Новости за 16.03.2024

Россиядә Президент сайлауларын күзәтү системасы дүрт юнәлешле эшчәнлектән гыйбарәт. Бу хакта «Бәйсез иҗтимагый мониторинг» ассоциациясе эксперты, Бөтенроссия «Чиста сайлаулар өчен» күзәтүчеләр корпусының башкарма комитеты әгъзасы Андрей Лукаш сөйләде. Ул бүген «Татар-информ» мәгълүмат агентлыгында узган Россия Президентын сайлауларга багышланган матбугат конференциясенә Zoom платформасы аша кушылды.

«Справедливая Россия» депутатлары якын арада яңа закон проектын эшләячәк. Аның нигезендә, сайлауларны өзәргә омтылган кешеләрне сигез елга кадәр иректән мәхрүм итү күздә тотыла. Фракция җитәкчесенең беренче урынбасары Яна Лантратова әйтүенчә, сүз ут төртү һәм башка гомумкуркыныч алымнар турында бара, дип яза ТАСС.

Татарстан Рәисе Рөстәм Миңнеханов Хөкүмәт Йортында узган бүгенге киңәшмәдә республика Үзәк сайлау комиссиясенә һәм районнар башлыкларына Россия Президентын сайлауда тавыш бирү барышында сайлаучылар өчен барлык кирәкле шартларны һәм иминлекне тәэмин итүне йөкләде. Видео республика җитәкчесе порталында чыкты.

Татарстанның Үзәк сайлау комиссиясе рәисе Андрей Кондратьев Россия Президентын сайлауда тавыш бирде. Ул Казанның 75 нче гимназиясенә 146 нчы сайлау участогына килгән иде, дип хәбәр итә «Татар-информ» хәбәрчесе Динара Прокопьева.

Россия Президентын агымдагы сайлауда ил халкы берләште, шуңа күрә килүчеләр саны югары булуын көтәргә кирәк. Казан шәһәре Думасы депутаты Рушан Минһаҗев «Татар-информ»га шундый фикер белдерде.

Лаеш районы башлыгы Илдус Зарипов һәм Эшкуарлар хокукларын яклау буенча вәкаләтле вәкил – Татарстан Республикасы Рәисе ярдәмчесе Фәрит Габделганиев РФ Президенты сайлавында тавыш биреп, гражданлык бурычын үтәде. Бу хакта «Камская новь» яза.

Россия Премьер-министры Михаил Мишустин ил Президентын сайлауда онлайн режимда тавыш бирде. Видео Министрлар Кабинетының телеграм-каналында чыкты.

Буа шәһәрендә «Яшьләр» 1173нче участок сайлау комиссиясендә 78 яшьлек Надежда Кучерова һәм 79 яшьлек Нина Черепанова булды. Алар 80 яшькә якынлашуга карамастан, скандинав йөреше белән актив шөгыльләнә.

Әлмәттә яшәүче иң өлкән хатын-кыз, Бөек Ватан сугышы ветераны Людмила Березова Россия Президенты өчен өйдә тавыш бирде

Россия Президентын сайлаулар барышында көнбатыш илләренең махсус хезмәтләре тарафыннан эшләнгән төрле провокацияләр Россия халкын бердәмләшергә, тавыш бирергә килергә, иленең язмышы хәл ителгән мизгелдә читтә калмаска өндәде. Бу фикерне «Бәйсез иҗтимагый мониторинг» ассоциациясе эксперты, Бөтенроссия «Чиста сайлаулар өчен» күзәтүчеләр корпусының башкарма комитеты әгъзасы Андрей Лукаш әйтте.

Татарстан инде күп еллар төрле дәрәҗәдәге сайлауларны югары дәрәҗәдә оештыра белүен күрсәтә. Россия Президентының быелгы сайлау кампаниясе дә искәрмә түгел. «Татар-информ»га бу хакта КФУның халыкара мөнәсәбәтләр, дөнья сәясәте һәм дипломатиясе кафедрасы доценты Евгения Храмова белдерде.

Актаныш районының Яңа Кормаш авылында яшәүче Флүдә Гардисламова «Сайлауларга бөтен гаилә белән!» конкурсының беренче җиңүчесе булып Lada Vesta автомобилен отты. Бу хакта «Актаныш» сайтында хәбәр ителә.

Татарстан халкы Россия Президентын сайлауда актив тавыш бирә һәм «Бөтен гаилә белән сайлауга!» акциясендә катнаша.

Президент сайлауның беренче көнендә, дистанцион электрон тавыш бирүне исәпкә алып, тавыш бирү күрсәткече 38,35 процент булган. Бу хакта РФ Үзәк сайлау комиссиясе рәисе урынбасары Николай Булаевка сылтама белән ТАСС хәбәр итә.

Россия Тышкы эшләр министрлыгының рәсми вәкиле Мария Захарова Президент сайлавында тавыш бирде. Бу хакта ул үз телеграм-каналында хәбәр итә.

Татарстанның Минзәлә районында яшәүче иң өлкән яшьтәге хатын-кыз – 103 яшьлек Мәчтүрә Усманова Россия Президентын сайлауда тавыш бирде. Бу хакта Татарстан Үзәк сайлау комиссиясе матбугат хезмәте хәбәр итә.

Әлмәт районы башлыгы Тимур Нагуманов Россия Президентын сайлауга 797 нче участокка гаиләсе белән бергәләп килгән.

Казанның 94нче гимназиясендә татар теле укытучысы Фәния Алиева әлеге белем бирү йортында урнашкан 159нчы сайлау участогында күзәтүче булып тора. Ул участоктагы мохит турында сөйләде.

Яшьләр Президент сайлауларында үз тавышын бирергә тиеш, чөнки алдагы алты елда нәкъ менә яшь кадрлар Россия рулендә булачак. Бу хакта «Татар-информ»га Халык фронтының Татарстандагы төбәк башкарма комитеты җитәкчесе, «Ярдәм янәшә! Помощь рядом!» республика хәрәкәте координаторы Ринат Фазылов сөйләде.

Торак-коммуналь хуҗалык өлкәсендә бернинди реформа да квалификацияле кадрлар әзерләүдән башка нәтиҗәләр бирмәячәк. Бу хакта Татарстан Рәисе Рөстәм Миңнеханов республика Хөкүмәте Йортында узган киңәшмәдә әйтте, ул аны барлык муниципаль районнар белән видеоконференцэлемтә режимында үткәрде. Бу хакта Татарстан җитәкчесенең матбугат хезмәте хәбәр итә.

«Казанские ведомости» хезмәткәрләре редакциянең 33 еллыгын шигъри марафон белән билгеләп үтте. Журналистлар Александр Пушкин һәм Габдулла Тукай язган яраткан шигырьләрен укыды.

Россия Президентын сайлауда үз тавышын бирергә дип, Буа районының Аксу авылында сайлау участогына 97 яшьлек Бөек Ватан сугышы ветераны, фронтовик Котдус Мөлеков килгән.

Россия Президентын сайлаулар белән бәйле сораулар буенча кайнар элемтәгә Татарстан халкыннан 851 шалтырату булган. Бу хакта «Татмедиа»да Россия Президентын сайлауның бердәм мәгълүмат үзәгендә Татарстан Үзәк сайлау комиссиясе рәисе Андрей Кондратьев сөйләде.

Татарстанның Спас районында фашист концлагерьләре тоткыны Нәкыя Хәмидуллина Россия Президентын сайлауда катнашты. Аның өчен тавыш бирү өйдә оештырылды.

15 мартта Татарстанның җәмәгатьчелеккә ярдәм штабында «Бердәм Россия Яшь Гвардиясе»нең төбәк бүлеге катнашында ситуацион үзәк ачылды. Бу вакыйга – РФ Президентын сайлау кысаларында сайлау кампаниясенә ярдәмгә юнәлдерелгән чараларның мөһим өлеше.