Новости за 03.02.2024

Шимбә, 3 февральдә, Татарстан территориясендә болытлы һава торышы һәм җепшек кар көтелә. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Татарстанда авыл җирлегендә яшәүче ике меңнән артык өлкән яшьтәге кеше 2024 елның гыйнварында диспансеризация үтте. Медицина тикшерүе Россия Президенты Владимир Путин йөкләмәсе буенча гамәлгә ашырыла торган «Демография» илкүләм проектының «Өлкән буын» федераль проекты кысаларында оештырыла.

Республиканың төрле уку йортларыннан килгән яшьләр Апас аграр көллияте студентлары белән игелекле эшләрен дәвам итә. Бу юлы «Карлы десант» студентлар отряды махсус хәрби операциядәге Родион Тимергалиевның хуҗалыгында ишегалларындагы карны чистарттылар. Бу хакта «Апастово-информ» хәбәр итә.

Кукмара администрациясендә «Идел» бию ансамблен — Мәскәүдә узган дәрәҗәле хореография конкурсы, «Щелкунчик» премиясе лауреатларын хөрмәтләделәр. Әлеге конкурста ансамбль ике тапкыр 2нче дәрәҗә лауреат булган. Бу хакта «Хезмәт даны» хәбәр итә.

Балык Бистәсе район мәдәният йортында «Кием-күңел көзгесе» дип исемләнгән чара узды. Чара башланыр алдыннан кунаклар күргәзмәләр белән якыннан танышты. Күңелләренә хуш килгән әйберләрне сатып та алдылар. Бу хакта «Авыл офыклары» сайтында хәбәр ителә.

Яңа Чишмә районында «Ел укучысы — 2024» билгеләнде. Бу исем өчен районның 11 укучысы көч сынашкан. Жюрига укучыларның портфолиолары тәкъдим ителгән, аларда укучылар үзләре, гаиләләре һәм гаилә традицияләре белән таныштырганнар, кемдер үзе иҗат иткән шигъри юлларда, ә кемдер эссе рәвешендә Ватан турында инша язган. Бу турыда «Яңа Чишмә хәбәрләре» яза.

Чүпрәледә Илдар Хәлиуллов истәлегенә хоккей районара турниры булды. Күчмә кубок өчен Чүпрәле, Городище (Чүпрәле районы), Кайбыч районының ике командасы һәм Апас районы командасы уйнады. Бу хакта «Туган як» сайтында хәбәр ителә.