Новости за 12.02.2024

2023 ел нәтиҗәләреннән күренгәнчә, Татарстан тормыш сыйфаты буенча Россия төбәкләре рейтингында беренче бишлектә калды. Рейтингны РИА Новости агентлыгы төзегән.

ТР Рәисе Рөстәм Миңнеханов Татарстанда Фән һәм технологияләр унъеллыгын үткәрү буенча республика координацион комитетын үзгәртү турындагы указны имзалады. Документ хокукый мәгълүмат порталында урнаштырылган.

Россия территориясенә Alaskapox вирусын алып кайту куркынычы юк, дип белдерделәр РИА Новости агентлыгына Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтендә (Роспотребнадзор).

Татарстанның мәгълүмати инфраструктура объектларына киберһөҗүмнәр саны бер ел эчендә 32 тапкыр арткан. «Юл хәрәкәте иминлеге» дәүләт бюджет учреждениесе директоры, ТР Фәннәр академиясе президенты Рифкать Миңнеханов «Татар-информ» агентлыгына биргән интервьюсында шулай дип белдерде.

WhatsApp мессенджерында тиз шалтыратып җавап алу өчен «Сайлап алынганнар» папкасына контактлар өстәү функциясе барлыкка килергә мөмкин. WABetaInfo порталында шулай диелә.

Татарстан Рәисе Рөстәм Миңнеханов ТР «Перспектива» Балалар һәм яшьләрнең интеллектуаль-иҗади потенциалын үстерү һәм гамәлгә ашыру концепциясен гамәлгә ашыру буенча Ведомствоара координация советына үзгәрешләр кертү турындагы указны имзалады. Документ хокукый мәгълүмат порталында урнаштырылган.

Камал театрының яңа бинасына су белән тәэмин итү һәм юынтык суларны агызу челтәрләре үткәрергә ниятлиләр. Эшләрнең бәясе 81 миллион сум тирәсе тәшкил итәчәк, диелә дәүләт сатып алулары порталында урнаштырылган тендерда.

Дәүләт Думасындагы Мәгариф комитеты башлыгының беренче урынбасары Яна Лантратова Россия мәгариф министры Сергей Кравцовка 24 февральдә мәктәпләрдә, махсус операция ветераннарын чакырып, махсус хәрби операция башлану еллыгына багышланган чаралар үткәрү тәкъдиме белән мөрәҗәгать итте. Бу хакта ТАСС агентлыгы яза.

Июнь аенда Казанда узачак Брикс уеннарында Берләшмәнең барлык илләре диярлек катнашачак, шул исәптән яңа әгъзалар да, 10 дәүләтнең тугызы. Бу хакта «Известия» яза.

15 февральдә Томскида Советлар Союзы Герое, шагыйрь Муса Җәлилне искә алачаклар, дип яза Бөтендөнья татар конгрессы матбугат хезмәте.

Россия Президенты Владимир Путинның Америка журналисты Такер Карлсонга биргән интервьюсын якынча 1 миллиард кеше караган. Бу хакта «Россия 1» каналында «Вечер с Владимиром Соловьевым» тапшыруында «Россия сегодня» медиатөркеменең баш мөхәррире Маргарита Симоньян хәбәр итте.

Алдагы 10 көндә Татарстанда һава температурасы климат нормасыннан 6 градуска түбәнрәк булачак. Бу хакта республиканың Гидрометүзәге кисәтә.

Калининград өлкәсенең Аксакаллар шурасы рәисе Хәким Биктеев 99 яшендә бакыйлыкка күчте, дип хәбәр итә Бөтендөнья татар конгрессы матбугат хезмәте.

Алабугада Татарстанда иң популяр чараларның берсе булган Бөтенроссия Спас ярминкәсен үткәрү буенча беренче оештыру киңәшмәсе үтте. Алабуга дәүләт музей-ядкарьлеге генераль директоры Гөлзада Руденко Спас ярминкәсе кысаларында оештыру планлаштырылган вакыйгаларны игълан итте. Бу хакта «Алабуга нуры» яза.

Кукмарада совет гаскәрләренең Әфганстаннан чыгарылуының 35 еллыгына багышланган тантаналы чара узды. Җиңү паркында сугышчы-интернационалистларга мемориал ачылды. Бу хакта «Хезмәт даны» сайтында хәбәр ителә.

Түбән Кама шәһәр Советы депутаты Алия Миңнуллина гражданнарны кабул итәчәк. Бу хакта шәһәр администрациясенең матбугат хезмәте хәбәр итә. http://nkamsk-rt.ru/ шул хакта яза.