар җитештерү белән шөгыльләнә. Очрашуда кунакларны Татарстанның инвестицион потенциалы белән таныштырдылар. Аннары алар белән агентлык җитәкчесе Талия Миңнуллина очрашты.

Бүген Россия Президентын сайлауның беренче көне. «Татмедиа»да узучы Россия Президентын сайлауларның бердәм мәгълүмат үзәгендәге брифингта ТР Үзәк сайлау комиссиясе рәисе Андрей Кондратьев Дәүләт сайлауларына бернинди дә куркыныч янамавын искәртте.

Татарстан Рәисе Рөстәм Миңнеханов БРИКС саммиты вакытында яшьләр мәйданчыгын оештырырга әзер булуын белдерде. Бу хакта ул Сочидан Казанга килгән Бөтендөнья яшьләр фестивалендә катнашучылар белән аралашканда әйтте.

Бөтендөнья татар конгрессының башкарма комитеты җитәкчесе Данис Шакиров сайлауда катнашты. Ул Халыкара компетенцияләр үзәге – Казан мәгълүмати технологияләр һәм элемтә техникумы тулай торагында урнашкан 352нче сайлау участогында тавыш бирде.

Бүген Россиянең барлык төбәкләрендә, шул исәптән Татарстанда, Россия Президентын сайлау сигезенче мәртәбә үткәрелә. Дәүләтнең сәяси тормышында катнашу мөһим, һәм ул кешенең олы, җаваплы булуын күрсәтә, дигән фикер белән уртаклашты КФУның Социаль-фәлсәфи фәннәр һәм массакүләм коммуникацияләр институты директорының фәнни эшчәнлек буенча урынбасары Мария Ефлова.

Бүген Аксубай район үзәгендә Россия Президентын сайлауларда Татарстан мөфтие урынбасары Равил хәзрәт Зөфәров, аның тормыш иптәше Гөлия һәм күп балалы гаиләнең башка әгъзалары тавыш бирде. Бу хакта «Сельская новь» җирле газетасы яза.

Идел буе дәүләт физик тәрбия, спорт һәм туризм университеты җитәкчелеге, хезмәткәрләре, студентлар һәм педагоглар Россия Президентын сайлауда актив катнашкан.

Татарстан Дәүләт Советы депутаты Руслан Нигъмәтулин тормыш иптәше белән Россия Президентын сайлауның беренче көнендә тавыш бирде. Парламентарий үзенең телеграм-каналында сөйләгәнчә, гаилә «Яблочко» 118 нче балалар бакчасындагы 2832 нче сайлау участогына төшке аш вакытында килгән.

Татарстандагы «Халык Фронты» төбәк башкарма комитеты җитәкчесе, «Ярдәм янәшә! Помощь рядом!» республика хәрәкәте координаторы Ринат Фазылов бүгеннән башланган Россия Президентын сайлауларда үз тавышын бирде.

Татарстанда Мәскәү вакыты белән 15.00 сәгатькә Россия Президентын сайлауга килүчеләр 23,24 процент тәшкил иткән. Бу хакта Татарстан Үзәк сайлау комиссиясе хәбәр итә.

Бүген Казанда «Зенит» волейбол клубының һәм ир-атлар җыелма командасының элеккеге остазы, Россиянең атказанган тренеры Владимир Алекно КНИТУ-КАИның беренче бинасында 42нче сайлау участогында (Карл Маркс урамы, 10 йорт) Россия Президентын сайлауда үз тавышын бирде. Бу хакта «Казанские ведомости» газетасы яза.

Апас районының Үтәмеш авылыннан Бөек Ватан сугышы ветераны Хәйретдин Сәлахов илнең киләчәге нык кулларда булуын тели. Сугышта булган аксакал Үтәмеш авылы клубындагы 901нче сайлау участогына килде һәм Россия Федерациясе Президентын сайлауда тавыш бирде.

Төркиядә яшәп иҗат итүче журналист, язучы Айзирәк Гәрәева-Акчура «Татар журналисты» сәхифәсендә биргән әңгәмәсендә Төркиядә иҗатчылар, язучылар өчен бәйгеләр үткәрелүен әйтте һәм Татарстанда да бу тәҗрибәне булдырырга тәкъдим итте.

Кайбер төбәкләрдә, шул исәптән, Санкт-Петербургта ялган аккредитацияле, законсыз гамәлләр эшләргә тырышкан журналистлар барлыкка килгән. Бу вазгыятькә карата фикерләре белән Үзәк сайлау комиссиясенең мәгълүмат үзәгендә утырышта РФ Үзәк сайлау комиссиясе рәисе Элла Памфилова уртаклашты, дип хәбәр итә ТАСС.

Россия Иминлек советы рәисе урынбасары Дмитрий Медведев Россия Президентын сайлауда тавыш биргән. Яшьләр йортына сайлау участогына аның белән бергә тормыш иптәше Светлана Медведева килде, дип хәбәр итә ТАСС.

«Дом.РФ» дәүләт корпорациясендә, гаиләдә балалар тууга карап, гаилә ипотекасы буенча ставканы киметергә тәкъдим иттеләр. Бу хакта «Известия» басмасына сылтама белән РБК сайты яза.

Махсус хәрби операциядә катнашучы хатыны, «Zа победу!» хәрәкәте оештыручысы Евгения Коцарь Казанның 114 номерлы мәктәбендә Президент сайлауларында тавышын бирде. Бу хакта «Республика Татарстан» газетасы яза.

14 сәгать 40 минутка булган мәгълүматлардан күренгәнчә, Россия халкының 10,40 проценты Россия Президентын сайлауда катнашкан. Моны мәгълүмат үзәге экранында чыгып барган РФ Үзәк сайлау комиссиясе мәгълүматлары раслый.

Россиянең 1,7 миллионнан артык гражданы дистанцион электрон тавыш бирүдә катнашты. Бу хакта дистанцион электрон тавыш бирүне күзәтү платформасы мәгълүматларында белдерелә.

Россия Президентын сайлауда катнашу, беренче чиратта, ил, республика, шәһәр язмышына битараф булмауны күрсәтә. Бу хакта «Бердәм Россия» партиясенең Татарстан бүлеге секретаре урынбасары, партиянең төбәк башкарма комитеты җитәкчесе Марат Сәмигуллин хәбәр итте, дип яза «Татар-информ».