Новости за 01.02.2024

Татарстан Үзәк сайлау комиссиясе рәисе Андрей Кондратьев сайлаулар алдыннан мәгълүмати һөҗүм хакында белдерде. Мошенниклар, аның исеме артына качып, кампанияне оештыручыларга хәбәрләр җибәрә, шәхси һәм эш буенча мәгълүматларны сорашып белә башлаган. Бу хакта ТР Үзәк сайлау комиссиясенең матбугат хезмәте хәбәр итә.

Сталинград сугышында җиңүгә быел 81 ел. Волгоград өлкәсендә шул уңайдан рәсми чаралар уза. Бүген Татарстан Премьер-министры урынбасары, Бөтендөнья татар конгрессының Милли Шура рәисе Васил Шәйхразыев әлеге чараларда катнаша. Бу хакта Бөтендөнья татар конгрессы хәбәр итә.

Татарстан Диния нәзарәте Рамазан ае җитү уңаеннан җәмәгать урыннарын бизәү буенча икенче тапкыр «Нурлы Рамазан» бәйгесен игълан итә. Иң матур бизәлешне башкаручыга «ДУМ РТ Хаҗ» рәсми операторыннан хаҗга юллама бүләк ителәчәк. Бу турыда матбугат конференциясендә ТР Диния нәзарәтенең социаль үсеш бүлеге җитәкчесе Айгөл Биктимерова хәбәр итте.

Казанда «Миллиард.татар» порталы оештырган, татар дәүләтләре идарәчеләренең мөһерләренә (тамгалар) багышланган бушлай күргәзмә ачылды. Күргәзмә «Татмедиа» бинасында (Декабристлар урамы, 2), беренче каттагы медиа-үзәк холлында урнашкан.

Нурлат районында кызамык йоктыруның 8 очрагы теркәлгән, тагын берсе – сорау астында. Хәзер Нурлат шәһәре һәм районындагы мәктәпләрдә фильтр аша үтеп кенә дәрескә керергә мөмкин.

Бүген Татарстан Рәисе Рөстәм Миңнеханов республика муниципалитетларына 40 пассажир автобусы тапшырды. Тантана «Казан Экспо» күргәзмә үзәге мәйданчыгында узды.

Татарстан Республикасы Дәүләт җыр һәм бию ансамбле 11-18 апрельдә «Без - Россия» федераль программасы кысаларында «Халкыбыз мирасы» концерт программасын тәкъдим итә. Бу хакта Бөтендөнья татар конгрессы сайты яза.

Бүген Дәүләт Советы Рәисе Фәрит Мөхәммәтшин җитәкчелегендәге Татарстан Республикасы парламент делегациясе рәсми визит белән Минск өлкәсенә (Беларусь Республикасы) килде. Бу турыда Татарстан Дәүләт Советы матбугат хезмәте хәбәр итте.

Әгәр ишегаллары һәм тротуарлар вакытында кардан чистартылмаса, идарәче компанияләргә һәм торак милекчеләре ширкәтенә мөрәҗәгать итәргә кирәк. Бу хакта ТР прокурорының өлкән ярдәмчесе Руслан Галиев хәбәр итте.

Драматург, журналист, татар театрын оештыручыларның берсе Галиәсгар Камалның бертуган энесе Габдрахман Камалның улы Искәндәр Камалов абыйсы турындагы истәлекләре белән уртаклашты.

.RU домены эшендәге масштаблы өзеклеккә бәйле хәлне тикшерү эше башланды, дип белдерде Россия цифрлы үсеш, элемтә һәм массакүләм коммуникацияләр министры Максут Шадаев Digital Almaty 2024 форумында. Бу хакта РИА Новости агентлыгы хәбәр итә.

Балык Бистәсендә IDEA яшьләр үзәге төзергә ниятлиләр. Эшләр 290 миллион сумга бәяләнә, диелә дәүләт сатып алулары порталында урнаштырылган мәгълүматта.

Гыйнвар ахырында Мордовиянең Азюрка авылындагы Җомга мәчетендә мәктәп яшендәге балалар арасында тәҗвид буенча бәйге узды. Бу хакта Россия Мөфтиләр шурасының матбугат хезмәте хәбәр итә.

Бүген, кышның соңгы аеның беренче көнендә, Татарстанда температура фоны берникадәр түбәнәйсә дә, чагыштырмача җылы һава торышы саклана. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Кичә Казанда кызлар өчен Мөселман яшьләре форумының кышкы мәктәбе үз эшен башлап җибәрде. Аңа кадәр егетләр өчен Форум тәмамланган иде. Әйтергә кирәк, быелгы форум иң колачлысы һәм масштаблысы: катнашырга теләк белдереп барлыгы 140 егет һәм кыз заявка биргән иде, дип хәбәр итте Татарстан Диния нәзарәте.

Самара өлкәсенең «Бердәмлек» газетасында Похвистнево районыннан Шамил Мамышевның «Авыл почтасы олыларга бик кирәк» дигән язмасы чыкты.

«Ак халатлы фәрештәләр» XII фестивале Татарстан Республикасында 3-15 февральдә узачак. Бу турыда Татарстан Сәламәтлек саклау министрлыгы хәбәр итте.

Удмуртиянең «Яңарыш» газетасында Рәфилә Рәсүлеваның «Әминә Нәҗметдинова: «Яшисем килә!» дигән язмасы чыкты.

Яшел Үзән район үзәк хастаханәсендә Ачык ишекләр көне була. Чара 3 февральдә 9.00 сәгатьтә Яшел Үзән шәһәренең балалар поликлиникасында, Гоголь урамы, 10нчы йорт адресы буенча, «Ак халатлы фәрештәләр» фестивале кысаларында уза. Бу хакта «Яшел Үзән» сайтында хәбәр ителә.

Бу көннәрдә Зәйнең Сарсаз-Баграж мәктәбе укучылары махсус хәрби операция зонасына җибәрү өчен окоп шәмнәре ясау һәм хатлар язу белән мәшгуль. Бу хакта «Зәй яңалыклары» хәбәр итә.

Татарстанның Әлмәт районы башлыгы Тимур Нагуманов күптән түгел генә балалары туган хәрбиләрнең гаиләләрен өйләренә барып котлады. Бу хакта ул туры эфир вакытында сөйләде, дип яза «Әлмәт таңнары».

219-25 гыйнвар көннәрендә Удмуртиянең Дебесы авылында авыл җирлегендә һәм кече шәһәрләрдә яшәүче укучылар арасында рапид һәм тиз шахмат буенча Бөтенроссия ярышлары узды. Бу турнирдан Актаныш шахматчылары чемпион исемен алып кайтты. Бу хакта «Актаныш» сайтында хәбәр ителә.

Чаллыда чит ил гражданнары тарафыннан һәм аларга карата кылынган җинаятьләрне ачыклау белән махсус бүлекчә шөгыльләнәчәк. Бу хакта бүген шәһәрнең Эчке эшләр идарәсе башлыгы Айрат Ханбиков хәбәр итте, дип яза «Шәһри Чаллы».